Arrondiment de Periguers

L’Arrondiment de Periguers es una division administrativa e una anciana division electorala ^[1] francesa situada en Perigòrd, dins lo departament de Dordonha e la region de Novela Aquitània, anteriorament d'Aquitània. La lenga autoctòna es l'occitan lemosin dins la varianta perigòrda e, dempuei la refòrma cantonala de 2014, aplicada en 2015, benleu per quauquas comunas, l'occitan lengadocian brageiragués. I a tanben dens lo canton de Senta Aulaia quauquas comunas totalament o parcialament francesas que parlan santongés.

Istòria

L'arrondiment fuguet creat en 1800, coma los autres arrondiments francés. En 1926, recebet la totalitat de l'arrondiment de Rebairac, suprimit : los cantons de Moissídan, Montagrier, Montpaun, Nuòuvic, Rabairac, Senta Aulaia e Vertelhac. Lo nombre de cantons montet entau a setze. En 1973, lo canton de Periguers fuguet partit en tres e lo nombre de cantons de l'arrondiment passet a dietz-e-uech. Lo nombre de comunas èra de 196.

Emb la refòrma cantonala de 2014, aplicada en 2015, lo nombre de cantons fuguet devesit per dos, un canton novel pòt èsser sus dos arrondiments.

En 2017, modifiquèren la composicion daus arrondiments per 'mor de los adaptar aus limits de las intercomunalitats e de las circonscripcions legislativas.

L'arrondiment de Periguers ganhet 21 comunas que venian de l'arrondiment de Brageirac : Beuregard e Bassac, Belesmas, Campsègret, Clarmont de Beuregard, Dovila, Gleisanueva d'Eiçac, Eiçac, La Vaissièra), Las Leschas, Maurens, Montanhac de Cremsa, Molin Nuòu, Paunac, Sent Jòrgi de Montclar, Sent Alari d'Estiçac, Sent Joan d'Estiçac, Sent Joan d'Eiraud, Sent Júlian de Cremsa, Sent Martin de las Combas, Vau de Loira e Caudau e Vilamblard.