Cidade Velha
Cidade Velha (fröher Ribeira Grande) is de öllste Oort un ehmolige Hööftstadt vun Kap Verde. Se liggt op dat Eiland Santiago un tellt hüüt knappe 2.000 Inwahners.
Historie
[ännern | Bornkood ännern]De hüütige Stadt weer 1462 ünner den Naam Ribeira Grande (port.: „groot Daal“) dör António da Noli as eerste Wahnsteed op de Kapverdischen Eilannen inricht. Dormit weer se to lieken Tiet ok de eerste stännige europääsche Ansiedeln in de Tropen. De eersten Inwahners weern vun dat Eiland Madeira anworven. Mit de Tiet weern jümmer mehr Lüüd to’n Arbeiten bruukt, wieldat de Tall vun de Siedlers nich utreken de, üm ut den Oort to de weertschoppliche Produktschoonssteed to maken, as dat plaant weer. Dorto weern Slaven ut Afrika op de Eilannen brocht.
1466 weer op den Oort dat königlich Monopol op den Slavenhannel överdragen, de dorophen gau an Bedüden wunnen hett. De Slaven harr man tomeist ut Guinea-Bissau vun’n Stamm vun de Fula hollt, wietere Slaven stammen ut Sierra Leone, Gambia, Guinea un den Senegal. Vun den Oort ut weern Slaven in de Karibik un na Brasilien verschippt. Dat grote Daal vun Ribeira Grande mit sien pielen Wannen weer dorbi as en natürlich Gefängnis bruukt. In de Kark weern de Slaven dööpt, dat hett den Pries bi’n Verkoop höger dreven.
De Slaven weern op de Eilannen Santiago un Fogo in de Landweertschap insett, üm den ut de USA inföhrten Mais antoboen, Zegenfleesch in Solt to maken oder den kapverdischen Zuckerrohrkööm Grogue hertostellen.[1] 1532 weer de Oort to’n Bischopsseet un af 1572 dröff se sik Stadt (port.: „Cidade“) nömen. De Stadt weer 1497 vun Vasco da Gama un 1498 vun Christoph Kolumbus wiel jemehr Opdeckreisen anlopen. Later, 1585 un 1586 weer Cidade tweemol vun Sir Francis Drake överfallen.
Över dat Eiland Santiago schüllt mehrere Teindusend Slaven verköfft worrn wesen, man nipp un nau weet keen Minsch, woveel dat wirklich weern.[1] De grote Bedüden vun Riberira Grande güng denn aver 1645 op’n Slag verloren, as dör en königlich Dekret dat Hannelsmonopol vun de Adligen in de Stadt wegnahmen weer. De Slavenmarkt bröök dorophen gau tosamen un weer bald dorna dicht maakt. Dat endgellig End as Versorgungshaven un Zentrum vun’n Slavenhannel keem 1712, as de Stadt dör den Franzosen Jaques Cassart plünnert un tonicht maakt weer.
Hüüt is Cidade Velha (port.: „olle Stadt“) en lütt Fischerdörp un en vun de wenigen touristisch intressanten Öörd op Santigao. Dat ehmolig Daal, dat vör de Slaven en Gefängnis weer, warrt vundaag landweertschaplich nütt to’n Anbo vun Zuckerrohr, Kokosnööt un Mangos.
Wat en sik ankieken kann
[ännern | Bornkood ännern]
Dat Middelöller hett in Cidade Velha bit vundaag överleeft. Mit Ünnerstütten vun de Spanier sünd vele olle Hüüs un Steden vun de Stadt wedder opboot un restaureert worrn, eenige dorvun sünd nu as Bodenkmols schuult.
De Pelourinho (Pranger) ut dat Johr 1512 steiht in de Mitt vun den ehmoligen Marktplatz för den Slavenhannel un helpt ok vundaag noch an de Historie vun de Stadt Ribeira Grande to denken. As dormols speelt sik hier ok hüüt wedder da apentlich Leven af, man ganz anners as in fröhere Tieten.
Ut dat Johr 1495 stammt de Rosenkranzkark „Igreja Nossa Senhora do Rosário“, de vundaag as normale Kark nütt warrt. Se is en vun de öllsten Bowarken vun de Kap Verden, de bit vundaag noch erhollen sünd. Neven de Kark kann man ok noch de Ruinen vun de Kark un den Konvent vun São Francisco un de Ruinen vun de Kathedral bekieken. De Konvent weer fröher mol en Priesterseminar un Franziskanerkloster.
Baven över de Stadt op de Flank vun’t Daal weer 1587 mit den Bo vun dat Fortaleza Real de São Filipe anfungen. De Inrichten vun de Fasten weer nödig worrn, wiel jümmer fakener Piraten de Stadt angrepen harrn.
2004 is Cidade Velha för de List vun’t UNESCO Weltkulturarv vörslahn woorn.[2]
Borns
[ännern | Bornkood ännern]- ↑ a b Kapverdische Inseln, Dumont Reisetaschenbuch, 3. Oplaag, 2007, ISBN 978-3-7701-5968-0
- ↑ Beschrieven för de UNESCO Vörslaglist (frz.)
Weblenken
[ännern | Bornkood ännern]
Koordinaten:14° 55′ N, 23° 36′ W