Liefegenschop

Liefegenschop is dat, wenn dat Lief vun en Minschen as Egendom vun den Herrn (Landherrn, Herrscher) vun en bestimmt Rebeet ankeken warrt. Dat is en Form vun Hörigkeit, de nich wiet af is vun de Slaveree. In dat Middelöller hett dat in Europa veel Liefegenschop geven. De Unnerscheed to de Slaveree is sunnerlich, dat Liefegene en Familie grünnen dröffen (wat bi de Slaven lang nich jummers mööglich weer), dat se up en Stück Land Anbo drieven dröffen, dormit ehre Familie wat to eten harrt hett, un dat se nich ohn ehre Familie un ohn ehr Land eenfach verköfft weern konnen.

De verscheden Formen vun Unfreeheit könnt nich jummers goot ut’neenholen weern. Pachteree, share croppin, peonage, Schuldslaveree, Höörigkeit, Liefegenschop un Slaveree fleet in'nanner över. Ok is dat nich so, dat grötter Unfreeheit up jeden Fall grötter Elend bedutt, un relatiev mehr Freeheit denn ok mehr Weeldage. Veel Slaven sünd relatiev goot spiest un kleedt wurrn, wieldes veel Pächters, wenn ehre Ackers man minne weern un de Pachten hooch, in bitter Armoot leven döen.

Ok is dat so, dat de formalen Rechte faken nich veel seggt. De formale Rechtslage vun en Buern in en sunnerliche Sellschop kann relatiev goot ween, man wenn sien Landherr togliek de öörtliche Richter is, denn hett de Buer man minne Mööglichkeiten, sien Recht ok to kriegen.