Prôteinina

Ny prôteinina dia môlekiola biôlôjika lehibe (makrômôlekiola) hita ao amin' ny selan' ny zavamanana aina rehetra. Pôlimera ny prôteinina, miforona avy amin' ny rojo pôlipeptida iray na maromaro. Ny rojo isanisany dia voaforona avy amin' ny fifandrohian' ny sisa tavela amin' ny asidra misy aminina mifamatotra amin' ny alalan' ny fatorana peptida. Misahana anjara asa maro ao anatin' ny sela sy ny tambatsela ny prôteinina. Izy ireo dia prôteinina enzimatika (enzima) izay mampiakatra ny fihoto ara-tsimia amin' ny famoronanana sy ny fahasimbana ilaina amin' ny metabôlisman' ny sela. Misy prôteinina hafa izay mitana anjara toerana ara-drafitra ao anatin'ny selan' ny taolana na tambatsela (aktinina, kôlazenina), ny sasany dia môlekiola mpanetsika ahafahana mihetsiketsika (miôsinina), ny hafa dia mandray anjara amin' ny fanamafisana ny ADN (histônina), ny fandrindrana ny fanehoana ny fototarazo, ny metabôlisman' ny angovo na koa ny fampitana hafatra amin' ny sela. Singa manan-danja ny prôteinina ao amin'ny sakafom-biby, rava ao amin' ny taovam-pandevonan-kanina ny prôteinina ary ny asidra aminina mivoaka dia trohin' ny tsinaikely ary avy eo ampiasain' ny vatana.