Solikamsk

Solikamsk
Соликамск

Lidnanznam	Flag
Valdkund	Venäma
Eläjiden lugu (2021)	89,473 ristitud
Pind	166,55 km²
Pämez'	Jevgenii Samoukov (uhoku 2021—)
Telefonkod	+7−34 253-xx-xxx
Avtokod	59, 81, 159
Aigvö	UTC+5 (MSK+2)

Solikamsk (ven.: Солика́мск, perm. komi: Совкар) om Venäman lidn da lidnümbrik Permin randan pohjoižes. Se om randan koumanz' lidn eläjiden lugun mödhe, mugažo Solikamskan rajonan administrativine keskuz, ei mülü rajonha.

Istorii

Eländpunktan aluz om pandud samha keitandsolad Usolk-jogen randal vologdalaižil Kalinikovad-torgovanoil vl 1430. Mainitase vn 1506 aigkirjas kuti Usol'je Kam-jogel (ven.: Усолье на Камском). Sai lidnan oiktusid vl 1573, 1600-nzil nimitihe Kaman Sol (ven.: Соль Камская).

18. voz'sadan augotišes lidn andoi imperijan keitandsolan pol't, nimitaškanzihe sidä nügüdläižikš. 20. voz'sadaspäi sadas kaliisolid lidnan ümbrištos.

Solikamsk šingotase kaivuzhimižel tegimištol (mineraližiden heretusiden pästand), magnijan samižel solišpäi i sen metallurgijal, kohenduzmehanižel tegimel, bumagan pästandal i mecan varhapanendan kombinatal, sauvondan edheotandoil, sömtegimištol. Ende erazvuitte toine tegimišt oli lidnas: pästtihe nahkad, savičud, vinad, baržid, kelloid da jumalaižiden alusid, saihe vas'ked da tegihe sömastjoid sišpäi.

Geografijan andmused

Lidn sijadase Kaman vezivaradimen hural randpolel, Uralan päivlaskmaiženno ezimägištonno, 150 m ü.m.t. keskmäižel korktusel. Matkad Permihesai om 202 km avtotedme vai 368 km raudtedme (Čusovoi-lidnan kal't). Lähembaine lidn om Berezniki suvhe, 20 km röunoiden keskes.

Solikamsk om lidnümbrikon üks'jäižeks eländpunktaks.

Eläjad

Vn 2010 Venäman rahvahanlugemižen mödhe lidnan eläjiden lugu oli 97 384 ristitud. Kaik 94 628 eläjad oli lidnas vl 2017. Kaikiš suremb lidnan ristitišt oli 110 tuhad eläjid vozil 1989−1992.

Ortodoksižen hristanuskondan kuz'toštkümne pühäpertid oma saudud lidnas: Eläban Eziauguižen Stroican kafedraline päjumalanpert', Ristan Zdviženjan päjumalanpert', Eläban Eziauguižen Stroican mez'jumalankodi (kaks' jumalanpertid), Ioann-edelkävujan naižjumalankodi (jumalanpertinke), kümne jumalanpertid, phh. Petran da Pavlan časoun'.

Solikamskan tehnologine i socialiž-pedagogine kolledžad, kaivuzhimine tehnikum i Solikamskan valdkundaline pedagogine institut (Permin valdkundaližen nacionaližen tedoiduzuniversitetan filial) oma lidnan professionaližen opendusen aluzkundoikš.

Edeline lidnümbrikon pämez' om Aleksei Fedotov (uhoku 2016—).

Galerei

• 
  Lämoipalonvastaine palakund (2015)
• 
  Spasan Toižetamižen (huralpäi) i Mikoi-arhangelan jumalanpertid Solikamskan kremlin sijas (ortodoksine hristanuskond), vn 2015 nägu
• 
  Spasan Toižetamižen jumalankodin kafedraline päjumalanpert' (ortodoksine hristanuskond), vn 2016 nägu
• 
  «Ural»-tegimen kul'turkeskuz (2015)

Irdkosketused

• Solikamsk-lidnan Duman oficialine sait (duma.solkam.ru). (ven.)
• Solikamsk-lidnan administracijan oficialine sait (adm.solkam.ru). (ven.)