Reticulo
Le reticulo es le secunde antestomacho del ruminantes e camelos. Le altere antestomachos es le rumine (le plus grande) e le omaso. In un vacca le reticulo ha un capacitate approximative de cinque gallones (~19 litros)[1] e es situate le plus in avante e al sinistra del cavitate abdominal. Le nomine proveni del structura interne ubi plicas del membrana mucose, usque a 1 cm de altitude, forma cellulas que es polygonal con 4 usque a 6 lateres (vide le imagine a basso al dextra). A causa de isto le reticulo in anglese sovente es appellate "honeycomb" (favo de melle).
Rumination
[modificar | modificar fonte]Le reticulo ha un function importantissime nam illo pote exequer le rumination per pulsar le contento al esophago ubi contractiones antiperistaltic lo pulsa al bucca. Quando le forrage de novo ha essite masticate e inglutite, le partes le plus liquide es transportate directemente al omaso via le sulco del reticulo e le le partes plus solide es retornate al rumine. Lege plus in Rumination. Iste passage de liquidos al omaso pote evenir non solmente durante rumination ma tamben durante le altere contractiones del reticulo-rumine.
Le reflexo del sulco del reticulo
[modificar | modificar fonte]Ab le orificio del esophago usque al orificio del omaso il ha un sulco que es bordate per duo labios musculose, le sulco del reticulo (vide le tertie imagine al dextra). Illo se claude reflexivemente presso juvene ruminantes quando illos bibe lacte e impedi que le liquidos entra in le rumine. Illos entra solmente in le omaso e postea in le abomaso, le ver stomacho, que produce enzymas que pote fermentar lacte. Remarcabile es que quando le juvenes bibe aqua illo sovente arriva in le rumine. Iste reflexo del sulco del reticulo dispare quando le juvene animales plus tarde primarimente mangia herba e feno. Si lacte entra a in le rumine de juvene ruminantes illo essera putrescite.
Corpores extranee in le reticulo
[modificar | modificar fonte]Boves a vices ingluti cosas que non debe esser mangiate, p.ex. clavos e filos de aciero. A causa del plicas in le interior, e le contractiones forte del reticulo, illos alora pote perforar le pariete lo que al minus causa peritonitis. Un tal bove cessa mangiar, sta con un dorso arcate e geme de dolores quando le reticulo essaya contraher se.
Al altere latere del diaphragma, solmente alcun centimetros distante del reticulo, es le pericardio con le corde que alora tamben risca esser damnate lo que naturalmente es riscose pro le vita.
Prophylaxe
[modificar | modificar fonte]Pro impedir isto on ha fabricate magnetes special, con un grandor de un parve banana, que on insere in le pharynge de vaccas pro esser inglutite. Illos sempre arriva al reticulo e cosas magnetic como clavos e filos de aciero se attacha al magnete. Si al minus un extremitate, o forsan ambes, del objecto acute es adherite al magnete illo non equalmente facile pote esser attachate al plicas del membrana mucose e perforar le pariete durante le contractiones reticular multo forte. Oves e altere ruminantes non tanto sovente incontra tal problemas.
Therapia
[modificar | modificar fonte]Si un objecto acute ha perforate le reticulo le vacca essera malade e cessa mangiar. Le contractiones del reticulo diminue e un inflammation con pyogenese occurre. Alora le objecto acute pote distachar se, e multe vaccas pote devenir san de novo sin tractamento.
Ma il ha possibilitates chirurgic. Post un incision in le rumine inter le osso coxal e le ultime costa il es possibile, si le animal non es extraordinarimente grande, arrivar al objecto con le mano e distachar lo. Un tal operation es exequite con anesthesia local quando le vacca es stante.