Mai
Dit Woort hett noch annere Bedüden: kiek dorför ünner Mai (Mehrdüdig Begreep).
Januar | Februar | März | April | Mai | Juni | Juli | August | September | Oktober | November | Dezember
De Mai, ok as Maimaand bekannt, is in den Gregoriaanschen Klenner de föffte Maand in dat Johr. He hett 31 Daag un tellt to de Fröhjohrsmaanden. De Naam is vun de Göddin Maia afleidt. Aver dat gifft ok annere Borns, de seggt, dat de Naam vun Jupiter kummt, de dat Wassdom bringt as Iupiter Maius.
In’n 8. Johrhunnert hett Karl de Grote den Naam Wonnemonat (d. h. „Wäälmaand“) inföhrt as Henwies op de opkamen Warms un dat Opwaken von de Natur. Annere Beteken för den Mai gaht ok op disse Saken trüch. Blumenmonat (d. h. „Blomenmaand“) t. B. wiel dat för bannig veel Planten de Hööftbleihtiet is. Aver kannst ok Weidmaand to seggen, as denn dat Veh op de Weid dreven warrt. Seker is de Warms aver – na en oole Överlevern – na de Ieshilligen vun’n 11. bit 15. Mai.
Siet ungefäähr den 13. Johrhunnert warrt de Mai mit Fiern, Utritt oder Ümgäng begahn. In veele Rebeeten in Düütschland is dat Opstellen von Maibööm Bruukdom worrn.
Vörmals, in’n röömschen Klenner, weer de Mai de drüdde Maand in dat Johr. Bi de Katholiken is de Mai sünners Maria de Mudder vun Jesus tostahn (Maiandacht)en. Dorüm warrt de Mai in dit Ümfeld ok Marienmaand nöömt.
De 1. Mai is de internatschoonal Fierdag von de Arbeiderbewegen, wat in Düütschland en gesettlich Fiersag is. De tweete Sünndag in’n Mai is in düütschsprakig Länners de Mudderdag.
De Mai fangt mit den lieken Wekendag an, as de Januar vun’t nächst Johr, man keen annern Maand vun’t sülve Johr fangt mit den lieken Dag an as de Mai.