Tuamasina

Tuamasina (malag. Toamasina) — Madagaskar shıǵısındaǵı qala, Tuamasina I aymaǵınıń, Acinanana wálayatı hám rayonınıń administrativlik orayı. Eski ataması Tamatave.

Xalqınıń sanı 2014-jıl maǵlıwmatlarına bola 282 100 adam. Hind okeanı jaǵasında jaylasqan. Mámleket sırtqı sawdasınıń úlken bólegine xızmet etiwshi sawda orayı hám tiykarǵı teńiz portı (1974-jılı 1,7 mln. tonna júk aylanısı).

Házirgi waqıtta Tuamasina portınan kofe, gúrish, banan, vanil, burısh, qálempirgúl, grafit eksport etiledi; stanok hám úskeneler, toqımashılıq hám azıq-awqat sanaatları ónimleri alıp kiriledi. Qalada azıq-awqat, neftti qayta islew hám metaldı qayta islew sanaatları kárxanaları bar. 1977-jılda Madagaskar mámleket universitetleri sistemasına kiretuǵın Tuamasina universiteti dúzildi.

Qalada Tuamasina aymaǵın paytaxt Antananarivu menen baylanıstıratuǵın temir jol liniyasınıń aqırǵı stanciyası hám aeroport bar.