稱男性做不到家務 婦團批陳章明性別歧視

【明報專訊】平機會主席陳章明喺婦女節嗰日現身婦女基金會活動，致辭時話香港女性都有兩條「事業線」，一條係工作嘅，另一條係家庭嘅事業線，而由女性擔當嘅家庭角色係男性做唔到，例如做家務等。4個婦女組織網上發起聯署，批評陳章明嘅言論涉及性別歧視，叫佢道歉同辭職。平機會就話，無意強化性別定型形象，主席日後會更加小心謹慎發表言論。


組織包括婦女參政網絡、香港婦女勞工協會、香港女社工協會，同埋群福婦女權益會。


平機會：無意強化兩性定型

香港婦女勞工協會總幹事胡美蓮同Emily講，做家務唔係女性天職，但陳章明嘅言論充滿性別定型，「如果係普通人，我都可以體諒佢無性別歧視意識，但作為平機會主席講呢番言論，就要反省」。


平機會解釋，陳章明一向非常尊重女性，無意忽視男性對家庭責任嘅承擔，言論原意係讚揚女性，認同佢哋喺工作和家庭多方面嘅付出，同時帶出唔少婦女普遍面對嘅處境同不公平對待，絕無意圖強化兩性嘅性別定型形象。