Vesuvius

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

De Vesuvius (Italiaans: Vesuvio) is 'ne vólkaan ane wèskus van Itaalje, zuudoeastelik van Napels. De naam Vesuvius kump aaf van 't Oskisch fesf "rouk". De vólkaan ligk inne vlaakdje van Campanië, haet 'n doorsnit van ach kilomaeter en is 1281 maeter hoeag. De vólkaan is veural bekandj dore oetbersing in 't jaor 79, wobie de stej Pompeii en Herculaneum woorte verinneweerdj.

De Vesuvius ligk inne caldera van 'nen ajere vólkaan, de Monte Somma. Dees caldera is veur zoeaget 18.300 jaor trögk óntstange. Geneump nao dees situaasje neump m'n algemeinelik 'ne vólkaan in 'n caldera owwel 'ne sommavólkaan.

De Vesuvius is 'ne stratovólkaan, waat inhèltj det t'r besteit oet 'n aafwusjeling van laogen aan as en lava, die zich vörmen in twieë stadia van 'n vólkaansoetbersing.

Saer 1995 is de Vesuvius en 't ómringendj gebied e besjurmp nasjenaal park.