Vai al contenuto

Garbage

Da Wikipedia.

C'l artìcul chè 'l è scrit in Miranduléś Emiliàn


«
You pretend you're high, you pretend you're bored, you pretend you're anything, just to be adored and what you need is what you've got. Don't believe in fear, don't believe in faith, don't believe in anything that you can't break. You stupid girl, you stupid girl, all you had you wasted.»
(EN)(Stupid girl, 1995)
«
At fà finta 'd èsar in élt, at fà finta 'd èsar stufa, at fà finta 'd èsar tut, sól p'r èsar aduràda e quél ch'at vōl 'l è quél ch'at ciàp. Ta n créd minga in dla paùra, ta n créd briśa in dla fēd, ta n créd a gnint ad quél che ta n gh la cav minga a sćiancàr. Baghéta stùpida, baghéta mincióna, tut quèl ch'at gh'à at 'l à strasinâ.»
(MUD)


I Garbage (in miranduléś rusc) i èṅ un grup ad rock alternatìṿ americàṅ, fundâ a Madison in dal Wiscònsin in dal 1994. I cumpunènt dla banda i èṅ Butch Vig, Steve Marker, Duke Erikson, la rósa scuséśa Shirley Manson e dal vòlti anc Daniel Shulman (quést chè fra 'l 1995 e al 2002). Da la fundasiòṅ a 'l dè 'd incō i aṅ fat gnir fóra quàt'r àlbum vindénd da piò ad 14 migliòṅ ad disc in tut al mónd.

Biugrafìa

Shirley Manson dal viṿ in dal 2005

Al grup al s fórma in di prim an Nuànta dal séndri di Angelfish, grup in du i sunàvan Butch Vig (ch'l iva culaburâ a soquànt di àlbum dla séna grunge ad Seattle cuma Nevermind di Nirvana, Dirty di Sonic Youth e Siamese Dream e Gish di Smashing Pumpkins), Steve Marker e Duke Erikson. I tri i sarìsan pò la cantànta di Goodbye Mr Mackenzie Shirley Manson e i faṅ nàsar i Garbage.

Al prim disc dal grup al pòrta al sò nóm e al véd la luś in dal 1995 (al finirà in di prim déś pòst in Inghiltèra e in di prim vint in di Stat Unî).

In dal Regn Unî a vèṅ fóra al sìngul Subhuman, ch'al n s cata minga in dal disc, mèntar Only Happy When It Rains al vèṅ druâ subìt par la prumusiòṅ. In séguit l'è la vòlta ad dū sìngui dimóndi famóś: Queer e Stupid Girl.

«
This is what he pays me for, I'll show you how it's done, you learn to love the pain you feel, like father, like son. The queerest of the queer, hide inside your head, the blindest of the blind, the deadest of the dead, you're hungry 'cause you starve, while holding back the tears, choking on your smile, a fake behind the fear, the queerest of the queer. I know what's good for you, you can touch me if you want, I know you're dying to.»
(EN)(Queer, 1995)
«
Quést 'l è quél ch'al m à pagâ, at farò védar cum 'l è fat, 't impàr a vlér bèṅ a 'l dulór ch'at sènt, cum un pàdar, cum un fiōl. Al più fnòć di fnòć, lugâ in dla tò tèsta, al più òrub di òrub, al più mòrt di mòrt, at sē sfinî parchè at sē drē a murìr ad fam, mèntar at but indrē al làgarmi, sufucànd in dal tò surìś, na finta da drē a la paùra, al più fnòć di fnòć. A sò quél ch'l è giust par tè, ta m pō tucàr s'at vō, a 'l sò ch'at gh'à na vója.»
(MUD)
I Garbage da 'l viṿ a Cupenàghen

I Garbage i faṅ al bòt e i tōśan na nomination a i BRIT Awards cuma Best New Band e Best International Newcomer (a sarév al mijór di grup nōṿ).

Anc in dal 1996 i prèmi i n màncan minga: rivelasiòṅ d'l an a i MTV Europe Music Awards in du i càntan Milk mèntar a i Grammy Awards i ciàpan tri nomination, in mèś a i quài a gh'è anc quéla par la canta mijóra: #1 Crush ch'la fà part dla culòna sunóra dal film Romeo + Juliet cun Leonardo Di Caprio.

In dal 1997 al grup al s mōṿ vèrs Friday Harbor, in dal stat ad Washington, par scrìvar al cansòṅ dal secónd disc, Version 2.0 ch'al véd la luś al 15 ad Favràr dal 1998. A s trata 'd un lavōr cun di arangiamènt a 'l cumputer, cun i sìngui Push it (in du a s pōl sintìr quèl ad Don’t worry baby di Beach Boys), I Think I'm Paranoid (druàda anc in dal film Gran Turismo 2 dòp che As Heaven Is Wide 'l éra finìda in dal prim film dla sèrie) e Special. 'L àlbum al vins soquànt disc ad plàtin, finénd al prim pòst in dal Régn Unî e al tredicéśum in di Stat Unî.

In dal 1999 i sònan al téma più impurtànt dal film ad James Bond The World Is Not Enough (Al mónd a n è mia asè), mèntar When I Grow Up la s cata in dal film Big Daddy - Un papà speciale.

Prim piàṅ dla Manson, tòlta śò a New York

In dal 2001 i Garbage i s questiónan cun la sò cà discugràfica, la Almo Sounds, e in Luj i pàsan a la Interscope Records par rigistràr al tèrs àlbum, Beautifulgarbage (Bèlrusc) ch'al vèṅ distribuî in di negòsi a partìr da Utóbar. Al disc al s piàsa subìt a 'l tredicéśum pòst dla Billboard 200, vindénd in di prim tri méś più 'd un migliòṅ ad còpi anc sénsa ch'a gh fusa stàda dla prumusiòṅ par via di atintâ ad 'l 11 ad Setémbar dal 2001 a New York e a Washington.

In America i n èṅ minga gnû fóra di sìngui ligâ a cal disc chè, a difarénsa dl'Europa in du a 'n è gnû fóra quàtar: Androgyny, Cherry Lips (druàda in na reclàm famóśa 'd 'n arlój), Breaking up the Girl (ch'la fà part anc dla culóna sunóra dal film Daria Is It College Yet?) e Shut Your Mouth.

I Garbage i partìsan par di cuncèrt insém a gl'U2 ('l Elevation Tour). Durànt 'l ùltim spetàcul, Vig al ciàpa l'epatite A e al vèṅ rimpiasâ par Matt Chamberlain in dal dati europei.

'L ùltim ùlbum di Garbage, Bleed Like Me, 'l è gnû fóra 'l 11 'd Avrìl dal 2005 e 'l è piaśû principalmènt in di Stat Unî par via dal sìngul Why Do You Love Me. Finî al tour la banda l'à cunfirmâ 'd avér vója ad tōr-as na pàuśa, róta sōl in dal 2007 quànd a véd la luś la racòlta Absolute Garbage.

Discugrafìa

Àlbum

  • 1995 - Garbage
  • 1998 - Version 2.0
  • 2001 - Beautiful Garbage
  • 2005 - Bleed Like Me
  • 2012 - Not Your Kind of People
  • 2016 - Strange Little Birds
  • 2021 - No Gods No Masters

Racòlti

  • 2002 - Special Collection - EP
  • 2007 - Absolute Garbage

Sìngui

  • 1995 - Vow
  • 1995 - Subhuman
  • 1995 - Only Happy When It Rains
  • 1995 - Queer
  • 1996 - Stupid Girl
  • 1996 - Milk (feat. Tricky)
  • 1998 - Push It
  • 1998 - I Think I'm Paranoid
  • 1998 - Special
  • 1999 - When i grow up
  • 1999 - The Trick is To Keep Breathing
  • 1999 - You Look So Fine
  • 2001 - Androgyny
  • 2002 - Cherry Lips
  • 2002 - Breaking Up the Girl
  • 2002 - Shut Your Mouth
  • 2005 - Why Do You Love Me
  • 2005 - Bleed Like Me
  • 2005 - Sex Is Not The Enemy
  • 2005 - Run Baby Run
  • 2007 - Tell Me Where It Hurts
  • 2007 - It's All Over But The Crying (remix)

Vìddeo

  • 1996 - Garbage Video - VHS
  • 2007 - Absolute Garbage - DVD

Culegamènt estéran

Estratto da "https://eml.wikipedia.org/w/index.php?title=Garbage&oldid=146388"