Acheroppito

ZE-P	Sta paggina chie a l'è scrita in zeneize, co' ina grafia tipo quella do Prian do 1745

Re Abgar o riçeive o Mandillo

Acheroppito, (da-o grego ἀχειϱοποίητοϚ, ch'o scigniffica no fæto da man (umaña)), riferio êsençialmente a-e inmagine miacooze de Cristo, in particolâ a-a Santa Cea impressa insce di tesciui comme o mandillo de Kamuliaña e quello de Edessa (o termine "mandillo", in gr. τò μανδύλιον, o ven da l'arabo mandil ò mendil). Pe estenscion co-o termine acheroppito s'indica ascì i atre immaggine do Cristo e da Vergine Maria into senso de retræti aotentichi. Ço o se contrapoñe quindi a l'epitteto χειϱοποίητοϚ, ch'o se riferisce a-i idoli. Tæ inmaggine, de origine orientâ, g'han avúo un rollo conscidereive inte l'Ocidente ascì.

O mandillo de Kamuliaña

O mandillo de Kamuliaña (ò Kamulia), segondo l' Histoira Ecclesiastega de Zaccaia o Retô do sec. VI o l'ea un retræto de Gexo depento sciu lin che una donna a l'aiva arecugeito inte 'na fontaña e ascozo into so vello, dove n'arestò impresso una copia. E doe immagine finin l'uña a Çezarea de Cappadocia e l'âtra, no lontan, a Kamuliaña, dove vègnan oggetto de culto. O mandillo de Kamuliaña, doppo una traversâ trionfâ de l'Axia Menô, o zonse a Costantinoppoli into 554 ò, segondo a Cronega de Zorzo Çedren (ca. 1100), into 574. L'icoña miacooza a vègne portâ comme palladium imperiâ inte campagne contra i Perscen de Maoriççio, into 586, e de Eracclio, into 622. Questa a gh'aiva una doggia fonçion, religioza e militâ, in quante i imperatoî a dœuvion inta so guæra-croxâ contra i infedeli. No s'ha de nœuve precize in sce-o so aspetto e o no fu ciu mençunao doppo o sec. VIII: de seguo o l'andò desperso durante i dezordeni do periodo iconoclasta.

L'icoña do Sancta Sanctorum

A partî da-o sec. VIII un'inmaggine acheroppita do Cristo a l'è documentâ a Romma into Sancta Sanctorum do Lateran. O Liber Pontiphicalis o riferisce, sença precizâne e caratteristeghe, che o pappa Stéva II (752-757) o-a portò in sce-e spalle pe e stradde de Romma menaççâ da-o longobardo Astorfo. Segondo a Cronega de Zorzo Moñego, o patriarca German I, sotta l'impiao iconoclasta Lion III l'Izaorico (717-741), o l'affiò l'inmaggine do Sarvatô a-o mâ co-ina cartapegoa, in sce-a quæ o l'aiva scrito: Segnô, sarva ti mæximo e sarva niatri ascì. L'icoña a saiæ stæta arecugeita da pœu a Romma da-o pappa e deposta inte 'na grande gexa. No l'è precizao de quæ imaggine se tratte: a poriæ êse o mandillo ò l'icoña do Cristo da Chalké (tipo do Pantocratô) ch'a l'ea in sce-a porta de bronzo de l'intrâ do Gran Palaççio de Costantinopoli, primma che l'imperatô o-a fesse levâ. Comunque, inte l'anno 817, a Costantinoppoli s'ea a-o corente de l'existença de l'acheroppita romaña, comme testimonia o patriarca Niceforo, segondo o quæ e çittæ de Edessa e de Romma poeivan vantâse de possede de immagine acheroppite do Sarvatô.

In quante a l'icoña do Sancta Sanctorum conservâ scin a ancœu nonostante o so stæto estremamente frammentaio, di ezammi han permisso de stabilî che se tratta de un Pantocratô, assettao in sce un trono gemmao, beneixente co-a drita e co-in libbro ò un rollo inta scinistra, co-i pê appoggiæ in sce un suppedannio, a cavelea co-a riga into mezo e a barba; l'aoreola a l'è marcâ de lengê da trei braççi de croxe, a veste a l'è porpúia, o cuscin rosso ciæo e o fondo azzuro. Cecchelli (1926-1927) o propoze de datâla a-o sec. V, ponendola in rapporto co-a pittua monumentâ italiaña; ma ancœu se pœu foscia indicâ un termine de paragon ciu vallido inte l'icoña do Pantocratô into monestê de Santa Cattæña a-o Scinai do sec. VI donde, benché o Cristo o segge raffigurao a meza figua, i coî e tutti i âtri particolæ son assæ scimmili, compreizo a forma streita do pannello de legno, a quelli de l'icoña romaña che, in definitiva, poemo ritegnî œuvia bizantiña do sec. VI ò VII, sciben che no se pœu pe aoa precizâ ni a dæta, ni e circostançe de l'arrivo a Romma. In ócaxon de un primmo restaoro sotta Zane X (914-928) in sce-o de rê fu depento una croxe gemmâ e un'inscriçion; mentre sotta Innoxenço III (1198-1216) a fu recoerta da una lammina de argento laoao ch'a lasciava vixibile solo ch'a testa, quella ascì perâtro coverta da un vello de sæa ch'o ne riproduxeiva i træti. Da alloa in ça a se presentò comme una inmaggine da Santa Cea, analloga a quella conservâ da-o sec. 1XIV a Zena inta Gexa de san Bærtomê di Ærminni.

L'inmaggine de Edessa

O Santo Mandillo de Zena

L'inmaggine acheroppita do Cristo ciu famoza l'è quella de Edessa, attuâ Urfa, in Turchia, ligâ a-a stoia de re Abgar, contâ za into sec. IV da Zœuggio de Cezarea. Segondo e primitive lezendie o sovran, maoto, o l'invitò Cristo into so regno, ma Gexo o ghe rispoze ch'o gh'aviæ mandao un di so apostoi, doppo a so morte. Succescivamente un racconto sciriaco, a dotriña de Haddai, o mençuña un retræto do Cristo eseguio da Anania e mandao a Abgar. A lezendia, ch'a preize corpo inta segonda meitæ do sec. VI, a conta che Abgar o scrisse a Cristo e o ghe mandò o pitô Anania, perché o ghe fesse o retræto, ma lê o no l'ariescì a fissâne i træti somatteghi; Cristo alloa o se lavò a cea e sciugandose o lasciò impressa a so inmaggine in sce-a teia; o dette quindi a Anania questo retræto e una lettia e, riçevendoli, Abgat o guarì. Into conto intervegnan ascì i apostoi San Tadê e San Tomaxo. A lettia do Cristo a l'è nota za a Procoppio, ma o l'è o storico Evagrio che, poco doppo o 593, o mençuña l'inmaggine acheroppita do Cristo, attribuindo a vittoia di Crestien in sce-i Perscien a-a preçioza reliquia, ch'a l'ea stæta miacoozamente ritrovâ miagiâ sorv'a-a porta da çittæ de Edessa. Questa a l'arestò oggetto de curto fin a-o 944, quand'a vègne trionfalmente portâ a Costantinoppoli sotta Roman I Lecapen e Costantin VII Porfirogenito. A quest'urtimo fu attribuio a verscion esteiza da stoia - ò Narratio - repigiâ inti menei e inti menologhi, comprendente l'arrivo da reliquia a Costantinopoli; mentre una verscion ch'a s'aferma a l'arrivo de Taddeo a Edessa a l'è notta sotta o nomme de Epistola Abgari. O Mandillo o vègne accugeito con gran pompa e collocao into crizotriclinnio, a saa de riçevimento di imperatoî, vegnindo coscì a crovî o rollo de palladium de l'inmaggine de Kamuliaña.

O Stato e a Gexa conscideravan o Mandillo comme a ciu preçioza de reliquie, a-a quæ l'ea consacrao de çeimonnie solenne. Carego de un profondo scignificao religiozo, o l'ea de fæto consciderao scimbolo do misteio de l'Incarnaçion e de l'Œücaistía - inte questo senso o l'ea stæto consciderao un elemento importante da-i iconodôli durante a lotta iconoclasta - ch'o s'azonzeiva a-o valô profilattico. Doppo a preiza de Costantinopoli da parte di Latin da quarta croxâ, into 1204, i tezoi da capitâ vègnan sacchezzæ e o Mandillo, portao in Ocidente, o l'andò perdúo.

L'arrivo do Mandillo a Costantinopoli into 944 o trovò eco inte doe rapprezentaçioin: a primma (sec. XII) a l'è una miniatua da Cronega de Zane Skilitze e a mostra Romman I ch'o baxa a testa do Cristo ch'a ghe vegne presentâ impressa in sce un tesciúo. L'âtra, de poco posteriô a l'avvegnimento, a l'è un'icoña do monestê de Santa Cattæña a-o Scinai e a mostra o re Abgar, co-i træti do Porfiozennio, che in trono o tegne in man o Mandillo, in forma de sarvietta co-e frange in sce-e quæ l'è impresso a cea do Cristo, co-a barba e o nimbo croxao. O pendant o l'è costituio da-a figua assettâ de Tadê; di atre figue de santi se dispoñan inta parte infeiô. Weitzmann (1971; 1976) o l'ha supposto che a parte centrâ a raprezentesse o mandillo izoao. Questa a l'è perçò a primma testimoniança figurâ ch'a se segge conservâ da preçioza inmaggine.

Doppo che e lezendie relative a-o mandillo vègnan acugeite inta liturgia, n'apparse de raprezentaçioin, into sec. XI, primma inti manoscriti e da pœu inte icoñe e inta pittua monumentâ. E ciu antighe son de immagine izoæ inte 'n menologio conservao a Lusciandria, into Vangê de Alavardi e inta Scaa do Paradizo de Zane Climmego. Inte miniatue de Lusciandria e do Vatican o tesciúo do mandillo o l'è recamao a lozanghe, decoræ da un motivo stilizzao, mentre into Vangeio de Alavardi o l'è ornao da di medaggioin doggi, che contegnan una croxe de Mâta, e o l'è orlao de læto da 'n'inscriçion psœüdo-cufica. Into codexo do Vatican compâ ascì, in sce-o mæximo fondo, in negativo, ma sença frange, una testa enantiomorfa: a l'è a replica che o tesciúo, ascozo inte 'na miagia a Ierapoli, o l'aiva lasciao impressa, durante o so trasporto a Edessa (ò inta mæxima Edessa), in sce un mon, o kerámion (ò kerámidion), atra reliquia venerâ.

O preçiozo mandillo, ch'o l'ea stæto fissao in sce un pannello, o l'ea diffiçilmente vixibile e e so rappresentaçioin risurtan assæ despæge tra lô, fæto dovúo ascì a-o mutâse di caratteri fixonommeghi tippichi da tradiçion iconograffega de l'arte bizantiña. Pe a segonda meitæ do sec. XII se conosce doe icoñe famoze: uña de Novgorod, l'âtra foscia bulgara, conservâ da-o sec. 13° into dommo de Laon. Tutte doe derivan da un modello bizantin into quæ o vizo, circondao da-a massa ondulâ di cavelli e da barba, o l'è modellao con un'esprescion doçe e grave. L'assença do collo a l'evoca a maschera apotropæga da Gorgoña antiga, comme za Zorzo Pixide o l'aiva notao into VII secolo.

E inmagine de Zena e de-a Gêxa de San Scirvestro a Romma, aroinæ da de redepentue, porieivan foscia remontâ a quest'eppoca, sciben che a reddenixe di cavelli e da barba a l'indica una dæta posteriô. E numeroze repliche slave, sorvettutto d'ambito ruscio, son caratterizzæ da-a barba bagnâ, a doggia ponta. Queste facce sante son tradiçionalmente composte in sce-o sfondo de un tesciúo scimulao, da-o quæ, tuttavia, sparì rapidamente e frange e inti œuvie ciu tarde a stofa a l'appâ aggroppâ a-i bordi. De inmaggine scimmile compan a partî da-o sec. XII inta pittua murâ; in Cappadocia se n'atrœuva quattro exempi inte gexe de Göreme, posti inta protexi ò into diaconico. A Saklı kilise l'è da segnalâ in particolâ o rapporto do Mandillo con Izaia e a Vergine da Nonçiâ, rapporto ch'o l'evoca a so importança inta dotriña de l'Incarnaçion. In Georgia se pœu trovâ o mandillo inte l'abscide, de d'ato a l'artâ. Inta Panagia Araku de Lagudea, a Çipro, o mandillo o l'è rappresentao insemme co-o kerámion ch'o sormonta l'inscriçion dedicatoia a-o de d'áto da porta; tâ collocaçion, ch'a sottolinnia o valô apotropaico de queste immagine, a se trœuva torna inti Barchen ascì. Sorvettutto, comme succede inte tante gexe rusce do sec. XII e ciu tardi inti Balchen ascì, a so poxiçion sorvelevâ - sotta a cuppoa ò in sce l'ærco trionfâ - a l'aquista ascì valô dogmatico.

Inte rappresentaçioin de Costantinopoli ascidiâ da-i Avai (626) ligæ a l'Inno acatisto, o mandillo o l'appâ inta so fonçion apotropaica. O so impiego in ambito militâ o no fu desmentegao in Ruscia manco ciu tardi, zacché Ivan o Teribbile (1530-1584) o s'impadroní da çitæ de Kazan combattendo sotta un stendardo ch'o ne recava l'inmaggine.

Do resto i racconti da Narratio e de l'Epistola Abgari inspiron ascì di cicli figurativi. Inte l'icoña do Scinai Taddê e o pedon presso o re rimandan a l'Epistola; da-a mæxima fonte dipende e miniatue do Vangê de Gelati, dove in nœuve miniatue l'è rappresentao unze scene che terminan co-o battezzo de Abgar da parte de Taddeo. O rollo 499 da Pep. Morgan Lib. de New York o comprende trezze miniatue che rappresentan i epizodi de Ierapoli - a colonna de fœugo e o mon incizo - ma tuttavia o l'omette di âtri epizodi importanti. A Narratio a l'ha inspiao quattro miniatue into Menologio de Mosca do 1063 e træ inte quello de Pariggi do XII secolo.

Doveiva existe però de seguo un ciclo ciu completo da-o quæ deriva e dexe immaggine che compan in sce-a cornixe d'argento indoao do Santo Mandillo de Zena: Abgar o consegna a Anania una lettia pe Cristo; Anania o no l'ariesce a retrae o Cristo; o Cristo o se lava e quindi o consegna a Anania una lettia e o tesciúo con impressa a so inmaggine; Anania o porta a lettia e a teja a Abgar; Abgar o l'allœuga l'inmaggine do Cristo a-o posto de un idolo abbattúo; o vescovo Eülalio o miagia o mandillo; un vescovo o scrœuve o mandillo e o mon co l'inmaggine impressa; o vescovo o bruxa i Perscen, avendo versao de l'œuio inte 'n braxê; a l'arrivo do mandillo a Costantinopoli un indemoniao o guarisce. L'esecuçion de placche sbalçæ, smâtæ e co-o fondo de fî de graña a l'è de âta qualitæ, lasciando suppoñe un'origine costantinopolitaña. O pannello in legno in sce-o quæ l'è depento a cea do Cristo o l'è parçialmente coverto da una teja, foscia una reliquia.

Çerte scene son raffiguræ ascì inta pittua monumentâ do periodo di Paleolloghi, prez. inta gexa da Vergine a Matejič (Maçedonia, Iugoslavia).

A Veronica

Santa Veronica do Memling

In Occidente a lezendia da Santa Cea a s'è invece concretizzâ into personaggio mitico de Santa Veronica, o nomme da quæ o poriæ vegnî da vera icona. Lê a l'aviæ sciugao con un mandillo a cea do Cristo l'inmaggine da quæ a ghe saiæ arestâ impressa. Santa Veronica, pe l'influença di misteii che-a mettan in relaçion co-a Pascion, a l'è rapprezentâ comme una matroña con un turbante a l'orientâ; coscì a l'appâ raffigurâ in sce 'n pannello da paa d'artâ do meistro de Flémalle a Francoforte, dove a cea do Cristo a l'è seña, contraiamente a l'iconografia ciu diffuza inta quæ o l'è rappresentao dolorozo e co-a coroña de spiñe. Benché tâ lezendia a l'affonde e so reixe inte 'na tradiçion antighiscima ch'a coinvoze ascì l'emorroissa e a Santa Madæña, o curto da Veronica o no compâ a Romma primma do sec. XII, mentre o no s'attrœuva mai raffigurao inte l'arte bizantiña.

Atre icoñe

Se pœu çitâ ascì di atri acheroppiti do Cristo, prez. quello de Gexo figgiœu a Menfi (Egitto), comme riporta into sec. VI Antogno da Piaxença, ò i sudai (scindone) conosciui inte l'Ocidente da-o sec. XIV in ça, comme quello famozo inta cattedrâ de Turin.

Existe ascì de immagine de santi conscideræ miacoose; ancon ciu importanti, da-o punto de vista colturâ e artistego, son i acheroppiti da Vergine. Zorzo Monego (sec. IX) o segnalla un'inmaggine da Vergine impressa in sce una colonna de una gexa in Palestiña (Diospoli ò Lydda), a-a quæ fa ascì alluxon i trei patriarchi orientæ inta so lettia a l'imperatô iconoclasta Teofilo (839): o passaggio do racconto de Zane Damascen in sce-i Maghi, ch'o remonta a 'na tradiçion do sec. V, o parla de un retræto da Vergine eseguio sciu so recesta pe ese inviao a Babilonnia. A questo epizoddio se riferisce l'inlustraçion de un codexo conservao a Geruzalemme ch'a mostra un pittô intento a retrae a Vergine assettâ co-o figgiœu e, inte 'n'âtra scena, a çeimonnia de l'installaçion de l'icoña; da pœu questo retræto o no vegniâ ciu mençunao.

De icoñe da Vergine son stæte conscideræ acheroppite into senso de retræti aotentichi. Into sec. VI, Tedoo o Lettô o ricorda inta Historia Ecclesiastica che l'impiaixe Eüdoscia a l'aiva inviao a Purcheia, a Costantinopoli, un'inmaggine da Moæ de Dê depenta da l'evangelista San Lucco. Un numero conspígo de gexe, sorvettutto a Costantinopoli e a Saonicco, g'han avúo l'appellativo de acheroppite percose se ghe conservava de icoñe de questo tipo. L'inmaggine ch'a l'ha avúo mao fortuña, no solo in area bizantiña dove gh'ea un palladium de Costantinopoli, ma inte l'Occidente ascì, l'è a Vergine Odighítria, dîta de San Lucco, inta quæ a Maia a tegne o figgiœu ben drito co-o braçço scinistro. Nomioze gexe, sorvettutto in Italia, ean ritegnue custode de una icoña de San Lucco; de tante che gh'ea, in particolâ a Romma, inti secc. VII e VIII a ciu scignificativa a l'è quella de Gexa de Santa Françesca Romaña.

Conligaménti esterni

Contròllo de outoritæ	GND (DE) 4620842-2