Anstromo

Anstromo, aŭ angstromo (mallongigo Å) estas mezurunuo de longo, egala al 100 pikometroj (do, 10^–10 m). Ĝi ne estas unuo de SI, kaj internaciaj normigaj organizaĵoj ĝin malrekomendas.

Oni ofte uzas ĝin en fiziko por mezuroj de atomoj, kemiaj ligiloj, kaj ondolongoj de videbla lumo; ĝian oportunon ilustras la fakto, ke la diametro de hidrogena atomo estas proksimume 1 Å.

Ekvivalentoj

1 Å = 10⁻¹⁰ m = 0,1 nm
1 nm = 10 Å
1 Å = 100 pm

La simbolo unikoda

Unikodo entenas apartan signon por anstromo ĉe U+212B. Tamen preferindas la uzo de la sveda litero U+00C5, difinita per la normiga transformo unikoda.

Origino

Anstromo estas nomita omaĝe al la sveda fizikisto Anders Jonas Ångström [ˈɔ̀ŋstrœm], unu el la fondintoj de spektroskopio.

La esperantaj vortaroj (ekz-e NPIV) donas por la mezurunuo oportunigitan esperantigon sen la ortografia g (kiu fakte malestas en la prononco de la lingvoj sveda, angla kaj aliaj, posedantaj la fonemon /ŋ/). Tio estas fonologie ĝusta, ĉar en Esperanto [ŋ] estas alofono de /n/, kaj tiel ni povas simpligi la langorompan karambolon /n-g-str/, kian postulus la meĥanika paŭsaĵo de la skriba formo.

Eksteraj ligiloj

Kategorio Anstromo en la Vikimedia Komunejo (Multrimedaj datumoj)

http://www.gramota.ru/dic/search.php?word=%E0%ED%E3%F1%F2%F0%E5%EC&lop=x&efr=x&ag=x&zar=x
http://conversion.konverter-jedinica.com Arkivigite je 2006-05-12 per la retarkivo Wayback Machine
http://www.ex.ac.uk/cimt/dictunit/ccleng.htm Arkivigite je 2007-10-11 per la retarkivo Wayback Machine