Cassini-Huygens
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Cassini/Huygens waor 'n ruimtesonde in de gelieknaomege missie. De missie waor 'n studie vaan de planeet Saturnus en zien maone, in 'n samewérking vaan NASA, ESA en ASI. Lancering van de sonde voont plaots op 15 oktober 1997, en de missie is geëindeg op 15 september 2017 wie de sonde in de atmosfeer van Saturnus oetergevalle is. De sonde bestoond oet twie deile, Cassini ('t deil wat um Saturnus drejde) en Huygens ('ne lander dee op de maon Titan is geland in 2005).
Naomgeving
[bewirk | brón bewèrke]De naom besteit oet twie deile: de sonde heit Cassini, geneump nao d'n Italiaons/Fransen astronoom Giovanni Domenico Cassini, dee de ringstructuur (mèt naome de oonderverdeiling daovaan) en veer maone vaan Saturnus oontdèkte, en de lander heit Huygens, geneump nao de Nederlandsen astronoom, wiskundege en fysicus Christiaan Huygens, oontdèkker vaan Titan.
Doel van de missie
[bewirk | brón bewèrke]Cassini had een aontal doele:
- De drei-dimensionaole struktuur en 't dynamisch gedraag vaan de ringe vaan Saturnus bepaole.
- De samestèlling vaan 't oppervlak vaan de maone en de geologische historie devaan bepaole.
- De aard en 't oontstoon vaan 't duuster materiaol op de duuster hèlf vaan Iapetus.
- De drei-dimensionaole struktuur en 't dynamisch gedraag vaan de magnetosfeer bepaole.
- 't Dynamisch gedraag vaan de atmosfeer vaan Saturnus op wolke-niveau bestudere.
- De variabiliteit in d'n tied vaan de wolke vaan Titan bestudere.
- Karakterisere vaan 't oppervlak vaan Titan op regionaol sjaol.
Huygens
[bewirk | brón bewèrke]'t Doel vaan de Huygens-lander waor lande op Titan en mèt zien instruminte versjèllende metinge te doen, oonder aandere um de fysische eigensjappe vaan de atmosfeer vaan de maon te bepaole. De lander waor ontworpe um te kinne lande op vlaak land of bergechteg terrein of zelfs in 'ne meugeleken oceaon, aongezeen vaan te veure neet vasgestèld kós weure boe de lander neer zouw koume.
Belaankriekste gebäörtenisse
[bewirk | brón bewèrke]
- 15 oktober 1997: Lancering
- 26 aprèl 1998 en 24 juni 1999: flyby (zwoertekrachslinger) vaan Venus
- 18 augustus 1999: zwoertekrachslinger vaan Eerd
- januari 2000: zwoertekrachslinger vaan Jupiter
- 11 juni 2004: langs Phoebe, maon vaan Saturnus
- 1 juli 2004: aonkoms bij Saturnus
- 14 januari 2005: Huygens land op Titan
- 9 miert 2006: foto's vaan de maon Enceladus tuine vloeibaar water aon op die maon
- 4 miert 2009: 'n klein maon in ein vaan de boetenste ringe vaan Saturnus weurt oontdèk
Ind vaan de missie
[bewirk | brón bewèrke]Op 22 aprèl 2017 vóng 't lèste deil vaan de missie aon. Cassini góng tösse de planeet en de ringe door vlege en korter bij de planeet koume es oets. D'n aofstand tösse de ringe en de planeet waor slechs 2400 km en de sonde góng dao mèt 'n snelheid vaan mie es 112.000 km/h doorheen. Dit zouw 'n aontal kiere gebäöre totdat op 15 september 2017 de sonde in de dampkring vaan Saturnus oeterein is gevalle. De käös um de sonde te laote neerstorte koumm umtot me zeker wouw zien tot de maone vaan Saturnus neet verontreineg raakde umtot dao meugelek leve besteit (wat op Saturnus zeker neet 't geval is).[1]
