Tsjerke fan Spannum

	Sint-Remigiustsjerke
	Lokaasje
provinsje	Fryslân
gemeente	Waadhoeke
plak	Spannum
adres	Tsjerkebuorren
koördinaten	53° 8' N 5° 36' E
	Tsjerklike gegevens
tsjerkegenoatskip	Herfoarme gemeente yn 'e PKN
patroanhillige	Remigius fan Reims
	Arsjitektuer
boujier	1500
boustyl	Lette gotyk
monumintale status	ryksmonumint
monumintnûmer	21559
	Webside
	Hiemside herf. gemeente Spannum-Iems ; FB-side
	Kaart
	;

De Sint-Remigiustsjerke yn Spannum is de tsjerke fan de herfoarme gemeente Spannum-Iens. De gemeente is oansletten by de PKN. De tsjerke is in ryksmonumint.

Skiednis

De patronaatsrjochten fan de tsjerke wiene fan kleaster Lidlum. Oant fier yn 'e 16e iuw wiene koarhearen fan Lidlum pastoar fan Spannum.^[2]

De letgoatyske oan Sint-Remigius wijde tsjerke ferfong om 1500 hinne de foargonger. By de ynfal fan de Spanjerts yn 'e winter fan 1586 waard de tsjerke mei it doarp yn 'e brân stutsen. Nei de reformaasje yn 1580 waard de tsjerke in protestantske tsjerke en foar de protestantske earetsjinst geskikt makke.

Yn 'e 19e iuw folge de ommitseling fan it koer en de súdlike muorre. Oan de noardlike kant fan de tsjerke is noch it oarspronklike bou materiaal fan kleastermoppen te sjen. Ek binne oan de noardlike kant twa foarse steunbearen oanbrocht om de muorre tsjin fersakking te kearen. De oanbou oan de noardlike kant is 19e-iuwsk. Yn 'e noardlike muorre is ek it mei gieltsjes tichtmitsele noardlike portaal noch te sjen.

De trijelidde sealtektoer is noch oarspronklik en heart mei syn nissen ta de moaiste sealtektuorren fan Fryslân. Yn de toer hingje twa klokken: in klok út 1590 fan Thomas Both en in klok út 1620 fan Hans Falck. De klokken ferfongen eartiids de âlde klokken dy't ferlern gyngen nei't de Spanjerts de tsjerke yn 'e brân stieken.

Neffens in gevelstien yn 'e toer mei it famyljewapen fan Edzard fan Sminia, grytman fan Hinnaarderadiel, waard de toer yn 1742 fernijd:

In 't jaar 1742 is deze Toren

vernieuwd en verbetert onder

de Ed: Heer EDZARD van SMINIA,

Grietman over Hennaarderadeel

en Gentuis Hesselius Predikant te

Edens en Spannum de Kerkv[oogden] Jan

Leenerds & Frans Baukes

De tsjerke waard yn 2014 foar it lêst restaurearre. By de restauraasje binne in grut tal âlde grêven foar it ljocht kommen wêrfan it bestean net bekend wie.^[3]

Ynterieur

De tsjerke besit in 17e-iuwske preekstoel mei in efterskot en klankboerd. It doopstek is sletten en der steane twa hearebanken. Fierder hingje yn 'e tsjerke de Tsien Geboaden en trije kroanluchters.