Orde Tϟtonnego

ZE-P	Sta paggina chie a l'è scrita in zeneize, co' ina grafia tipo quella do Prian do 1745

A croxe de l'Orde Tϟtonnego

Orde Tœütonnego (ted. Deutschritterorden). O l'è o terço di gren ordeni monastego-cavaggeschi nasciui da-e croxæ.

Descriçion e stóia

A diferença di doi ordi che l'aivan precedúo, i Templæ e i Uspiæi, di quæ o l'ascimilò l'esperiença politico-aministrativa, imitandone ascì l'abito, l'Orde Tœütonnego o l'ebbe scin da prinçipio compatto carattere naçionâ todesco. L'orde o se sviluppò de fæto da 'na confraternita de mercanti de Bremma e Lubecca che into 1190 aivan fondao à Acri un uspiâ militâ e un orde uspiæo, confermao into 1191 da-o Clemente III: into 1198 o groppo primitivo o divègne, pi œuvia de quarche prinçipi todeschi, l'Orde di cavagei de l'Uspiâ de Santa Maia in Gerusalemme confermao into 1199 da l'Innoxenço III, ch'o ghe confei di particolæ privileggi, o l'aprovò a so reggola, analloga a quella di Templæ, assegnandoghe otr'a quello de l'ascistença a ferii e infermi ascì o compito de combatte i infedeli. A l'Orde poeiva apartegnî solo che di zoeni de famigge nobile todesche, che fessan i voti monasteghi de castitæ, povertæ, obediença (i mercanti do groppo originaio vègnan nobilitæ).

Sotta o terço Gran meistro de l'Orde, l'Hermann von Salza, l'amigo e conseggê do Federigo II, ch'o resse l'orde da-o 1210 a-o 1239, l'attivitæ di Cavagei Tœütonneghi o preize i caratteri che doveivan arestâghe peculiæ: sença cessâ l'œuvia uspiæa ch'a no fu mai trascurâ do tutto, se pose in primmo cian quella militâ, e con questa o campo d'açion de l'Orde o començò a mesciâ da l'Oriente meridionâ e axiatego a-o Settentrion orientâ œüropeo.

Into 1211 l'Orde o fu ciammao in agiutto da-o re Andria d'Ungaja contra i Cumen, e o l'ebbe in cangio o Burgenland da colonizzâ. I Cavagei fortificon o paize e començon a colonizzâlo: ma quande liatri çercon de rendise indipendenti da-o re faxendo infœüdâ o paise a l'Orde da-a Santa Sede, vègnan scacciæ (1225). Ma into 1226 vègnan ciammæ in agiutto da-o polacco ducca Corado de Masovia e da-o primmo vescovo de Pruscia, Crestian, contra i slavi paghen abitatoî da Pruscia: in cangio ebban o Culmerland, territoio polacco ch'o l'ea stæto ripreizo da-i paghen, e o possesso de quante teritoio pruscian avessan posciuo conquistâ. Primma de passâ a l'açion, l'Hermann von Salza o feççe investî l'Orde da parte do Federigo II do Culmerland e de tære da conquistâ, comme fœüdi de l'impeo: coscì a-a dignitæ de gran meistro de l'Orde andò d'aloa in pœu unia quella de prinçipe de l'impeo.

Seguì di privileggi e de garançie da Santa Sede e da coroña polacca, e into 1230 començò l'œuvia de conquista: a-o Culmerland seguì façilmente a riva drita da Vistola e da Nogat, da pœu a costa, o Pregel, o Samland. Into 1237 se fuse co l'Orde Tœütonnego l'Orde di Cavagei Portaspâ aportando a Curlandia, a Semigallia e a Livonnia. Da prinçipio l'Orde o s'acontentava da converscion e da sottomiscion da popolaçion; ma doppo a grande rebellion do 1260 - inta quæ i Pruscien, co l'agiutto di confræ Lituen, e avantagiandose da beneive nœütralitæ di Polacchi levon a-i Cavagei squæxi tutto o conquistao - doppo a chinzenne guæra de riconquista ch'a seguì, e infin doppo a conquista de regioin ciu orientæ da Pruscia, abitæ da-i Lituen e da de stirpe slave (1283), i originai abitatoî fun radicalmente sterminæ, e inte l'antigo teritoio pagan, che ormai o l'andava da-o basso corso da Vistola a-o medio corso do Memel, vègnan ciammæ di manenti todeschi, che sotta o seveo governo di Cavagei, ma con molti privileggi e esençioin, se spantegon a cortivâ e campagne, e fondon una quanteña de nœuve çittæ (noteive fra lô Königsberg, che ciu tardi a doveiva vegnî capitâ de l'Orde); i pochi nobili pruscien arestæ fedeli, e i pruscien no nobbili in compenso da so fedeltæ vègnan completamente asciorbii. A guæra co-i Lituen a diventò perenne.

Verso a meitæ do sec. XIII l'Orde o l'aiva di possedimenti in Palestiña, Puggia, Seçillia, Spagna, inte l'Impeo grego, in Ærminnia, in Aostria, Germannia, Pruscia e Livonnia, ognun di quæ o l'ea afidao a 'n Komtur (Commendator), mentre a Palestiña a l'ea aministrâ da-o Gran meistro mæximo. O primmo di possedimenti non tedeschi ch'o l'andò perdúo o fu quello d'Acri (1291): e coscì pe 'n çerto periodo de tempo a casa moæ de l'Orde a fu transfeia a Veneççia. O gran meistro Siegfried von Feuchtwangen o transferì da pœu a casa moæ de l'Orde a Marienburg, consacrando coscì (1309) l'abandon da primitiva miscion pe-a nœuva, ciu streitamente ligâ a-o carattere naçionâ todesco de l'Orde, che into 1308 o l'aiva acatao o ducato de Pomerannia da-i margravi do Brandeburgo, vegnindo coscì segnô de Dançiga ascì, e asseguando a continoitæ teritoriâ di proppi possedimenti.

Into periodo seguente (scin a-o 1382) a stoia de l'Orde a s'identifica con quella da Pruscia e da Livonia, ch'ean i so doi dominni prinçipæ. Into sec. XIV l'Orde o l'ha squæxi fonçioin egemoniche inte l'Œüropa settentrionâ: fortiscimo a l'interno pe-a sazza aministraçion e pe-a fedeltæ di sudditi, o resciste vittoriosamente a-i sforçi da Polonia, vegnua decisamente so aversaia doppo l'aquisto da Pomerania, e a quelli da Santa Sede, co-a quæ o se trœuva ciu votte in conflito a caosa da riluttança di vescovi de terre conquistæ (in Pruscia i 4 vescovati ean afidæ a di membri de l'Orde: no coscì inte regioin aportæ da l'Orde di Portaspaa, ecc.) a sottostâ a-a sevea aministraçion de l'Orde; d'atra parte ottimi ean i rapporti de l'Orde co-a Hansa, ch'o l'ascistette inte lotte co-i sovren de Sveççia e Danemarca, e sorvetutto o favoì sgombrando o Baltico da di piræ, i coscì díti Vitalienbrüder.

Ma comença ascì i segni da decadença. In questo tempo a perenne guæra contra i Lituen, che pù a procurò a-i Cavagei una grande groia inte l'opinion pubbrica di contemporanei, a començò a degenerâ inte 'na specce de caccia a l'ommo, a-a quæ s'invitava di ospiti de riguardo comm'a 'na demôa, e ch'a vegniva conduta sença risurtæ poxitivi de nœuve conquiste; e se pù sotta o gran meistro Winrich von Kniprode (1351-1382) a Pruscia a conobbe o so mascimo splendô cavagesco, celebrao da-o Chaucer e da-o Boucicaut, coscì da poei tegnî, unnico fra i paixi todeschi, o paragon co l'Ocidente, l'Orde o dovette adattâse a-i tempi, e vegnî sempre ciu 'na possança mercantî, ch'a s'alienò l'añimo de çittæ prusciañe fandoghe concorença e instituindo di monopolli (comme quello de l'ambra) in proppio favô.

Sciben ch'into 1346 l'Orde o goaagnesse l'Estonia e into 1404 Visby co-o Gotland, l'inreddenîse progrescivo do governo di Cavagei, e a dificortæ pe 'n orde cavagesco d'adattâse davei a-a nœuva arte militâ preparavan quella decadença ch'a se manifestò ciæamente quande o sovran de Lituania, o prinçipe Jagellon o se convertì a-o crestianeximo, constrenzendo o so poppolo a anâghe a prœuvo (1386), e o levò coscì a l'Orde o so compito, a mæxima raxon d'êse. O Jagellon o s'imparentò co-a casa regnante de Polonia, consolidando coscì l'aliança di doi stati slavi. Pe reagî a-e continnoe manifestaçioin d'ostilitæ di Slavi, e pe tiâ torna sciu o proppio prestiggio, l'Orde o delibió una gran spediçion militâ, terminâ co-a terribile sconfita de Tannenberg (15 luggio 1410). A primma paxe de Thorn (1411) concluza da-a Polonia pe avei man libera co l'Ungaia, a l'aveiva reizo a l'Orde squæxi tutti i so dominni: ma o so governo o fu sempre pezo, e finarmente çittæ e nobiltæ s'unin into Preussischer Bund e deciaron a proppia indipendença da l'Orde, invitando a pigiâ a sovranitæ in Pruscia o re de Polonia, a-o quæ prestò omaggio sciña di cavagei (1454). A guæra de l'Orde contra a Polonia ch'a ne seguì e ch'a diò pe 13 anni, a l'ebbe, votta comm'a l'ea ascì contra o Preussischer Bund, carattere de guæra civî, e a terminò co-a segonda paxe de Thorn, a coscì díta "paxe perpettoa" (1466), ch'a lasciò a l'Orde solo che a Pruscia Orientâ, e comme fœüdo polacco.

A decadença politica, militâ, morâ e religiosa ascì de l'Orde, a l'aiva reizo mœüo pe-a secolarizzaçion, ch'a fu compia, sciu conseggio do Martin Lutê, da l'urtimo Gran meistro de l'Orde, o margravio Alberto de Brandeburgo, nevo do re de Polonia, eletto into 1511 e che into 1525, co-o trattao de Cracovia, o transformò a Pruscia inte 'n ducato ereditaio, vassallo do regno de Polonia; into 1561 o so esempio fu seguio da-o cappo de l'Orde pe-a Livonnia. O meistro de l'Orde pe-i possedimenti todeschi, arestao cattollico, o feççe mette o ducca Alberto a-o bando de l'impeo (1530), divegnindo o mæximo Gran meistro e fœüdataio titolâ da Pruscia. Mentre questa, secolarizzâ, a s'inandiava a l'indipendença, l'Orde Tœütonnego o stabiliva a so sede a Mergentheim, organizzandose in 12 boiiæghi: Turingia, Aostria, Ascia, Franconnia, Coblença, Arsaççia, Boçan, Utrecht, Alten-Biesen, Loræna, Sassonnia, Vestfalia, tornando a l'attivitæ originaia uspiæa e rivendicando sempre i so driti inta Pruscia. Abolio into 1809 da-o Napolion, o se redusse a Utrecht (dove o divègne protestante, ma o mantègne o so carattere aristocratego) e in Aostria, dove into 1840 o vègne riformao da l'imperatô Ferdinando I, diventando un orde cavagesco ecclexastego nobiliâ, ch'o recedeiva pe l'amiscion œutto groei de nobiltæ, religion cattollica, âto censo: a casa prinçipâ a l'ea a Boçan; l'Orde o g'aiva di compiti uspiæi, e o doveiva mantegnî sempre leste quarantequattro colonne de sanitæ militâ, comme l'Orde Marian co-o quæ o vègne fuso ciu tardi. Co-o 1919 l'Orde o no fu abolio, ma vègne sospeizo a so attivitæ e fun seræ e nommine e i inscriçioin.

Atri progetti

Altri progetti

• Wikimedia Commons

• Wikimedia Commons a contêgne di files in sce Orde Tœütonnego