Gorodovikovsk

Gorodovikovsk
Городовиковск (ven.)
Бәәшңтә (kalm.)
	Lidnanznam;
Valdkund	Venäma
Eläjiden lugu (2021)	8,285 ristitud
Pind	15,6 km²
Pämez'	Artöm Okunov; (kül'mku 2020—)
Telefonkod	+7−84 731-xx-xxx
Avtokod	08
Aigvö	UTC+3 (MSK+0)

Gorodovikovsk (ven.: Городовико́вск, kalm.: Бәәшңтә «pert'kulunke», «čuhundusenke») om Venäman lidn da lidnankund Kalmikijan Tazovaldkundan päivlaskmaižes čogas. Se om Gorodovikovskan rajonan administrativine keskuz.

Istorii

Eländpunktan aluz om pandud vl 1871 kuti kalmikalaižiden Bašant-žilo (ven.: село Башанта́) elänzoitmaha tahondad anttud umal, nimitihe jogen mödhe. Vn 1943 28. päiväl tal'vkud deportiruihe kalmikalaižid, i vhesai 1957 žilo oli mülünu Rostovan agjaha. Radnikžilo sai lidnan statusad vl 1971, udesnimitihe Oka Gorodovikov-polknikjenaralan muštho.

Gorodovikovsk šingotase paštandsijal, mellical, makaroniden cehal, rajonkeskusen socialižen infrastrukturan holitišil. Ei ole tegimišton järedoid edheotandoid lidnas. Se om ümbärtud maižanduzrajonal, mahuz om mustma. Nevondkundaližel aigal konservtegim, voitegim, savičuntegim i omblendfabrik radoiba lidnas.

Geografijan andmused

Lidn sijadase 64 m keskmäižel korktusel valdmeren pindan päl.

Matkad Elisthasai om 234 km päivnouzmha. Lähembaižed lidnad oma Sal'sk (Rostovan agj) 53 km lodeheze orhal vai 60 km avtotedme, Ipatovo (Stavropolin rand) 95 km suvipäivnouzmha avtol.

Klimat om ven kontinentaline. Voden keskmäine lämuz om +10,3 C°, kezakun-elokun +20,2..+23,3 C°, tal'vkun-uhokun −1,1..−3,1 C°. Ekstremumad oma −25,8 C° (viluku, uhoku) i +42,7 C° (eloku). Kezaaigan minimum om +7,0 C° (kezaku), tal'vaigan maksimum om +19,6 C° (uhoku). Ei voi panda halad kezakus-sügüz'kus (sügüz'kun minimum om +2,1 C°). Paneb sadegid 468 mm vodes, kuidme läz tazomäras, enamba kezakus (55 mm), vähemba vilukus-keväz'kus (28..32 mm kus) i sügüz'kus-redukus (33 mm kus). Sadegiden lugumär voib vajehtadas lujas vozidme.

Tobmuz

Gorodovikovsk om lidnankundan üks'jäižeks eländpunktaks. Lidnankundan pind — 175,86 km².

Lidnankundan tobmuden pämez' om sen Administracijan pämez'. Edeline lidnankundan pämez' (ahlači) om Sergei Sereda (2010 — reduku 2020).

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 9 480 ristitud, rajonan viž ühesandest, vn 2021 — 8 285 ristitud. Vl 2017 kaik 8 798 ristitud elihe lidnas. Kaikiš suremb lidnan ristitišt oli 11..12 tuh. eläjid vll 1979−1992 (11 902 rist. vl 1989).

Rahvahad (enamba 1 % vl 2010): venälaižed — 63,4 %, kalmikalaižed — 25,4 %, turkad-meshetijalaižed — 1,9 %, saksalaižed — 1,5 %, ukrainalaižed — 1,5 %, armenijalaižed — 1,1 %, korejalaižed — 1,0 %, toižed rahvahad — 2,9 %, rahvahuden ozutandata — 1,3 %.

Buddizman Zonkava-valdoičijan tantrine pühäpert' om saudud vll 2005−2008. Ortodoksižen hristanuskondan koume jumalanpertid^[1] oma avaitud lidnas: Mikoi-arhangelan jumalanpert' (om sätud vll 1998−2002), ph. Aleksii-carinpoigan jumalanpert' (om letud vll 2007−2018), ph. Aleksijan časoun'.

Lapsiden opendusen aluzkundad oma nell' nimitadud päivkodid, koume keskškolad (nomer 1, 2, 3), äiprofil'ne gimnazii B.B. Gorodovikovan nimed, lapsiden sädamižen pert', čomamahtoiden škol. Professionaližen opendusen aluzkundad oma Äiprofil'ne kolledž^[2] i Bašantan kolledž F.G. Popovan nimed^[3] (Kalmikijan valdkundaližen universitetan filial).