Limba ainu

Articulu in nugoresu

Sa limba ainu (in ainu アイヌ イタク, aynu itak; in giapponesa アイヌ語, ainu-go) est una limba chistionada dae su grupu ètnicu europoide de sos Ainu in s'ìsula de Hokkaidō, a nord de su Giappone. Tempus fachet si faveddabat fintzas in sas ìsulas Curili, in sa parte nord de Honshu, e in sa meitade meridionale de Sakhalin.

S'ainu est una limba isulada chene raportos chin sas àteras limbas. A bortas che la ponen in su grùstiu de sas limbas paleosiberianas, ma custu est unu faveddu chi cumprendet medas familias limbìsticas minores e isuladas chi b'aiat in Siberia innàntis de s'artziada de etnias turcas e tungusas; de cada manera, no est una familia limbìstica. In medas creden chi s'ainu siat currelau a su giaponesu e a sas limbas altàicas (Patrie 1982). Dae pacu tempus s'at provau a che la pònner a pare chin sas limbas austronesianas, pro mèdiu de cumparàntzias curturales e lessicales, comente nat su limbista giaponesu Shichiro Murayama. B'at fintzas sa proposta de chie la cheret sorre de s'indoeuropeu, ca b'an atzapàu unas 200 paràgulas de possìbile orizine a comunu e carchi assimizu sistemàticu.

A commo, s'ainu est una limba chi sich'est morinde. Difatis, pèri totu s'ìsula de Hokkaidō b'at petzi 100 pessones chi galu la faveddan, e custas sun in sa bidda de Nibutani e tenen prus de trint'annos; mancari totu, s'interessu de la torrare a imparare dae parte de sa zente de su locu chi non la connoschet prus est vivu.