Podolsk

Podolsk (Rusk: Подо́льск) is n wichtigen Industrieseedel un dät Ferwaltengssäntrum fon dän Rajon Podolsk in ju Oblast Moskau in Ruslound. It lait oun ju Äi Pachra, ju in ju Moskwa-Äi fljut. It is mäd een Bifoulkenge fon 180.963 Ljuude in 2002 ju grootste Stääd in ju Oblast Moskau (Moskau säärm heert deer nämelk nit tou). Ätter n täämelken Groi in't [[20. Jierhunnert is ju Bifoulkenge nu wier touräächgeen, in 1989 wuden noch 209.178 Ljuude täld, in 1974 wieren dät 183.000, in 1959 129.000 un in 1939 bloot 72.000.

Geskichte

Ju Stääd Podolsk groide uut dät Täärp Podol, dät in't 18. Jierhunnert tou dät Danilow-Klaaster in Moskau heerde. In 1791, tou düsse Tied wude ju Ferwaltengsiendeelenge fon Ruslound näi iengjuchted, kreech Podolsk truch Katharina II. do Stäädgjuchte.

Eer ju Ruske Revolution waas Podolsk monken do maast industrioalisierde Stääde in Ruslound. Dät Unnerniemen Singer hiede junner een Säimaskienen-Fabrik.

Ju Foamielje Uljanow diede in Podolsk lieuwjen. Wladimir Lenin bisoachte ju Stääd oafter un hiede deer sogoar n litjet Stuk Gruund un een Hutte. In 1900 mätte hie in Podolsk do Sosjoaldemokroaten uut Moskau un uur Stääde, uum Stöän foar ju Saitenge „Iskra“ tou kriegen, ju deer al pränted wude.

In 1971 kreech Podolsk den Oarden fon ju Roode Flaage fon dät Wierk. Tou Sowjet-Tied waas Podolsk aan fon do Industrie-Hüünen in ju Oblast Moskau. Do wieren moor as soogentich Fabriken in ju Stääd. Do maate Ienwoonere wierkeden in düsse Bidrieuwe.

In 2000 wude tichte bie Podolsk een groote Militärbasis iengjuchted, ju hoast fon Igor Minin kommandierd wäd.

In Podolsk sit dät Säntroal-Archiv fon't Ruske Ferdäägenengsministerium.