Sabiha Gökçen

Este artikolo uza la grafia de Aki Yerushalayim para la lingua judeo-espanyola. Mersi muncho por mantener el artikolo uzando este estil.

---

Sabiha Gökçen (enel sentro de la imej) kon vistido de la Armada del Ayre, 1938.

Sabiha Gökçen (Bursa, 22 de marso de 1913 – Ankara, 22 de marso de 2001) era uma mujer de la armada del ayre turkana, konosida por ser la primera aviadora de gerra de la istorya i la prima mujer turkana en bolar un avion, de edad de 23 anyadas. Eya endemas era una de las ocho kreaturas adoptadas por Mustafa Kemal Atatürk.

Biografiya

El orijin de Sabiha Gökçen no esta aklarado. Asigun la biografiya ofisiala turkana, Atatürk la adopto en una vijita ke izo en Bursa en 1925, kuando tuvo konosensia de las kondisiones en las ke eya bivia. Ansi, Sabiha yego a ser otra de las kreaturas adoptadas por Atatürk, biviendo enel Palacio presidensial de Ankara. Izo los sus estudios en Ankara i en Estambol. Desde manseva tuvo entereso enel mondo de la aviasion. Diskues de ke la Ley de Alkunyas era echa ofisiala, Atatürk le dio a Sabiha la alkunya Gökçen el 19 de Desiembre de 1934. «Gök» sinyifika "syelo" en la lingua turkana i Gökçen, «ke apartiene al syelo». Mas eya ainda no era una piloto, solo desvelopo una pasion por la aviasion diskues en la su vida.

Entereso en la aviasion

Sabiha aprontandose para bolar enel su avion de gerra Breguet 19, 1937.

Enel espektakolo de aviasion echo en la apertura de la Eskola de Bolos Türkkuşu el 5 de Mayo de 1935, kon musafires de munchos payises, eya estava kon muncho entereso. Kuando Atatürk le demando a eya si keria ambezar para ser parakaidista, eya le disho ke ya estava aprontada para ambezar. Atatürk le disho a Fuat Bulca, el direktor de la eskola, ke keria ke la su ija ambezara para ser piloto. En 1936, entro ala Akademia de la Armada del Ayre de la Turkiya, ambezando endemas en la Union Sovyetika endjunto kon otros syete mansevos; diskues, aresivio la su lesensia de piloto.

Piloto de gerra

Sabiha Gökçen en Atines, kuando izo su tour por los Balkanes en 1938.

Diskues de entrar ala Armada del Ayre de la Turkiya, en Djunio de 1937, izo endemas el su primer lavoro komo piloto de gerra, deshando kayer bombas enriva de gerreyadores kurdistanos durante la Rebelion de Dersim. En 1938, izo un bolo por enriva de varias sivdaded kapitalas de los Balkanes le la izo konosida enel mundo. En esta anyada, era yamada "treinadora shefe" de la Eskola de Bolo Türkkuşu de la Asosiasion Aernautika de la Turkiya, ande lavoro fina 1954 komo treinadora de pilotos i era echa miembro de la djunta direktiva de la asosiasion. Endemas, era la treinadora de otras katro mujeres pilotos: Edibe Subaşı, Yıldız Uçman, Sahavet Karapas i Nezihe Viranyalı. Sabiha Gökçen izo bolos al deredor del mondo por 28 años, fina 1964. Durante las 28 anyadas ke izo parte de la Armada del Ayre de la Turkiya, bolo por 8.000 oras en un total de 22 tipos diferentes de aviones. Ansi, Sabiha yego a ser la imaje de la mueva Turkiya, moderna i sekular, komandada por el su padre, Atatürk.

El su livro, "Una vida enel Kamino de Atatürk" era publikado en 1981 por la Asosiasion Aeronautika Turka en onor de los 100 anyos del nasimiento de Atatürk.

Onores

El doseno ayroporto de Estambol es yamado Ayroporto Internasional Sabiha Gökçen en onor de eya.. Endemas, era seleksionada para apareser enel poster "Los 20 aviadores mas grandes de la istorya" de la Huersa Aerea de los Estados Unidos en 1996, siendo eya la unika mujer enel poster. El bushkador de internet Google el 22 de Marso de 2009 troko la su imej en la oja de entrada en la versiyon turkana por onor de eya.