Patio
Patio (do latín pactus a través do occitano pàtu) é unha zona aberta situada no interior dun edificio.
Pode estar rodeado completamente polo resto de pezas do edificio, ou ben por tapias que o separen doutros patios veciños ou da rúa. En todo caso é unha zona sen teito. Pode ter algunha parte cuberta pero neste caso esa zona non terá separación algunha co resto do patio. Como moito algunha columna ou arcada para soportar a estrutura do alpendre ou soportal.
En edificios altos de vivendas existen patios interiores para dar iluminación a todas as habitacións de cada piso. O fondo do patio adoita ser privado anexo á vivenda da planta baixa ou primeira, unha zona común accesible ou pechada, ou ben inaccesible por motivos de seguridade. Estes patios poden coincidir con outros análogos de edificios veciños e tamén quedar cun lado aberto á rúa para obter maior iluminación.
O chan dos patios pode ser acabado de baldosas ou de formigón, ou ben unha zona axardinada. En calquera caso, adoita dispor dun sistema de drenaxe ou de evacuación da auga de choiva e evitar así a súa acumulación. As casas romanas adoitaban dispor dun depósito de auga, ou impluvium, que se enchía directamente coa choiva.
En Andalucía dáse especial importancia aos patios e nalgunhas vilas e cidades como Córdoba organízanse festas e concursos para incentivar o seu coidado e decoración.
