اوت ۲۰۱۵
دچی‌ین
۱
- شایعه بیّه که جلال‌الدین حقانی که حقانی گروه ِرهبر بی‌یه هم خله وقته که بمرده. ونه خانواده دله بعضی این خَوِر ره تکذیب کانّه و بعضی دیگه وه ره تأیید کانّه. چن وقت پیش تاسا گاتِنه وه مریض هسته و همینسه گروه ره ونه گتِ ریکا رهبری کانده. (بی‌بی‌سی)
- ترکیه تا امرور حدود ۲۶۰ نفر که کوردستون کارگرون حزب (پکک) دله دَیینه ره عراق کوردستون دله بَکاشته و نزدیک چارصد نفر هم مجروح بَیینه که صلاح‌الدین دمیرتاش ِبرار هم این مجروحین ِمیون دَره. (یاهو)
- زمستونی المپیک میزبانی ره سال 2022 وسّه پکن بدست بیارده. (عربی ویکی‌پدیا)
- اتا فلسطینی چِلیک ره اسرائیلیون بَکاشتنه که خله اعتراضات ره راس هاکرده و حتی بان کی مون ونه وسّه بیانیه هِدائه. (عربی ویکی‌خَور)
- محققون اتا جدید آمپول بساتنه که آبولا ره حتمی خار کانده. (یورونیوز)
- اتا شخصی بالون که بن لادن ِخانواده‌‌یِ بی‌یه، میلان جه دَرشی‌یه بریتانیا که بِنه دَکته و ونه چارتا سرنشین بَمردنه. (یورونیوز)
دچی‌ین
۲
- پکک اتا انفجاری حمله جه اتا ژاندارمری دَم دِتا ترکیه‌یی سرباز ره بَکاشته. این حمله آگری ِمنطقه دله، که ایران ِسامون وَر هسته، اتفاق دَکِته.
- پکک و ترکیه هِدی ره متهم کانّه که صلحنومه ره بشکِنینه و هر دِتا گانّه ونه شه جه دفاع هاکِنِن و انتقامی حمله این مسئله وسّه هسته. پکک بائوته ترکی بالون‌ها (=هواپیمائون) چنتا غیرنظامی ره عراق کوردستون دله بَکاشتنه.
- مسعود بارزانی، عراق ِکوردستون ِرییس‌جمهور، غیرنظامیون ِبمردن ره محکوم هاکرده و پکک جه بخاسته عراق جه بریم بوره تا باعث نَواشه این منطقه‌یِ غیرنظامیون آسیب بَوینِن. این گپ عراقی کوردها میون خله مخالف پیدا هاکرده. منتقدون گانّه بارزانی خله شه منطقه‌یِ اقتصاد ره ترکیه جه وابسته هاکرده و همینسه اسا نَتونده حقیقت ره پِشتی هاکنه و مجبوره ترکیه پشت هِرِسته. (یورونیوز و بی‌بی‌سی)
- متحده ایالات آمریکا دله خلیل جبران ِاتا انیمیشنی فیلم، که ونه نوم پرافت (Kahlil Gibran's The Prophet) هسته، ره اکران هاکردنه. راجر آلرز این فیلم ِکارگردان هسته. (یورونیوز)
- اتا عربستونی مَردی نجران ِشهر دله یمنی حوثیون دَس بَکاشته بیّه. (العربیه)
- گانّه مالزیایی بالون ِدومین تیکه هم رئونیون ِجزیره دله پیدا بیّه. (بی‌بی‌سی)
دچی‌ین
۳
- سوریه دله‌یی جنگ سَره:
- کوردستون اقلیم ِاوضاع:
- میهنی اتحادیه‌ِ اتا گتِ عضو مسعود بارزانی جه روژاوایِ مردمون پَلی انتقاد هاکرده و بائوته پکک اَمه میهمان نی‌یه و تموم کوردهایی که شه حقوق ره بدست بیاردِن وسّه جنگ کانّه، اقلیم ِشهروند هستنه. (کوردپرس)
- سلیمانیه و اربیل دله پکک طرفدارون تظاهرات هاکردنه و کوردستون دموکرات حزب ره بَد و بی‌راه بائوتنه. (کوردپرس)
- یونان ِبورس پنج هفته تعطیلی په باز بیّه و اتخله سقوط هاکرده. (هات‌ست)
دچی‌ین
۴
- آرتور ماس، کاتالونیایِ رییس‌جمهور، این منطقه‌یِ پارلمون ره رِقِد بِدا و بائوته خانه پارلمون وسّه ۲۷ سپتامیر ۲۰۱۵ اتا زودبَرِسی انتخابات بی‌یله. وه اتا استقلال‌طلب و سِواخا (=تجزیه‌طلب) هسته و ونه مذاکرات ایسپانیا دولِت جه نتیجه نِدائه، همینسه اسا خانه اتا جدید پارلمون بسازه تا اگه مطلق ِاکثریت ره بدست بیاره و بتونه بی‌اونکه لازم بائه مرکزی دولِتِ نظر ره بخائه، تیناری اتا رفراندوم استقلال بَیّن یا نَیِّن وسّه بی‌یله. (یورونیوز)
- آسئان ِسران کوالالامپور دله جمع بَیینه تا چین جنوبی دریا خَوری گپ بَزنِن و مذاکره هاکِنِن. (یورونیوز)
- کرواسی دله مردِم شه کشور ِسِوا بَیّن ِبیستمین سالگرد ره برگزار هاکردنه. ۱۹۹۱ کروات‌ها یوگوسلاوی جه سِوا بَیینه. صربستون دله هم این روز ره عذاداری کانّه چون کرواسی ِاستقلال روز سَره کرواتون چن‌صدتا صرب ره بَکاشتنه. (یورونیوز)
دچی‌ین
۵
دچی‌ین
۶
- جان کری که آسئان ِاجلاس دله دَره، چین جنوبی دریایِ قضیه سره چینی مقامات ره هشدار هِدائه و بائوته که آمریکا هیچ محدودیتی ره این منطقه‌یِ عبور-مرور وسّه قبول نکانده. (یورونیوز)
- محققون بائوتنه تیکه فلزاتی که رئونیون دله پیدا بیّه مالزی ِگوم‌بَیی بالون ِشِنه. وشون چنتا تیکه دیگه ره هم این بالون جه پیدا هاکردنه. (یورونیوز)
- افغانستون دله اتا انتحاری بمب هشت نفر ره بَکاشته و دِوازّه نفر زخمی بَیینه. این حمله لوگر ولایت دله اتفاق دَکِته. (ای‌بی‌سی)
دچی‌ین
۷
- پژاک، که پکک ِایرانی چلّه هسته، چنتا پاسگا ره ایران کوردستون دله حمله هاکرده و اینتی که شه باتنه، بیست-سی‌تا سرباز ره هم بکاشتنه. پژاک گانه این حملات انتقامی بینه چون ایران آتش‌بس ره بشکسته. وشون چن وقت پیش هم ایرانی قطارون ره ترکیه دله حمله کاردنه و تازگی هم اتا اتوبوس ره که ایران جه شی‌یه ترکیه، حمله هاکردنه و اتا مسافر ره بَکاشتنه. سپاه پژاک ِبائوته ره تکذیب هاکرده و گانه هِچکی پاسگایِ حملات دله نمردنه. (فارسی بی‌بی‌سی)
دچی‌ین
۱۱
- آمریکایِ فرگوسن ِشهر دله سیوپوستون پولیس جه درگیر بَیینه و ات نفر هم درگیری دله بمرده. این شهر دله اسا فوق‌العاده وضعیت اعلام بیّه. (یورونیوز)
- عراق ِپارلمون اتا طرح که حیدر العبادی هِدا بی‌یه ره تصویب هاکرده. این طرح گانه بعضی مشاورون و معاونین که خله کار نَکانّه ره ونه اخراج هاکِنِن. (اروپایِ آزادِ رادیو)
- جاپون دله اتمی تأسیسات ره یگ سال په دِباره وا هاکردنه. سال پیش اتا زلزله په این تأسیسات آسیب بَدی‌بینه که همینسه تموم تأسیسات ره دَوِستنه ولی اسا دِباره شینزو آبه دستور په اونان ره وا کانّه تا برق ِتأمین وسّه وشون جه استفاده هاکنِن. (سی‌ان‌ان)
- اشرف غنی احمد زی، افغانستون ِرییس‌جمهور، اتا سخنرانی دله بائوته پاکستون جه جنگ‌خائونه پیغوم رِسِنه. وه پاکستون ره متهم هاکرده که این کشور دله بمب بساتن و انتحاری حمله‌یِ آموزشگائون وجود دانّه که تروریستون ره پرورش دِنّه. وه تهدید هاکرده که دِتا کشور ِروابط ره قطع کانده. (الف)
دچی‌ین
۱۳
- کوردستون اقلیم دله گانّه که داعش شیمیایی سلاحون جه پیش‌مرگون دیم‌به‌دیم استفاده هاکرده. (یورونیوز)
- بغداد ِسبزی‌روشون ِبازار دله اتا کامیون منفجر بیّه که نزدیک هشتاد نفر بمردنه و دویست نفر زخمی بَیینه. این انفجار ره داعش انجام هِدائه و صدر ِشهرک نزدیکی اتفاق دَکِته. (یورونیوز)
- چین ِتیانجین ِشهر دله اتا انفجار باعث بیّه نزدیک چـِل نفر بمیرِن. این انفجار اتا صنعتی منطقه دله بی‌یه. (یورونیوز)
- میونی آفریقا دله متحد ملل سازمان ِصلح‌بان ِنیروهایِ رییس اتا کیجایِ بگائستن په استعفا هِدائه. بان کی مون این مسئله جه شدیداً انتقاد هاکرده. (یورونیوز)
دچی‌ین
۱۵
- احمد الاسیر، که اتا لبنانی مِلّا بی‌یه و سلفی‌کَری ره ترویج کارده، دستگیر بیّه. گانّه که وه خاسته بوره نیجریه و بوکوحرام ِهمراهی ره هاکنه. (عربی ویکی‌پدیا)
دچی‌ین
۱۶
- اتا بالون که اندونزی ِپاپوآ منطقه دله پرواز کارده، چـِل و پنج دَقه پرواز په، بِنه بَییته و ونه تموم آدِمون بَمردنه. اندونزی ِپُست ِاداره گانه حدود نیم میلیون دلار این بالون دله دَیّه که فقیرون ِاوضاع وسّه وه ره خاستنه خرج هاکِنِن. (انگلیسی ویکی‌پدیا)
دچی‌ین
۱۷
- تایلند ِبانکوک ِشهر دله اتا تروریستی انفجار سَره اتا بودایی معبد ِنزدیکی اتخله آدِم بمردنه. بمب اتا ماشین دله دَیّه که بترکسته. اتا سیاسی مقام گاته اینتی انفجارون ِانگیزه این هسته که توریسم ِوضع ره تایلند دله خِراب هاکِنن. (انگلیسی ویکی‌پدیا)
- هِوایِ گرم بی‌ین باعث بیّه نزدیک صد نفر مصر دله بمیرن (الجزیره)
- سری لانکا دله پارلمونی انتخابات شروع بیّه. (بی‌بی‌سی)
دچی‌ین
۱۸
- اندونزیایی بالون ِمسافرون ِجسد ره پیدا هاکردنه. تموم ۵۴ نفر ِجسد دره و هچکی زنده نموندسته. (نیویورک تایمز و یورونیوز)
- جنوبی سودان ِرییس‌جمهور حاضر نیّه صلحنومه ره امضا هاکنه. آدیس آبابا دله اتسری مذاکره په وه شه مخالفون جه اتا صلحنومه بنویشته ولی حاضر نیّه وه ره امضا هاکنه و بائوته اتکه وقت خانه. بعضی کشورون بائوتنه اگه دِ طرف جنوبی سودان دله توافق نَکانِن، این کشور ره تحریم کانّه. (یورونیوز)
دچی‌ین
۲۴
- خلق مدافعون یگان، اولین بار وسّه، داعش جه اسیر عوض هاکرده. این جریان دله اتا عربی قبیله میونجی‌کری په، سه‌تا داعشی عوض ِسه‌تا کورد ِگریلا آزاد بَیینه. (کوردپرس)
- لبنان دله شورش بستا بیّه. شورشیون که گاتِنه آشغال‌هایِ پـِرتوش جه خسته بَیینه، دولِتی نیروئون جه درگیر بَیی‌بینه. وشون وقتی تمام سلام تهدید هاکرده که استعفا دِنه، بستا بَیینه. (یورونیوز)
دچی‌ین
۲۵
دچی‌ین
۲۶
- فیروزکوه دله اتا زلزله بموئه که ۴.۶ ریشتر بی‌یه ولی خسارتی نداشته. این زلزله چنتا پچوک پس‌لرزه هم داشته. (تی‌آرتی)
- باراک اوباما اتا سخنرانی سَره برجام ِمخالفون ره دیوانه بخوندسته. (پرس تی‌وی)
- ترکیه دله آک پارتی بائوته که خانه موقتی دولت تشکیل هاده تا پارلمونی انتخابات تجدید بَواشه. این موقتی کابینه دله آک پارتی یازّه‌تا، جمهوری‌خاه خلق حزب پنج‌تا و دموکراتیک مناطق حزب و ملی حرکت حزب هرکامین سه‌تا وزیر ونه دارن. (تی‌آرتی)
- پنج‌تا ارمنی سرباز ارمنستون-آذربایجون ِسامون دله بمردنه. وشون ره آذری سربازون بَکاشتنه و گانّه که اونان سامون ره یور بموبینه. هشت‌تا ارمنی سرباز هم زخمی بَیینه و سه‌تا آذری سرباز ره هم ترکش بخارده. (تی‌آرتی)
دچی‌ین
۲۷
- کلمبیا و ونزوئلایِ دولِتون هِدی جه دَکِتنه. ونزوئلایِ رییس‌جمهور بائوته که کلمبیاییون شه سامون ره مُخبر نینه و یـِلنه راحت قاچاقچیون سامون جه رد بَواشِن. همینسه ونزوئلایِ رییس‌جمهور شیشصد و شصت نفر کلمبیایی ره شه کشور جه دَر هاکرده. کلمبیایِ رییس‌جمهور هم ونجه بخاسته آرامش و صلح جه مسئله ره حل هاکِنِن و ویشته هِدی ره احترام بی‌یلِن. ونزوئلا همیشه کلمبیا ره شه دِشمن دونده و گانه که وشون خانّه بولیواری حکومتون ره رِقِد هادِن و کاپیتالیسم ِطرفدار هستنه. (یورونیوز)
- جنوبی سودان دله رییس‌جمهور حاضر بیّه اتا صلحنومه ره مخالفون جه امضا هاکنه که این کشور ِدله‌یی (=داخلی) جنگ ره تموم کانده. (دولت‌بهار)
- عربستون ِارتش زمینی راه جه صعده دله وارد بیّه. (تی‌آرتی)
دچی‌ین
۲۸
- کشمیر دله اتا درگیری سره ۸ نفر بمردنه و ۷۰ نفر مجروح بَیینه. هند و پاکستون هِدی ره متهم کانّه که این درگیری ِباعِث بینه. (تی‌آرتی)
- یوسف‌رضا گیلانی، پاکستون ِسابق نخست‌وزیر، رشوه‌خاری و فساد ِاتهام جه کراچی ِدادگاه دله محکوم و بازداشت بیّه. (تی‌آرتی)
- در حالی که اتمی انرژی ِآژانس بائوت بی‌یه ایران ِبعضی کارون پارچین دله مشکوک هستنه، متحده ایالات آمریکایِ خارجه وزیر بائوته که این منطقه نظامی ولی غیرهسته‌ای هسته و فعلاً هچّی که هسته‌ای انرژی ره ربط داره، اونجه پیدا نَوانه. (پرس تی‌وی)
- استامبول دله پکک ِطرفدارون راهپیمایی هاکردنه و پلیس جه درگیر بَیینه. هفت‌تا غیرنظامی این درگیر دله بمردنه که اتا هفت‌ساله وَچه هم وشون جمع دَیی‌یه. پکک طرفدارون این درگیری دله کوکتل مولوتوف و ترقه جه پلیس ره حمله هاکردنه و راهون ره بند بیاردنه. (پرس تی‌وی)
دچی‌ین
۲۹
اسایی دکته‌ئون تلمبار