Feodosii

Feodosii
Феодосия (ven.)
Феодосія (ukr.)
Кефе / Kefe (krim.-tat.)

Lidnanznam	Flag
Valdkund	Venäma - de fakto Ukrain - de jure]]
Eläjiden lugu (2018)	67,902 ristitud
Pind	42,29 km²
Pämez'	Sergei Bovtunenko (2019—, Сергей Бовтуненко)
Telefonkod	+7−36 562, ende +380−6562
Aigvö	UTC+3

Genujan lidnuz Feodosijas i Ioann Endustajan pühäpert' (2008)

Feodosii (ven.: Феодо́сия, ukr.: Феодосія, krim.-tat.: Кефе / Kefe) om lidn, meriport da kurort Kriman päivnouzmas. Se om pol'saren kudenz' lidn eläjiden lugun mödhe, Feodosijan lidnümbrikon administrativine keskuz.

Istorii

Eländpunktan aluz om pandud Miletan grekalaižil 6. voz'sadal EME. Nimituz libub grekan kelen Θεοδοσία-sanaspäi «Jumalal anttud». Vll 355 e.m.e. — 5. voz'sada m.e. mülüi Bosporan car'kundha. Lidn oli alištunu Genujan administracijale 14.-15. voz'sadoil, sen nimi oli Kaff (Kaffa). Vspäi 1804 eziauguine amuine nimituz om pördutadud oficialižikš.

Feodosii šingotase meriportal (sidä kesken kalanpüdajiden), istorižel turizmal i lebutahoks, sömtegimištol (vin, südäiveded, tabak), mašinansauvomižel (mehanine, optine i laivanmehanine tegimed), mugažo sauvondmaterialiden kombinat, čulkfabrik i meblin edheotand ratas lidnas.

Geografijan andmused

Lidn sijadase Mustmeren Feodosijan lahten randal, Kriman pol'saren longibokaližel (suvipäivnouzmaižel) randištol, kümne metrad ü.m.t. keskmäižel korktusel. Kriman mäged röunatadas lidnad päivlaskmaspäi, Tepe-Ob-mägi om niiden lopuks 302 metrad kortte.

Matkad Simferopolihesai om sada kilometrad päivlaskmha orhal vai 114 km avtotedme.

Klimat om subtropine ezimägišton, kontinentan valatoitusenke. Keza om päivoikaz lujas, tal'vaig om pil'vekaz lujas. Voden keskmäine lämuz om +12,8 C°, heinkun-elokun +24,6..+24,8 C°, kezakun i sügüz'kun +21,9 i +19,3 C°, tal'vkun-uhokun +2,0..+4,1 C°. Ekstremumad oma −25,1 C° (viluku, uhoku) i +38,9 C° (heinku, eloku). Kezaaigan minimum om +5,0 C° (kezaku), tal'vaigan maksimum om +21,8 C° (tal'vku). Ei voi panda halad semendkus-sügüz'kus (semendkun minimum om +1,1 C°). Paneb sadegid 478 mm vodes, läz tazomäras kuidme, enamba tal'vkus (46 mm), vähemba sulakus (32 mm) i heinkus (33 mm). Paneb lunt 31 päiväd tal'ves. Läz ei oleskele lumikatet tal'vaigan (kahthe santimetrhasai). Kun keskmäine relätivine nepsuz vajehtase 64..70 % röunoiš semendkus-sügüz'kus, 77..82 % redukus-keväz'kus.

Eläjad

Vl 2012 lidnan eläjiden lugu oli 69 786 ristitud, vl 2014 — 69 038 ristitud. Kaikiš suremb lidnan ristitišt oli 86 400 eläjad vl 1992.

Rahvahad (lidnan eläjad, enamba 0,4 % vl 2014): venänikad — 79,4 %, ukrainalaižed — 11,4 %, krimantatarlaižed — 1,0 %, vaugedvenälaižed — 1,0 %, totarlaižed — 0,8 %, armenijalaižed — 0,7 %, toižed rahvahad — 2,0 %, rahvahuden ozutandata — 3,7 %.

Galerei

• 
  Lidnümbrikon znam Venäman pordol
• 
  Lidnümbrikon flag Venäman pordol
• 
  Jumalanmaman Kazanin jumalaižen kafedraline päjumalanpert', vn 2012 nägu (om saudud vll 1907−1911)
• 
  Feodosijan meriport vl 2011
• 
  Feodosii-päraudtestancijan sauvuz vl 2012

Lidnan ühthine nägu Feodosijan lahtenke Tepe-Ob-mägelpäi vn 2008 sügüz'kus

Irdkosketused

• Lidnan oficialine sait (feo.rk.gov.ru). (ven.)