Scheunen

Fracziun

Vischnanca politica

←

1912–2013

→

Scheunen fotografà or d'in ballun

Vopna

Administraziun

Stadi

Svizra

Regiun

Circul

Vischnanca

Territori

Autezza

575 m s.m.

Surfatscha

2,2 km²

Populaziun

70 abitants
(31 da december 2007)

Spessezza

32 ab./km²

Autras infurmaziuns

Numer postal

3305

Scheunen (local Schüüne) era ina vischnanca politica svizra en il circul administrativ da Berna-Mittelland en il chantun Berna. Il 1. da schaner 2014 è Scheunen vegnì integrà ensemen cun Münchringen en la vischnanca da Jegenstorf.

Geografia

Cunfins communals fin ils 31 da december 2013

Situaziun geografica

Scheunen sa chatta sin 575 m s. m., 13 km en lingia directa en il nord da la chapitala chantunala, Berna. La pitschna culegna purila s'extenda en posiziun da buna vista sin ina spunda levamain orientada vers nord da la planira auta da Rapperswil, en la Bassa svizra.

Territori

Ils 2,2 km² da l'anteriur territori communal cumprendan ina part da la cuntrada levemain cullinosa en il center da la Bassa bernaisa. Dal sidvest vers il nordost vegn il territori traversà da la val dal Mülchibach (affluent dretg dal Limpach) cun ses ferms guauds. La part inferiura da quel vegn er numnà Länggengraben. En il vest da quella foppa s'extenda l'anteriur intschess communal viaden il Junkholz (bis 570 m s. m.) e la regiun da la funtauna dal Messibach. Vers il sidost tanscha l'areal communal sin l'altezza da Scheunen, en il Steinerenwald e fin tar l'ur dal Mannenbuechwald, nua che sa chatta cun 585 m s. m. il punct il pli aut dal territori.

Il 1997 eran 4 % dal territori abità, 52 % eran guaud e bostgaglia e 44 % vegnivan duvrads per l'agricultura.

Fracziuns

La culegna sparpagliada consista da sis gruppas da bains ed intgins bains singuls.

Vischnancas cunfinantas (fin il 2013)

Las vischnancas cunfinantas da Scheunen era fin ils 31 da december 2013 Etzelkofen, Iffwil, Bangerten e Rapperswil (BE) en il chantun Berna e Messen en il chantun Soloturn.

Istorgia

La culegna è vegnida menziunada l'emprima giada il 1226 sut il num Schunon. Pli tard èn cumparidas las furmas Scunon (1239), Schünon (1240), Schunnon (1387) e Schünen (1531). Il toponim va enavos al pled aut tudestg mesaun schiune (clavà, modern Scheune)

A partir dal temp medieval era Scheunen suttamess a la suveranitad dals conts da Kyburg. Il 1406 è la suveranitad davart il territori passada dals Kyburg a Berna, ch'ha integrà Scheunen en la dretgira (Landgericht) da Zollikofen. Suenter il collaps da l'Ancien Régime (1798) appartegniva la culegna durant la Helvetica al district da Zollikofen ed a partir dal 1803 al district (Oberamt) da Fraubrunnen, ch'ha obtegnì entras la nova constituziun chantunala dal 1831 il status d'in Amtsbezirk.

Enfin l'onn 1912 eran Messen-Scheunen ed Oberscheunen duas vischnancas politicas autonomas. L'emprim appartegneva a la plaiv da Messen en il Soloturn, il davos a quella da Jegenstorf. A l'entschatta da l'onn 1912 han las duas vischnancas naninas fusiunadas a la nova vischnanca da Scheunen. L'appartegnientscha a las differentas plaivs è dentant restada fin il di dad oz.

Populaziun

Svilup da la populaziun



Onn			Abitants
1765			43
1850			118
1860			134
1870			130
1880			111
1888			123
1900			96
1910			94
1920			107
1930			94
1941			75
1950			78
1960			66
1970			71
1980			73
1990			64
2000			57
2005			72
2010			78

Linguas