Boudewyn VI van Vloandern

Boudewyn VI (ca. 1030 - 17 juli 1070), ook Boudewyn Hasnon of Boudewyn van Bergn genoemd, was groaf van Vloandern van 1067 tout 1070. Je was ook groaf van Henegouwn van 1051 tout 1070 ols Boudewyn I.

Boudewyn VI was de zeune van groaf Boudewyn V en van Adela van Mêesn, dochter van keunienk Robert II van Vrankryk.

Zyn leevn

In 1045 benoemde keizer Hendrik III van 't Hillig Rooms Ryk hem tout markgroaf van Antwerpn.

Je most van zyn voader trouwn mè Richilde van Henegouwn, de weeuwe van Herman van Bergn, vo de macht over Henegouwn te kunn krygn. De kerke was nie akkôord vanwege bloedverwantschap, omda ze zyn verre achternichte was, moa loater kwamt de paus doar ip were.

Ze trouwdn in 1051 en Richilde arrangeerde dat heur jounges van heur êeste huwelik under voader nie kostn ipvolgn. Heur zeune Roger kwam bisschop van Châlons-sur-Marne en heur dochter gieng in ’t klôoster.

In december 1056, ip de Ryksdag van Keuln, wierd d’ipvolgienge van Herman van Henegouwn geregeld, en Boudewyn wierd officieel deur de jounge keunienk Hendrik IV van Duutsland met et groafschap Henegouwn belêend.

In 1068 stichtte Boudewyn VI e nieuwe stad an de westkant van de Dender, ip de grenze van Vloandern, Henegouwn en Broabant. J’haad doavôorn e vrylêen gekocht van Geraard van Hunnegem, achter wien dat ’n de stad Gerardi Mons noemde (Geraardsbergn, Frans: Grammont). De stad krêeg privileges.

Je restoreerdeg ook d’abdye van Hasnon, vandoa zyn bynoame.

Ot ’n hem ziek begost te voeln kwamt ’n tegoare in Oudenoarde vo zyn ipvolgienge te reegeln. Zyn oudste zeune Arnulf III zou ’t groafschap Vloandern krygn ounder ’t regentschap van Boudewyn zyn joungste broere Robrecht de Fries, en Boudewyn II zou ’t groafschap Henegouwn krygn ounder ’t regentschap van zyn moeder Richilde.

Boudewyn VI stierf in 1070 en j’is begroavn in d’abdye van Hasnon.

In 1071 begost zyn broere Robrecht de Fries e gevecht vo zyn erfrecht in de Slag by Kassel teegn Arnulf III. Arnulf zyn suzerein Philippe I en zyn moeder Richilde vochtn an zyn kant, moa je sneuvelde en je krêeg doaby zyn bynoame Arnulf den Oungelukkign. Je was moa 15 joar oud. Achter de slag erkende Philippe I Robrecht de Fries ols nieuwn groaf van Vloandern.

Doamee kwamt er ’n ende an de verênigienge tusschn Vloandern en Henegouwn. Richilde en heur andere zeune Boudewyn II hieldn Henegouwn.

Under jounges

• Arnulf III van Vloandern (1055-1071)
• Boudewyn II van Henegouwn (1056-1098), groaf van Henegouwn van 1071 tout 1098
• Gilbert van Gent
• Agnes