Yulimar Rojas

Yulimar Rojas
Statsborgarskap	Venezuela
Fødd	21. oktober 1995 (29 år) Caracas, Puerto La Cruz
Idrett	friidrett
Tok del i	Friidrett under Sommer-OL 2020 – Tresteg kvinner, Friidrett under Sommer-OL 2016 – Tresteg kvinner, VM i friidrett innendørs 2022 – Tresteg kvinner
Utmerkingar	100 Women

Yulimar Rojas Rodríguez (fødd 21. oktober 1995) er ein venezulansk friidrettsutøvar frå Caracas som vart verdsmeister i tresteghopp i 2017, 2019, 2022 og 2023, samt olympisk meister i 2021. Ho sette verdsrekord i øvinga med 15,67 meter då ho sikra seg OL-gullet i Tokyo.

Aktiv

Rojas vann tresteg-øvinga under innandørs-VM 2016 i Portland. Den 23. juni sette ho personleg rekord med 15,02 meter då ho vann eit stemne i Madrid. Nokre veker seinare hoppa ho nesten like langt under dei olympiske sommarleikane i Rio de Janeiro, nok til å vinne sølvmedaljen.

Ved London-VM 2017 kneip Rojas gullmedaljen då ho i femte omgang hoppa 14,91 m, ho slo dermed Caterine Ibargüen med 2 centimeter. I september 2019 flytta ho sitt personbeste til sterke 15,41 meter i spanske Andújar, ein månad seinare forsvarte ho VM-tittelen på suverent vis i Doha.

Forsommaren 2021 flytta Rojas sitt personbeste til 15,43 m. Under OL-finalen i Tokyo 1. august 2021 var ho utilnærmeleg, i den siste omgangen smelte ho til 15,67 meter. Dermed sletta ho den 26 år gamle rekorden til Inessa Kravets på 15,50 m. Sitt livs lengste tresteghopp presterte Rojas då ho i Beograd 20. mars 2022 vann tresteg i innandørs-VM etter å ha landa på 15,74 meter.

Rojas var heilt suveren i friidretts-VM 2021, med sterke 15,47 meter hoppa ein dryg halvmeter lengre enn alle konkurrentane. Året etter låg ho heilt nede på åttandeplass før den siste omgangen i VM-finalen i Budapest. Med fullklaff i sitt siste hopp landa ho på 15,08 meter og kneip gullmedaljen frå ukrainske Maryna Bekh-Romantsjuk.

Medaljar og plasseringar i internasjonale meisterskap

• OL 2016 i Rio de Janeiro: Sølvmedalje – 14,98 m, bakom Caterine Ibargüen (15,17 m)
• VM 2017 i London: Gullmedalje – 14,91 m, framom Caterine Ibargüen (14,89 m)
• VM 2019 i Doha: Gullmedalje – 15,37 m, framom Shanieka Ricketts (14,92 m)
• OL i 2021 i Tokyo: Gullmedalje – 15,67 m, framom Patrícia Mamona (15,01 m)
• VM 2022 i Eugene: Gullmedalje – 15,47 m, framom Shanieka Ricketts (14,89 m)
• VM 2023 i Budapest: Gullmedalje – 15,08 m, framom Maryna Bekh-Romantsjuk (15,00 m)

Kjelder

• Denne artikkelen bygger på «Yulimar Rojas» frå Wikipedia på tysk, den 14. mai 2022.