Catastaghju

Un catastaghju annantu à a vetta di una muntagna, in Svizzera

Un catastaghju hè una custruzzione furmata da petre impilate à l'asseccu. E so dimensione è cumplessità ponu varià in modu impurtante, chì ci sò chjuchi, mizani è propriu maiori. E petre sò qualchì volta adurnate, da mutivi artistichi, rituali o ancu funzionali. I catastaghji sò stati imprudati dapoi a preistoria per varii scopi, è sò sempre impiigati in bon' parechji lochi di u mondu sanu.

I catastaghji muderni

A funzione a più cumuna di i catastaghji hè quella di puntu di riferimentu, in particulare in muntagna, per indittà u stradellu. Eppuru, sò sempre imprudati per parechji altri scopi, in latri lochi. In e rigione nurdinche, specialmente in l'acque di a Scandinavia è di u Canada orientale, sò imprudati cum'è signalamenti ottichi per a navigazione.

Hè inoltre sempre vivu u so improdu per fini storichi è cummemurativi, o ancu per raghjone decurative è artistiche. Un esempiu hè a seria di numerosi catastaghji signalendu e fosse cumune di suldati britannichi in u locu di a battaglia d'Isandlwana in Sudafrica. Un antru esempiu hè u catastaghju di Matthew Flinders, annantu à u fiancu di l'Arthurs Seat, una piccula muntagna annantu à e rive di a cala di Port Phillip, in Australia. Un grande catastaghju hè statu custruitu in cima à una cullina accantu à l'autostrada Interstate 476 à Radnor, in Pennsylvania, cum'è parte di una seria di sculture di petra iniziate in u 1988 per simbulizà l'eredità gallese è imbillisce u paisaghju intornu à l'autostrada. Altri catastaghji sò simpliciamente cantieri induve l'agricultori cuncoglienu e petre cancellate da un campamentu, cum'è quelli chì sò visibili annantu à i Monti Catskill, in Nord'America, dunde ci hè una forte tradizione di ceppu scuzzese, è ponu ancu indicà i lochi induv'ellu hè statu persu u bestiame. In altri cuntesti, i catastaghji ponu avè un scopu esclusivamente artisticu, cum'è in une poche di opere d'Andy Goldsworthy.

I catastaghji in Corsica

Un catastaghju davante à u Lavu à Ninu

I catastaghji sò assai prisenti in Corsica, sopratuttu in muntagna per indittà i stradelli di girandulata.

U catastaghju ùn deve micca esse cunfusu incù u muchju, un usu anticu chì cunsiste in un accumulu di petre o di branche, per signalà u locu ind'ellu hè mortu qualchissia in modu viulente è tragicu. L'usu hè, per quellu chì ci passa, di lampà ci una petra o un pezzu di legnu. U muchju ùn hè micca cascatu in disusu, ma à spessu, à i ghjorni d'oghje, ci hè una stela accantu à u muchju.