Leu romanés

Leu romanés
Leu en romanés
Código:	RON
Ámbito:	Romanía
Símbolo:
Fracción:	100 bani
Moedas:	1, 5, 10, 50 bani
Billetes:	1, 5, 10, 50, 100, 200, 500 RON
Emisor:	Banco Nacional de Romanía
Taxa de troco: 15-2-2014	1 EUR = 4,49 RON 1 USD = 3,28 RON
Troco actual

O leu romanés (en plural lei) é a moeda oficial de Romanía, onde se utiliza dende a fundación do Banco Nacional de Romanía en 1880. Un leu está dividido en 100 bani (en singular ban). O código ISO 4217 do actual leu romanés é RON e do antigo (antes do 1 de xullo de 2005) ROL.

Historia

No século XVII, nos estados romaneses utilizábase como moeda o thaler neerlandés (löwenthaler), moeda na que aparecía un león, polo que se utilizaba popularmente a palabra lei (plural de león en romanés) para denominar ao diñeiro, denominación que permaneceu despois de que se deixase de utilizar o thaler.

Dende o 1 de xullo de 2005, entrou en circulación o novo leu (RON) que substitúe ao antigo (ROL), equivalendo 1 leu novo a 10.000 lei "antigos". Os "novos" lei coexistiron até o 31 de decembro de 2006 cos billetes e moedas do leu "antigo" (entre paréntese a súa equivalencia co novo leu):

• Moedas: 500 lei (5 bani), 1.000 lei (10 bani), 5.000 lei (50 bani).
• Billetes: 10.000 lei (1 leu); 50.000 lei (5 lei), 100.000 lei (10 lei), 500.000 lei (50 lei), 1 000 000 lei (100 lei).

Billetes

Descrición dos billetes en circulación legal:

• 1 RON (10.000 ROL)
  • Medidas: 120 x 62 mm
  • Tonalidade: verde
  • Anverso: o escritor e historiador Nicolae Iorga e flores de xenciana
  • Reverso: Catedral do Mosteiro de Curtea de Arges e unha aguia cunha cruz no peteiro
• 5 RON (50.000 ROL)
  • Medidas: 127 x 67 mm
  • Tonalidade: violeta
  • Anverso: Á esquerda escudo de armas do país. No centro un caravel, notas musicais e un violín. Á dereita retrato do compositor George Enescu
  • Reverso: Á esquerda Ateneo Romanés en Bucarest. Arriba fragmento da partitura da ópera Edipo Rei de Enescu. Piano ao centro á dereita.
• 10 RON (100.000 ROL)
  • Medidas: 133 x 72 mm
  • Tonalidade: laranxa
  • Anverso: o pintor Nicolae Grigorescu, unha malva real, un pincel e unha paleta de pintura
  • Reverso: casa da rexión de Oltenia e a pintura "Rodica" (unha rapaza de campo cunha cesta)
• 50 RON (500.000 ROL)
  • Medidas: 140 x 77 mm
  • Tonalidade: amarelo e verde
  • Anverso: o enxeñeiro e piloto Aurel Vlaicu, unha flor de edelweiss e unha hélice
  • Reverso: cabeza de aguia e deseño do avión "Vlaicu II", de fondo deseño dunha turbina
• 100 RON (1 000 000 ROL)
  • Medidas: 147 x 82 mm
  • Tonalidade: lila e azul
  • Anverso: o dramaturgo Ion Luca Caragiale, unha violeta e unha máscara de comedia
  • Reverso: Teatro Nacional en Bucarest, estatua do dramaturgo e unha máscara de traxedia
• 500 RON
  • Medidas: 153 x 82 mm
  • Tonalidade: verde e gris
  • Anverso: o poeta Mihai Eminescu, unha flor de tilia, pluma e tinteiro e un reloxo de area
  • Reverso: a Biblioteca Universitaria de Iaşi, de fondo primeira páxina do xornal "Timpul" da época do poeta

Véxase tamén

Ligazóns externas

• Banco Nacional de Romanía (en inglés) (en romanés)
• Billetes de Banco Mundiais en Polímero por Stane Štraus (en inglés)