Hardanger Folkeblad

Hardanger Folkeblad publiserer stoffet på ulike digitale flater. Betalingsmur for ikkje-abonnentar gjeld det meste av stoffet. Det gjennomsnittlege talet på daglege lesarar av papirutgåva og publisering på nett var 9552 i fjerde kvartal 2023, ifølgje Mediebedriftenes Landsforening.

Det første nummeret av Hardanger Folkeblad kom ut i Odda 8. juni 1940, som partiavis for Arbeidarpartiet, med Leif Granli som redaktør. Den nye avisa vart stansa av tyskarane allereie året etter. Arbeidarrørsla har frå tidleg på 1900-talet stått sterkt i Odda og prøvde fleire gonger å starte avis, men dei fekk alle kort levetid.

I 1946 kom Hardanger Arbeiderblad, oppretta som eit framhald av den tidlegare Hardanger Social-demokrat. Men denne avisa vart lagd ned i 1949 til fordel for Hardanger Folkeblad, som fekk ein ny start 24. juni 1949. «Odda og Tyssedal faglige utval» var utgivarar, og avisa skulle framleis vere organ for Arbeidarpartiet. I 1990 vart avisa kjøpt opp av A-pressa (no Amedia). Hausten same året vart konkurrenten i Odda, avisa Hardanger, lagd ned, og sidan har Hardanger Folkeblad vore einerådande i området.

I 1960-åra og utover var avisa tidleg ute med dei tekniske nyvinningane på den tida, med offset og tabloidformat. I 1995 vart produksjonen heildigital.

Hardanger Folkeblad har artiklar både på bokmål og nynorsk.

Til og med 2015 gjeld opplagstala berre papirutgåva. Frå 2020 vert netto opplagstal for både digitalt abonnement og papirabonnement nytta. Kjelda er opplagstala som avisene rapporterer til Mediebedriftenes Landsforbund (MVL) for andre halvår.

• Norsk presses historie
• lokalavis
• Hardanger
• Amedia

• Hardanger Folkeblad

• Kjartan Rødland: «Hardanger Folkeblad», Norsk presses historie 1660–2010, bd. 4. Oslo 2010