San Francisco
|
C'l artìcul chè 'l è scrit in
Miranduléś |
San Francisco (a s lèś /ˌsæn frənˈsɪskoʊ/ in ingléś) l'è na sità di Stat Unî, la quàrta più granda dla Califòrgna, c'n i sò utsènt-sinquantamìla abitànt a 'l incìrca, dòp Los Angeles, San Diego e San Jòśè. L'è stada fundàda al 29 ad Śugn dal 1776 da di culugnalìsta spagnōi.
Dòp la secónda guèra mundiàla l'è carsùda dimóndi par via dal ritóran di suldâ, un muć 'd imigrâ, 'l apòǵ a la cultùra dla paś, di fiōi di fiōr e di dirìt di gay faghénd-la dvintàr na rocafòrt “liberal” dal Partî Demucràtic, tant par dir in dl'elesiòṅ p'r elèś'r al presidènt di Stat Unî dal 2016, chè la Clinton l'à ciapâ 'l 85,3% di vōt cónt'r al gnanc 10% ad Donald Trump[1].
San Francisco 'l è 'n impurtànt sèntar turìstic e i sò palàs i èṅ stâ tirâ sù tgnénd a mènt di stîi architetònig difarènt. Al sò Istâ i èṅ fréschi e dal vòlti a gh'è anc la fumàna.
Tgnénd adrē a i dat dal cesimènt dal 2010 la sò pupulasiòṅ la pōl cuntàr su 'n nùm'r élt ad gint cun di urìgini aśiatichi (33,3%) mént'r i biànc i rìv'n a 'l 48,5% e i nég'r a 'l 6,1%. I gay e 'l lèśbichi chè i tóc'n al 15%.
In sità i s càtan di punt ad riferimènt dimóndi famóś cuma 'l Golden Gate Bridge, 'l èx parśòṅ 'd Àlcatraz e la piàsa Union Square. Sinc di istitùt bancàri americàṅ più impurtànt dal paéś i gh'aṅ la sò sēd chè acsè cuma la Levi Strauss e di pès da nuànta dla Silicon Valley cuma Apple e Google e pò la Dolby, Pinterest, Twitter, Mozilla e la Wikimedia Foundation. Tacànd da 'l an 2016, San Francisco l'è clasificàda insìma in dla clasìfica di pòst più vivìbii dal mónd.
Al sò sìndig, da 'l 2011, 'l è 'l demucràtic Ed Lee.
Persunàǵ ligâ a San Francisco
- Isadora Duncan, balarìna
- Clint Eastwood, atōr e regìsta
- Todd Bridges, atōr
- Bruce Lee, lutadōr e atōr
- Liev Schreiber, atōr
- Alicia Silverstone, atōra
- Natalie Wood, atōra
- Steve Jobs, fundadōr dla Apple
- Paul Kantner, chitarìsta
Culegamènt estéran
Nòti
- ↑ L'Hillary Clinton l'à pardû parchè l'à stravìns a San Francisco e Manhattan AGI, 9 ad Nuvémbar dal 2016