Vanadzor

Vanadzor
Վանաձոր

Valdkund	Armenii
Eläjiden lugu (2017)	90,525 ristitud
Pind	32 km²
Telefonkod	+374−322
Aigvö	UTC+4

Vanadzor (armen.: Վանաձոր Vanadzor) om lidn Armenijan pohjoižes. Se om valdkundan koumanz' lidn eläjiden lugun mödhe, Lorin agjan administrativine keskuz.

Istorii

Eländpunktan aluz om pandud vl 1828 Karaklis-nimitusenke. Vl 1935 nimitihe Kirovakan:aks Sergei Kirovan pölištusen voden jäl'ghe. Vn 1988 tal'vkus luja Spitakan manrehkaiduz seičeme magnitudanke mureni lidnad. Vspäi 1993 nimitase nügüdläižikš jogen mödhe.

Vanadzor šingotase necen produkcijan pästandal: sobad (kaks' fabrikad), lämbituzladimed (koume edheotandad), gazmašiništ, avtopalad, polimerad.

Geografijan andmused

Lidn sijadase agjan suves, Vanadzoran katl'uses, 1350 m ü.m.t. keskmäižel korktusel, mägisel'gad ümbärtas sidä. Pambak-, Tandzut- i Vanadzor-joged ühthejokstas lidnas (Kuranjogen oigedpol'ne bassein).

Matkad Jerevanhasai om 116 km suvhe avtotedme vai 224 km raudtel. «Tbilis — Gümri»-raudtekeskust läbitab lidnad, stancii om ühtennimine.

Klimat om kontinentaline mägiden, läz ei olele kovid tulleid. Voden keskmäine lämuz om +4,2 C°, heinkun-elokun +15 C°, tal'vkun-uhokun −6..−8 C°. Paneb sadegid 565 mm vodes, enamba semendkus-kezakus (95..96 mm kus), vähemba tal'vkus-uhokus (18..25 mm kus).

Eläjad

Vl 2011 lidnan eläjiden lugu oli 86 199 ristitud, vl 1980 — 148 876 ristitud. Kaikiš suremb ristitišt oli 172 600 eläjad vl 1988.

Nene professionaližen opendusen aluzkundad ratas lidnas: Vanadzoran valdkundaline universitet Ovanes Tumanänan nimed (alusenpanend 1969 kuti Kirovakanan pedagogine institut, universitet vspäi 2014, 2,4 tuhad üläopenikoid), üläopendusen toižiden aluzkundoiden nell' filialad, nell' tehnikumad, medicinine škol i muzikškol.

Irdkosketused

• Lidnan oficialine sait (vanadzor.am). (arm.)