parkslirekne

Planta blir mellom ein og tre meter høg og har grove, opprette stenglar. Blada er store, rundt ti cm lange, og er lêrharde med tverr bladgrunn og utdregen spiss. Blomane er små og grønkvite og sit saman i toppar.

Planta, som stammar frå Aust-Asia, er einkjønna og set sjeldan modne frø i Europa. Ho formeirar seg i staden med kraftige jordstenglar som blir opptil 5 centimeter tjukke og 20 meter lange.

Parkslirekne vart innført til Noreg som prydplante, men har mange stader kome ut av kontroll og spreier seg no sterkt i strand- og skogkantar, langs vegar og elles på udyrka mark. Ho er nokså vanleg i Sør-Noreg, meir sjeldan i kyststroka vidare nordover til Lofoten og Vesterålen.

Planta er vanskeleg å få bukt med, spesielt om ein berre bruker mekaniske metodar. Best resultat blir oppnådd med ein kombinasjon av mekaniske tiltak, til dømes slått, etterfølgd av kjemiske tiltak (glyfosat) på gjenveksten.

Planta er oppført på IUCNs liste over dei hundre verste invaderande artane i verda. Han fekk kategori «svært høg risiko» på framandartslista (Norsk svarteliste) i 2012 og er i same kategori i framandartslistene i 2018 og i 2023.

Det er forbudt å importere, plante, kjøpe og selje parkslirekne i Noreg. Det er bestemt i Forskrift om fremmede organismer.

• slireknefamilien
• framandartlista
• urt

• Artsdatabanken: Faktaark om parkslirekne (pdf)
• Fagus fakta – tiltak mot parkslirekne (pdf)
• Lovdata: Forskrift om fremmede organismer