Die Halbstarken
Dit Woort hett noch annere Bedüden: kiek dorför ünner Die Halbstarken (1996).
| Filmdaten | |
|---|---|
| Plattdüütsch Titel: | — |
| Originaltitel: | Die Halbstarken |
| Düütsch Titel: | Die Halbstarken |
| Produkschoonsland: | Düütschland |
| Johr vun’t Rutkamen: | 1956 |
| Läng: | 92 Minuten |
| Originalspraak: | Düütsch |
| Öllersfreegaav in Düütschland: | FSK 16 |
| Filmkru | |
| Speelbaas: | Georg Tressler |
| Dreihbook: | Will Tremper Georg Tressler |
| Produkschoon: | Wenzel Lüdecke för Inter West Film GmbH |
| Musik: | Martin Böttcher |
| Kamera: | Heinz Pehlke |
| Snitt: | Wolfgang Flaum |
| Szenenbild: | Lothar Wloch |
| Dorstellers | |
| |
Die Halbstarken (op plattdüütsch so veel as: „De Halfstarken“) is de Titel vun en düütsch Filmdrama ut dat Johr 1956. Dat Dreihbook weer vun Will Tremper un Georg Tressler un baseer op en Vertellsel vun Will Tremper. Georg Tressler weer Speelbaas vun de Produkschoon. De Film is in’n Juli un August 1956 in West-Berlin dreiht worrn. Premiere harr he dat glieke Johr an’n 27. September in’n Ufa-Palast in Essen.
Inholt
[ännern | Bornkood ännern]En Bande vun halfstarke junge Lüüd versammelt sik in en Hallenbad, üm to kieken, wat jemehr Armbandklocken waterdicht sünd. Dat Seggen hett de 19-johrige Freddy Borchert, de in dat Swemmbad sien Broder Jan drapen deit. Den hett he länger nich mehr sehn, vunwegen dat Freddy na en Striet mit sien Vadder al vör längere Tiet dat Öllernhuus verlaten hett. Freddy is tosamen mit de 16-johrige Sissy, de sööt is, man jüst so ok ahn Geweten. So hett ok se keen go’en Influss op den jungen, de wegen sien Situatschoon tohuus al so opsternatsch is. Dat Drapen mit sien Broder ennt wegen Freddy sien provokativ Verhollen dormit, dat se Striet mit den Baadmeester kriegt un opletzt utneihn mööt. Jan versteiht de Tosamenhäng nich, freit sik aver, dat he sien Broder drapen hett un dat ut em – schienbor – wat worrn is.
As he tohuus wedder mol mitankieken mutt, woans sien Öllern sik strieten doot, söcht he Kuntakt to Freddy. Jan meent, dat de finanzielle Noot vun sien Vadder de Grund för de Strieteree is, un beslutt Freddy to na 3.000 Mark fragen. Freddy hett nix dorgegen, stellt aver de Bedingen, dat Jan bi sien nächsten Coup mitmaken mutt. Man, he vertellt em nich, worüm dat geiht.
Freddy föhrt sien Bande mit harde Hand: all mööt doon, wat he jem vertellt. Insaag lett he nich gellen. Klaus to’n Bispeel, de in en italieensche Bar arbeiden deit, will to’n Bispeel nich an de nächste Akschoon deelnehmen, vunwegen dat he bi de Arbeit bruukt warrt un he sien Steed nich verleren will. Man, de annern Jungs luert em op un haut em, bit he mitkamen deit. En Auto hebbt sik de Halfstarken eerstmol driest klaut, denn sammelt sik de Bande un drinkt sik Moot an. Üm sien Macht to bewiesen drauht Freddy Klaus dor mit en scharpe Pistool un schütt blangen sien Kopp in’n Footbodden.
Freddy sien Plaan is en Postroov. De Bande hollt en Postauto an un slaht de Fohrers tosamen. De Büüt (Postsäck un en Kasett) bringt se in Kudde sien Wäsche-Transporter ünner. As jem en Auto fehlt, maakt Jan sik op’n Weg na de Tanksteed, woneem Freddy arbeit, un holt sik ünner en Vörwand den Buick, den Freddy köpen will – wat later op jemehr Spoor föhrt. Twee vun de Jungs hebbt bito ok noch en Unfall mit dat Postauto, künnt aver wieterföhren. Bi all de Stümperhaftigkeit, kummt de Bande liekers bi en Bootshuus an, woneem Sissy al mit anndere Deern en Party vörbereit hett. De Luun sleiht gau üm, as kloor warrt, dat in de Kasett keen Geld in is, man blots Postanwiesen ahn Weert. Dormit hett Freddy vör sien Mackers nu sien Gesicht verloren, so dat se gegen em angaht. Jan geiht dortwüschen un kann de Lüüd noch mol beswichten.
In de Situatschoon wiest sik nu jüst Sissy as Deern ahn Rücksicht. Se sleiht Jan vör, in de Villa vun den Besitter vun de italieensche „Bar Garezzo“ intobreken, de dorvun aver nix weten will. Also wennt se sik wedder Freddy to, de den Infall glieks annehmen deit un mit dem Rest vun sien Bande losföhrt, nadem he sien Broder Jan daalslahn hett, as de sik em in’n Weg stellen wull. Jan föhrt em achteran. In de Villa finnt he aver nich blots Freddy un Sissy vör, man ok den Vadder vun Garezzo, de jüst över Telefon de Polizei Bescheed geven will. Sissy versöcht Freddy dorto to bringen, dat he den Ollen mit sien Pistool afknallt, man Freddy bringt dat nich över’t Hart. Sissy grippt sik de Pistool, schütt toeerst op den Ollen un den ok Freddy in den Buuk. Jüst denn kummt Vadder Borchert mit de Polizei an de Villa an un sütt dor sien Söhnen ut de Villa kamen. Freddy warrt fastnahmen.
Kritiken
[ännern | Bornkood ännern]- Dat Lexikon vun’n internatschonalen Film meen, dat de Film dör dat miliökunnige Dreihbook vun den Journalist Tremper un de akkerate Regie- un Kameraarbeit de tietgenöss’schen Produkschonen överdrapen de.[1]
- Thomas Kramer schreev in’t Lexikon vun’n düütschen Film, dat de Film sik anregt dör spoodrieke amerikaansche Vörbiller as Rebel Without A Cause dör Opnahmen an originale Schauplätz un dat Dorstellen vun’t Verhollen vun de jungen Lüüd ahn Kompromiss utteken de. Keen vun de lateren Imitatschonen keem an den Eernst un de Gööd vun den Film ran, de sien Spood ok bit dorhen unbekannte Schauspelers as Karin Baal to verdanken harr.[2]
- Die Zeit vun’n 29. November 1956 oordeel, dat de Geschicht nich de wohre Bedüden vun den Titel weddergift. Man de Typen weern goot tekent – wobi sünners Buchholz rutragen de – un de realistische Regie düüt veel vun den egentlichen Grund vun’t Problem an.[3]
Utteken
[ännern | Bornkood ännern]De Film weer in’t Johr 1957 in dree Kategorien för den Düütschen Filmpries vörslahn. Georg Tressler is dorbi mit den Filmpries in Sülver as Best Nawassspeelbaas ehrt worrn. Horst Buchholz un Karin Baal weern beide as Beste Hööftdorstellers nomineert, künnen sik aver nich gegen de Konkurrenz dörsetten.
Anners wat
[ännern | Bornkood ännern]Karin Baal harr sik för den Film tosamen mit 700 annere Deerns anstellt. Se kreeg de Hööftrull un en dreejohrigen Verdrag för en Utbilln. Vele vun de jungen Dorstellers harrn noch nie vör en Kamera stahn un weern later vun professchonelle Schauspelers nasynchroniseert. So weern to’n Bispeel Baal vun Brigitte Grothum un Gaffkus vun Lutz Moik snackt.
De Soundtrack to den Film to den Film weer vun Martin Böttcher mit Mister Martins Band inspeelt, to de Horst Fischer, Fatty George, Ernst Mosch, Werner Baumgart, Gerald Weinkopf, Cornelis op ten Zieken, Werner Twardy, Bill Grah, James Last, Siegfried Enderlein un Ralph Ahrens höörn deen.[4] Bi de jungen Lüüd, de sik in de dorstellten Jungs wedderkennen deen, is de Film gau to en Kultfilm worrn. Mehrmols hebbt Halfstarke na de Vörföhren in de Kinos Schandaal maakt.
In de USA weer de Film ünner den Titel Teenage Wolfpack wiest. Horst Buchholz weer in’n Vörspann vun de US-amerikaansche Faten as Henry Bookholt ankünnigt. 1996 is en düütsch Remake ünner den glieken Titel mit Til Schweiger in de Hööftrull rutkamen.
Literatur
[ännern | Bornkood ännern]- Christa Bandmann un Joe Hembus: Klassiker des deutschen Tonfilms 1930–1960. München 1980, Siet 175–176.
- Robert Buchschwenter/Lukas Maurer (Rutgever): HALBSTARK. Georg Tressler: Zwischen Auftrag und Autor. Filmarchiv Austria, Wien 2003, ISBN 3-901932-16-X.
- Düütsch Filmmuseum Frankfort an’n Main: Zwischen Gestern und Morgen. Westdeutscher Nachkriegsfilm 1946–1963. Frankfort an’n Main 1989, Siet 387.
- Norbert Grob: „Es gibt keine bessere Kulisse als die Straße …“ Berlin-Filme von Gerhard Oswald und Georg Tressler in den fünfziger Jahren. In: Zwischen Gestern und Morgen. Westdeutscher Nachkriegsfilm 1946–1963. Frankfort an’n Main 1989, Siet 206–222.
- Will Tremper: Die Halbstarken. Ein packender Zeitroman. Mit tallrieke Biller, Uttöög ut dat Dreihbook un en Vörwoort vun de Rutgevers (E-Book) Kassel: MEDIA Net-Edition 2012. ISBN 978-3-939988-13-7 (E-Pub/Mobi); ISBN 978-3-939988-14-4 (PDF).
- Will Tremper: Die Halbstarken. Ein packender Zeitroman. (Höörbook) Kassel: MEDIA Net-Edition 2012. ISBN 978-3-939988-12-0.
- Will Temper (sic): Die Halbstarken. Der bunte Toxi-Film-Roman Nr. 1. Langhelm, Hannober 1957, S. 54.
Borns
[ännern | Bornkood ännern]- ↑ Filmkritik in’t Lexikon vun’n internatschonalen Film
- ↑ Thomas Kramer: Lexikon des deutschen Films, Seite 131
- ↑ Neu und sehenswert. In: Die Zeit, Nr. 48/1956
- ↑ Vgl. Label der Columbia EP SEGW 21-7819: Filmmusik Die Halbstarken: Originalmusik ut den glieknöömten Interwest Union Film
Weblenken
[ännern | Bornkood ännern]- Die Halbstarken in de Internet Movie Database (engelsch)