Intel 4004

Quest articol chì l'è scrivuu in lombard, grafia milanesa.

L'Intel 4004 a l'è staa el primm microprocessor de la storia de l'informatega, progettaa per la Intel del Federico Faggin, leader del progett, del Ted Hoff e del Stanley Mazor, sortii al publegh el 15 de november 1971 e restaa in commercc finna al 1981. In principi doperaa di calcolatris de la Busicom, l'è staa poeu faa 'n accord per doperàll anca in di computer in cambi de 'na riduzion del prezzi di component.

Storia

I computer e i calcolatris elettronich de l'epoca gh'even la CPU fada in component discrett. El team de la Intel el studiava de temp la possibilità de mett la logica in d'on unich chip, ma el resta bloccaa finna al rivà del fisich Federico Faggin, espert di semiconduttor, che l'ha daa 'na svolta al progett, pensaa per la calcolatris elettronega Busicom 141-PF, ispirada a nivell de architettura a la Programma 101, computer de tavol de mità agn '60.

Degià che l'architettura voruda de la Busicom l'avaria domandaa on processor cont 40 pin el team el decid de partì la calcolatris in quatter chip: La ROM (4001), la RAM (4002), i register a scorriment (4003) e 'l processor (4004). A nivell software a l'è staa tutt implementaa 'me macchina a stat finii.

In del 2006 Intel, per i 35 agn del processor, la mett in del publich domini el manual e i progett del processor, el 15 de ottober 2010 Faggin, Hoff e Mazor riceven del Barack Obama la Medaja Nazionala per la Tecnologia e l'Innovazion.

Architettura

El processor el fonzionava a 4 bit e cont on clock de 740 kHz e 'l gh'aveva 16 register general purpose de 4 bit, che pòden operà anca 'me 8 de 8 bit, on accumulator de 4 bit, on program counter de 12 bit e on stack a trii nivell de 12 bit ciascun.

Cont el processor a l'era possibil indirizzà finna a 4096 word de 8 bit 'me ROM e 1280 word de 4 bit per la RAM.

Set di istruzion

El set di istruzion a l'era faa de 46 istruzion, de vun o du bit, che permetteven de spostà di dacc, de fà di operazion de aritmetica, operazion de controll del fluss e de l'I/O. I dacc se podeven indirizzà in manera immediada, diretta o indiretta.

Riferiment

Vos corelaa