Clavicembal
Cu la peraule clavicembal si indiche une famee di struments a cuarde di origjin taliane a tastiere. Il plui grant e il plui cognossût al è il clavicembal progjenitôr dal pianoforte, ma ancje i struments plui piçui come il virgjinâl e la spinete a puedin jessi catalogâts te famee. Il sunôr al ven prodot piçant la cuarde, cence batile come che al sucêt invezit tai struments come il clavicuart o il pianoforte. Chest gjenar di struments al è nassût cuant che une tastiere e je stade adatade a un salteri. La peraule stesse, che si cjate par la prime volte intun document dal 1397, e ven de Lenghe latine clavis (clâf, intindût l'argagn che al doprave il moviment dal tast par fâ sunâ lis cuardis) e cymbalum, peraule che e indicave tal periodi de Etât di Mieç i struments musicâi a cuardis tiradis su une casse poligonâl e cence mani, come il salteri.
-Scolte il sunôr dal clavicembal
Le epoche di aur dal clavicembal (secui XVII e XVIII)
[cambie | modifiche il codiç]Chest periodi storic e je le epoche di aur dal clavicembal: fabricants e musiciscj a puartin chest strument e il sô repertori al pont plui alt de sô utilizazion. Il clavicembal al devente un strument prestigjôs di puartâ intai palaçs e intes cjasis de nobiltât. Une vore presint te vive epoche musicâl dal timp, i fîs de nobiltât a imparin a sunâlu sot la direzion dai miôr professôrs e musiciscj de epoche.
Atôr pe Europe, a jerin cinc "scuelis" di fabricazion di chest strument:
1. Italie (centris principâi:Vignesie , Milan , Florence , Rome , Napoli.
2. Le regjon belghe des Flandris (Te citât di Anverse jerin i "Ruckers", famee di costrutôrs).
3. France.
4. Ream Unît.
5. Gjermanie. Tes citâts di Hamburg , Berlin e Dresde.
Fûr di chestis regjons, la produzion dal clavicembal e je stade une vore scjarse. Cualchi esemplâr al è stât prodot te regjon iberiche (Spagne e Portugal), ma i struments fabricâts in chestis regjons jerin pôcs e une vore influençâts dal stîl talian.