Steenau (Land Hadeln)

Wapen/Flagg	Koort
Basisdaten
Bundsland: Neddersassen Landkreis: Cuxhoben Samtgemeen: Land Hadeln Gemeen: Steenau
Inwahners:
Postleettall:	21775
Vörwahl:	04756
Geograafsche Laag:	53° 41′ N, 8° 53′ O

Steenau (hoochdüütsch Steinau) is en Oort in de Gemeen Steenau (Samtgemeen Land Hadeln) in’n Landkreis Cuxhoben, Neddersassen.

Steenau in’n engeren Sinn betekent de Oortsdelen Lauendeel un Glind un dat Süderenn un Noorderenn. In’n wiederen Sinn warrt aver ok de Öörd Westersied, Ooldbachenbrook, Möhdiek un Höörn to Steenau tellt. In düssen wiederen Sinn billt Steenau de Gemeen Steenau un dat Kaspel Steenau.

Dat Zentrum von Steenau mit de Kark liggt in’n Oortsdeel Lauendeel.

Geografie

De Oort liggt in dat Siedland von Hadeln. Dat Water ut dat Rebeed warrt över Gravens un Wettern na de Au, de Gösch un den Haadler Kanaal hen afföhrt.

De Naveröörd sünd Mehmstood un Stroodiek in’n Noorden, Mislag in’n Noordoosten, Godshem in’n Oosten, Ooldbachenbrook un Möhdiek in’n Süüdoosten, Höörn in’n Süden un de Westersied in’n Westen.

Historie

Steenau kummt 1370 toeerst in de Oorkunnen vör.

In dat Johr 1533 hett Hartog Magnus von Sassen-Loonborg en Verordnung rutgeven, dat en Wettern von’n Süden von Steenau bet na Helmworth anleggt warrn schall. Dor schull de Gefohr von Överswemmungen, de in dat Siedland jümmer dor weer, en beten mit minnert warrn. 1570 is de Wettern dör Hartog Franz I. noch deper un breder maakt worrn.

In’n Eersten Weltkrieg sünd 64 Soldaten ut dat Kaspel Steenau fullen oder vermisst un in’n Tweten Weltkrieg 90.

Verwaltungsgeschicht

De Oort hett vör 1852 to dat Kaspelsgericht Steenau von dat Land Hadeln tohöört un denn von 1852 bet 1885 to dat Amt Oterndörp. Na 1885 weer dat in’n Kreis Hadeln, de 1932 Deel von’n grötteren Kreis Land Hadeln worrn is. Siet 1977 höört de Oort to’n Landkreis Cuxhoben.

Religion

Kark in Steenau

Steenau is evangeelsch-luthersch präägt un is de Hauptoort von dat Kaspel von de Johannes-Kark Steenau. De Kark liggt in’n Oortsdeel Lauendeel.

För de Kathoolschen is de Hillig-Krüüz-Kark in Oterndörp tostännig.

Kultur

En Denkmaal för de Fullenen ut de twee Weltkrieg’ steiht in Glind.

Verenen

De Schüttenvereen Gut Ziel Steenau is 1934 grünnt worrn.

Weertschop un Infrastruktur

Steenau hett en egene freewillige Füürwehr, de an’n 31. März 1922 grünnt worrn is.

Verkehr

Dör Steenau löppt de Landsstraat 144, de in’n Westen na de Westersied an de Landsstraat 117 ran geiht un in’n Noordoosten över Godshem un Bülkau na Neehuus. In’n Süden föhrt de Kreisstraat 19 na Höörn un Möhdiek. De L 117 geiht von de Westersied in’n Süüdwesten na Beers an de Landsstraten L 119 un L 120 un in’n Noorden över Helmworth un Neenkarken na de L 118 un wieder na Oterndörp.

De nächste Autobahn is de Autobahn 27 (Afsnidd Cuxhoben–Bremerhoben). De Opfohrt 4 Niewohl liggt so 18 Kilometer in’n Westen von Steenau an de L 120.

De nächste Bahnhoff is so bi 17 Kilometer wied weg in’n Noorden de Bahnhoff Oterndörp an de Nedderelvbahn von Cuxhoben na Hamborg. Von 1896 bet 1968 hett dat ok op de Bahnlien Bremerhoben–Beers Personenverkehr geven. De Bahnhoff Beers weer in düsse Tied negen Kilometer wied weg in’n Süüdwesten.

Scholen

De Kinner ut Steenau gaht na de Grundschool Siedland in Helmworth. Fröher hett dat in de Steenauer Oortsdelen verscheden lüttje Volksscholen geven.

Lüüd

De plattdüütsche Schriever un Antisemit Gustav Stille is 1845 as Söhn von’n Pastoor in Steenau boren.