El' Kuveit

El' Kuveit (arab.: مدينة الكويت , vepsän transkripcii: Madīnat El' Kuveit) om Kuveitan pälidn da kaikiš suremb lidn.

El' Kuveit
مدينة الكويت
(Madīnat El' Kuveit)

Valdkund	Kuveit
Eläjiden lugu (2008)	151,000 ristitud
Pind	200 km²
Telefonkod	+965
Aigvö	UTC+3

Istorii

Om valdkundan pälidnaks sen alusenpanendaspäi vl 1961. Šingotaškanzi sadud ripmatomuden jäl'ghe, sikš miše anastihe sal'hid kivivoin möndaspäi Evropan da AÜV:oiden kompanijoil. Soda Persijan lahtes (1990) toi lujad ekologišt vigad ezilidnoile da meren eläjile, kivivoi valoihe da kividunu räkäs sil aigalpäi.

El' Kuveitan ižandusen sarakod oma kivivoin vendan ližaks: turizm, openduz, tedoidused tervhudes, finansižed da investicižed kompanijad.

Geografii

Lidn sijadase valdkundan keskuses, Persijan lahten üks'jäižen merikaran madalal randal.

Klimat om lujas räk pol'letetazangišton. Paneb sadegid 116 mm vodes, niid ei olele ani kezakus-sügüz'kus. Letetorokad oleldas. Voden keskmäine lämuz om +26,4 C°, no tal'vel voib panda haloid öl.

Eläjad

Vl 2008 eläjiden lugu oli 151 tuhad ristituid. Kuveit-valdkundan ristitišt eläb pälidnan aglomeracijas tobjimalaz (2,4 mln vl 2005). Om äi ajelnuzid verazmalaižid radmaha.

Transport

Avtobusad oma kundaližeks transportaks lidnas, ned-žo ühtenzoittas ezilidnoidenke da verhiden maiden lähižidenke lidnoidenke.

Rahvahidenkeskeine civiline Kuveit-lendimport (KWI) om üks'jäine valdkundas, sijadase 15 km suvhe lidnan keskusespäi. Sišpäi tehtas reisid Indijha, Pakistanha, Iranha, Turkanmaha, erasihe toižihe lähižihe Azijan maihe, Keskmeren lidnoihe-portoihe, Evropan järedoihe lidnoihe.

Kaks' meriportad oma läz lidnad vemha ujuden kivivoid (Ahmadi-port) da tomha tavaroid (Šuveik-port).