Nanak
Guru Nanak (गुरु नानक) (* 1469; † 1538) weer en indische Hillige un de Grünner vun den Sikh-Religion. Nanak weer in't Dörp Talwandi (vundaag Nankana Sahib in Pakistan) boren. Sien Öllern weern Hindus, un he höör to de Kaste vun de Hannelslü. Al as en Jung weer he heel weg vun Religion, un sien Drang, de Geheemnissen vun't Leven natoforschenen, bröch em dorto, dat Huus vun sien Öllern to verlaten. Na de Wies vun de Hindu-Hilligen wanner he dör't hele Indien.
Nanak seeg sik sülven as en Schöler vun Gott. He betoon in sien Schriften (opschreven in't Guru Granth Sahib) ümmer wedder, dat he blots en Dener un Schöler vun Gott is. Nanak hett sik na sien egen Woort nienich as de Schüler vun en minschlich Lehrer sehn.
Na welke Johr vun't Wannern fung Nanak an to lehren. He predig vör Jain- un Hindu-Tempeln un vör muslimische Moscheen un trock dorbi en grote Tall vun Sikhs (Schölers) an. He glööv, dat Religion de Minschen verbinnen schall. Obers he mark, dat se de Minschen gegenenanner ophiss. Sünners beduer he den Haat vun Hindus un Muslimen, un sien Enn op Levenstied weer dat, de twee Religionen to en Eenheit to verbinnen. En bekannt Zitat vun Nanak is "Dat gifft kene Hindus, dat gifft kene Muslime, dat gifft blots Scheppsels vun Gott."
Nanak weer gegen dat Kastensystem. Sien Anhänger nööm em Guru (Lehrer). Vör sien Dood nööm he Guru Angad sien Nahfölger un de Baas vun sien Gemeenschop.