Víctor Casas

Víctor Casas
	; Irudi gehiago
Bizitza
Jaiotza	Coruña, 1900eko uztailaren 31
Herrialdea	Espainia
Heriotza	A Caeira (en) , 1936ko azaroaren 12a (36 urte)
Heriotza modua	heriotza zigorra: bala zauria
Hezkuntza
Hizkuntzak	galiziera; gaztelania
Jarduerak
Jarduerak	politikaria eta kazetaria
Sinesmenak eta ideologia
Alderdi politikoa	Partido Galeguista

Víctor Casas Rey (A Coruña, 1890eko uztailaren 31 – A Caeira, Poio, 1936ko azaroaren 12a) politikari, antzezle eta kazetari galiziar bat izan zen, Irmandades da Fala elkarteko kidea eta galiziar abertzale garrantzitsua.

Biografia

1936ko azaroaren 12an fusilatuak izan zirenen omenezko oroitarria, Pontevedran.

Félix Casas eta Cinita Reyren semea, 1916an A Coruñako Irmandade da Falako kide egin zen. Gaztetan zapata sailtzaile ibiltaria izan zen, baina 1918tik aurrera galiziar abertzaletasunean barneratu zen, urte horretako Lugoko Lehenengo Asanblada Nazionalistan parte hartuz, zeinetatik Manifestu Nazionalista (galizieraz, Manifiesto Nazonalista) atera zen, Gerra Zibilera arte galiziar nazionalismoaren gidalerro guztiak bilduko zituen oinarria. Garai hartako Primo de Riveraren diktaduraren aurka ere borrokatu zuen. Federico Zamorarekin batera ibili zen Galizia osoan zehar galiziar abertzaletasuna zabaltzeko asmoarekin.

Irmandades da Falako kide gogotsua izan zen eta A Nosa Terra (euskaraz, Gure Lurra) aipatutako erakundearen aldizkariko zuzendaria 1922tik. Gainera, Galiziar Antolakunde Errepublikar Autonomoaren (ORGA) sustatzaileetako bat izan zen, haren sorrerari bide eman zioten biltzar esanguratsuetan parte hartu baitzuen 1929ko irailean. Lestrobeko Ituna (1930eko martxoaren 26koa) onartu zuen, baina ez Barrantesen Konpromisoa (1939eko irailaren 25ekoa), Galiziar Alderdi Autonomistak antolatua eta Vicente Risco, Ramon Otero Pedrayo, Castelao, Florentino López Cuevillas, Valentín Paz-Andrade eta Portela Valladaresek itundua.

Alabaina, ORGAk hartu zuen bide estatalistaz etsituta, 1931n Alderdi Galegistaren sorkuntzan parte hartu zuen, zeinaren Pontevedrako probintziako eta A Coruñako probintziako presidentea izan zen. 1936an estatu kolpea eman zuten Espainian militar frankistek eta Galizia haien esku geratu zen lehen unetik. Hori horrela, Victor Casas atxilotua izan zen eta gerra-kontseilu batek fusilatzeko agindua eman zuen. Pontevedratik lau kilometrora, Poio udalerriko Caeira mendian, fusilatu zuten soldadu matxinoek beste hamar errepublikarrekin batera 1936ko azaroaren 12an.