BMA AW

An Official Organ of The Bangalore Mizo Association Registered Under Societies Act of Karnataka No. BLU-S188-2007-08 Date 7 May 2007
Vol. XVII Issue No.11 Bangalore Mizo Association Pathianni Tin Chhuak Chanchinbu Date: 11th March 2012 Phek Khatna

Tualchhung
MSA chuan Ni 17.03.2012 hian Chapchar Kut ropui taka huaihawt a tum a. Hemi ni hian even leh odd semester inkawpa 70% and above hmute chawmawi an ni dawn a. 70% chin chunglam hmu te chuan Tv. K. Remruatfela (9036515569) ah inhriattir tur a ni e. March 24 hian BMA General Body meeting chu Rotary Club (Wesley Church bul) ah khan neih a ni dawn a. Hemi ni hian Tlangval leh Nula fel leh hruaitu thar te thlan an ni dawn a, member zawng zawng te kal kim turin kan in ngen e. BMA GB meeting hi MSA GB meeting in a rawn chhunzawm ang. Lunch tui tak sem ani dawn bawk. A tam thei ang ber I kal khawm theuh ang u. March Ni 12, 2012 thawhtanni atang hian Bangalore auto fare tih san a ni tawh dawn a. A hmaa minimum rate Rs. 17/- ni thin kha Rs. 20/- ah a pung chho dawn a ni. Auto hmanga veivak thin te'n kan hre theuh dawn nia.

Engtinge nge kan pen zel ang?

- Lalramchuani KC Kan chenna khawvel ah hian tun kum hnih khat lek chhung khan thil nasa tak a inthlak danglam ta a. Chu chuan kan nun ah hian eng in nge min tihlim a eng hian nge min tihlim lo tih min ngaihtuah tir a. Kan nun ah te hian thil tih zawh/hlawhtlinna duh nei theuh kan ni a, mahse a tam zawk chuan hun remchang a tih ah kan khek a, chutih chhung chuan hun tha hi kan lo chan ta thin ani. Mi thiam thil nei tha tak tak te pawh, remchan zawk avang leh hrawk chawmna ngaihtuah a tul vang zawk te in kan tui na pawh ni lem lo lamah ei kan zawng fo a. Tin, hna pangngai tak thawh chuan tui zawng tih nan a hunawl neih te hi thil awlai a ni fo lem lo a. Mahse heti hian han ngaihtuah teh - I kum a lo upat huna i inngaihtuah let in i inchhir mai lo ang maw? I thil tih tum i lo ti lo te kha mahni i inhaw mai lo ang maw? Hyrum W. Smith chuan kan nuna lungawi loh na tam tak kan neih te hi kan thiltih leh kan thil ngaih pawimawh zawng a inang loh vang ani a lo ti a. Chutiang i thil ngaih pawimawh chu chiang tak in ngaihtuah chhuak la, tuna i nitin thiltih leh i la tih zel tur nen a inmil em tih inzawt thin ang che. A lo inzawn lo na lai a lo awm anih chuan nitin thil ho te te pawh ni se, remdik hna chu han thawk tan teh le. Nakinah chuan nasa tak in i nun a lo inthlak danglam tih i hmu maithei asin. Tin, i nun a thil bansan i duh i la bansan hleihtheih loh te a awm em? Eng vang nge? Kha mi i bansan loh vang khan enge a chhan? Engtin nge bansan turin hma i lak theih ang? A tul a nih chuan zawi te te in tan la, mahse tan ngei ang che. I lo tih lo thin nachhan kha i hlauhthawn vang emaw i nuna thil inthlak tur i peih loh vang emaw mai mai ani thei asin. Ke vawikhat i pen chuan a dang pen leh la, chutichuan i nunah bei tan rawh le. Amaherawh chu i nun inthlak tur atan chuan inbuatsaih ve a ngai tih theihnghilh suh ang che. Tichuan, i nunah i thiltih thin te kha enga ti nge tih han ngaihtuah leh lawk teh. A chang hi chuan a chhan tha tak pawh nei lem lo hian thil hi kan han ti ve ringawt a, tichuan tihthan ah a lo chang a. Kan tan leh midang tana tangkai miah lo te hi kan lo ti reng thin ve bawk a. Chutiang thil i nunah a lo awm anih chuan bansan a hun tawh lo maw? Stephen R Covey a chuan kan thil tih thin te hi "hmanhmawh thlak" leh "pawimawh" tih ah a then hrang a. Vanduaithlak takin thil "pawimawh mahse hmanhmawh thlak ni lo" te hi theihnghilh awl ber pawl an ni e. Mahse hetiang thil te hian ani i nun a thil ropui leh i hlimpui tur thil te lakah a dang thei che ani. Kan nun uluk ila, kan thiltih apiang uluk taka ngaihtuah in hun i khawhral mai mai lo ang u.

Thufing :
Mit a kan hmuh theih leh kan khawih theihte hi khawvela thil mawi ber an ni kher lo. Mawina tak tak chu thinlung ram atanga hriat fiah theih a ni zawk. Helen Keller
A thupek te, a rorel te, a dan te, vawiina ka pek chu u hi zawm lovin LALPA in Pathian chu in theihnghilh dah rual ang e, fimkhur rawh u; Deut. 8:11

Vol. XVIII Issue No. 11 Bangalore Mizo Association Pathianni Tin Chhuak Chanchinbu Date: 11th March 2012 Phek Hnihna
Editor Sawmteii Khawlhring Joint Editors KC Lalramchuani Tetea Sailo Contributor Benjamin Rualthanzauva Circulation Managers Diki Hnamte Lalhriatkima Chenkual BMA AW lak man: Thla khat Rs.20 Thla thum Rs.50 Thla ruk Rs.90 Thla sawmpahnih Rs.180

Chapchar kut 2012

(In aid of under-privelege students) 'Kut' hi mizo te tan chuan a pawimawh in mi zawng zawng nuam tih hun ber ani thin a, hmanlai kan pi leh pute hunlai phei chuan an ngai urhsun in anla thutak em em thin a, a hun lo thleng tur pawh an nghakhlel in an in ur lawk nasa thin hle a ni. Hun a ral zel a kum tam tak kal ta a kan thil tih ang a thil tih hleih theih poh ani ta lo a. Mizoram lam ah phei chuan Chapchar kut bak chu kan hmang ngai ta meuhlo ani. Mizo te hi awmkhawm a inkawm ho nuam ti mi kanni a, kan awmna hmun apiang a kan inlungrual a kan in tanpui tawn thinnna leh kan tlawmngaihna hi hnam dang hoin a min awhna leh kan bula awm nuam an tihna chhan ani thin hial ani. Khawvela changkang zel a, kan inzarpharh tial tial a, kan hnam nunzia leh kan culture hian ngaihthah a hlawh tial tial ni te hian a lang thin. A bik tak in phai lam a awm te hian a pawimawhna leh a hlutna kan hai tial tial ni te pawh in mi tawngkam ah chuan a lang thin ani. Phai a awm tam zawk te hi zirlai kan ni ti ila kan sawi sual awm lo e, chuvang chuan kan mizo na hi keimahni leh keimahni ah hian kan inhriattir thar leh hi a pawimawh tak zet ani. A pawimawh zia hre chung reng in Kum 2006 leh 2008 khan Bangalore hmun ah ngei hian Chapchar kut hi Mizo Students Association te huaihawt in hman alo ni tawh a, a hlawk thlak in thil tha tak leh Mizo te min suihkhawmtu tha tak ani hial ani. Kum a ral zel a hun rei tak a liam hnu ah kumin kum 2012 hian hman leh turin kan hruaitu ten project ah an nei a, chumi chu bawhzui zel in march ni 17 hian hman turin a rel a, an inpuahchah nasa tawh hle a, mipui in hlim leh nuam thei ang ber a an hman theihna turin an hma anla mup mup mekzel ani. He 'kut' a tan hian donation te khawn a ni a, mi tlawmngai tak tak in kan hman nawmlo hlau in phal tak in min pe a, Donor Card pawh zawrh mek zel ani. He kut ina a tum ber chu kan hnam nun(lam,incheina,etc) keimahni a in hriat thar tir leh a nih rual in a theme a kan hmuh ang hian mi harsate tanpuina hun ani bawk dawn ani. M.S.A te hian kumtin zirlai harsa te a tanpui ve thin a, kan project zing a lian ber pawh chu chu ani. Chumi bawhzui chung in he chapcharkut a kan sum hmuh te hi kan zirlaipui harsa te tanpui nan hman ani dawn ani. He kut ah hian Pu H.T.Sangliana Khuallian ani dawn a, zaithiam tak2 te zai in magic show ropui tak, Kungfu show turu lutuk hmuh lo in beisei bawk rawh. Chumai ani lo, college hrang hrang a zirlai ten kan hnam lam mawi tak tak min hmuhtir dawn bawk ani. He hun hlimawm tak hmang tur hian Bangalore a mizo awm zawng zawng te kan insawm a, kal ngei tur in kan in ngen bawk ani e. Kan hruaitu te pawh an tang ani ang an rel fuh hlei theilo a, tuna kan programme chawpchhuah ai nuam a hman dan a awm beisei in ngaituahna anla seng mek zel a, inpuahchahna a kal mup mup mek zel a ni. Bangalore ah hian i 'CHAI' ve chak anih chuan he ni i hmaih phal chi ani hauh lo ang le!!!!! ********************************************************

E-mail: bmanews@gmail.com Website: www.bangaloremizo.info

DAWN VE LA.. Pathian malsawmna leh, chhungte duhsakna avangin Bangalore khawpuiah lehkhazir/hnathawk theiin kan vanneih a. India ram khawpui zinga kawlphetha nei hmasaber khawpuiah hian keini Zofate hian eng hnuhma nge kan hnutchhiah dawn le? Mahni tan chauha thiltha tih hian rah tha a chhuah lova, a tawpah nun khawro-na ah min hruai lut thin. Kan nun / thiltih hian midangte hnenah thusawiin, awmzia lo nei se la. Rinawmna leh huaisenna hmachhuanin kan hmachhawp te i bei zel ang u. Kan thatlai hun hi hun rei lo te a ni a, thawkrim thei tura kan chak lai hian kan puan feng te sawi chhinga, Pathian malsawm tlaka theihtawp chhuah kan va tul tak em. Tun atanga kum sawm a lo ral leh meuh chuan, i hun ilo hman dan te i chhui kir ve leh ngei ang. Chutih hunah chuan siam that theih tawh loh I hun kal tawh khan hlimna nge inchhirna a thlen ang che??
-------------------------------------------- Enge an sawi? Tunlai chu Banglore ai chuan Mysore lam a lum lo zawk tlat. - Ben Sailo Helama awm lai pawn awl lo.. Mizorama han hawn lai pawihin awl lai reng awm chuanglo. A lo va han luck theih ngai ve Carey Sailo