واحد من علامات السينما المصريه الحديثه ، سواء سيناريو او اخراج او تمثيل كل حاجه في افضل حالاتها ، عايز كمان اتكلم عن عظمة الكاستينج واختيار الممثل المناسب في الدور المناسب عشان كده هتلاقي معظم ممثلين الفيلم عملو دور تاريخي في كاريرهم هنا ومتفصل عليهم 

الفيلم مش هقدر أوصف بيأثر فيا ازاي في كل مشهد فيه على الرغم من أبطاله الكتار ومشاهده القصيره لكل قصه عشان يلحق يروح الي بعديها لكن عظمة السيناريو والكتابه هتخليك تتعلق بكل قصه وكل شخصية وتتأثر بيها وتحس بمعاناتها وتشوف تشريح صغير للمجتمع المصري وقتها 

فيه تفاصيل بسيطه اوي بتهزني كل ما أشوفها .. الكاميرا وهي داخله على وش سوسن بدر بعد مواجهة كريمة مختار ليها .. تعابير وش كريمه مختار بعد ما ابنها رمى الفلوس في وشها .. ماجد الكدواني وهو بيقول بالحب بالحب بالحب .. فرحة دنيا سمير غانم وتغير تعبيرات وشها عشان حد قالها كلمه حلوه .. نظرة روجينا لخالد الصاوي وهي بتقوله أنا خوفت منك ..  رقصة خالد الصاوي مع باسم سمرة وسوسن بدر على صوت عبد الباسط حموده .. واخيراً صرخة روجينا الي بتقضي عليا خالص 

حتى وانا حافظ كل حاجه في الفيلم مازال تأثيره عليا كبير اوي وحبي ليه بيزيد اكتر مع الوقت