Glande
Un glande es un grupo de selulas en la corpo de un animal cual sintese licuides (como ormones) per relasa a la sistem de sangue (endocrin) o a cavetas en la corpo o sua surfas esterna (esocrin).
Cada glande es formida par un caveta de un surfas epitelial. Esta caveta pote, a la comensa, ave un strutur tubal, ma en otra casos pote comensa como un colona solida de selulas cual deveni tubal plu tarde. La colona de selulas pote fende o jerme, en cual caso un glande composada es formida. En multe glandes, la cuantia de ramos es limitada; en otras (la glande salival, la pancreo) un strutur grande es formida par crese e sudivide repetada. Jeneral, la ramos no uni con lunlotra, ma en un caso - la figato - esta aveni e un glande composada reticulada es produida.
On clasi glandes en du modos. Un modo es par sua forma. Si la glande reteni sua forma como un tubo, lo es nomida un glande tubal. Si la parte secretante es grandida, lo es nomida un glande alveolal.
La otra odo es par la funsion. Un glande endocrin secrete produidas cual sircula tra la sistem sangual. Esemplos es la glande pineal, la timo, la ipofise, la tiroide, e la glande adrenal.
Un glande esocrin secrete sua produidas tra un duto a la surfas de la corpo, como la pel o la fore de la sistem de dijesta. On ave tre grupos: Glandes apocrin perde un parte de la selula en secrete. En glandes olocrin la selula intera desintegra cuando secretente. Glandes merocrin secrete sua licuidas par esositose, per esemplo la glandes mucosa e sebosa, e la glandes salival, larmal, e intestinal.
Glandes esocrin pote ance es clasida par la produida de secrete: Un glande serosa secrete un licuida acuin e tipa rica en protenas, pe la glandes de suo; un glande mucosa secrete muco, un produi plu viscosa e rica en carboidratos, como la selulas calixin; e la glandes sebosa secrete un produi lipido, como olio o sira, per proteje la pel.
Vide ance la lista de glandes umana.