სიმონ დე მონფორი
| სიმონ დე მონფორი ფრანგ. Simon de Montfort | ||
 ბარელიეფი სიმონ დე მონფორიშ პროფილით ამერიკაშ წჷმმარინაფალეფიშ პალატას | ||
 მაამშვა გრაფი ლესტერი | ||
|---|---|---|
| პოსტის გერინაშ ბორჯი | ||
| 1239 – 4 მარაშინათუთა, 1265 | ||
| წიმოხონი | სიმონ IV დე მონფორი | |
| მონძე | ტიტულიშ კონფისკაცია | |
| დუნაბადი | 1208 მონფორ-ლ'ამორი, საფრანგეთი | |
| ნაღურა | 4 მარაშინათუთა, 1265 (57 წანერი) ივშემი, ვუსტერშირი, ინგლისი | |
| ნთხორუ აბანი | ივშემიშ ოაბატე | |
| მუმა | სიმონ IV დე მონფორი | |
| ნანა | ალისა დე მონმორანსი | |
| ალმასქუ | ელეონორა ინგლისარი | |
| სქუალეფი | ჰენრი დე მონფორი სიმონ დე მონფორი უკულაში ამორი დე მონფორი გი დე მონფორი ჯოანა დე მონფორი რიჩარდ დე მონფორი ელეონორა დე მონფორი | |
სიმონ დე მონფორი (ფრანგ. Simon de Montfort, დ. დოხოლაფირო 1208 — ღ. 4 მარაშინათუთა, 1265) — ფრანგული გამნარყიშ ინგლისარი ოურდუმე დო სახენწჷფო მოღალე. დებადჷ საფრანგეთის. 1229 წანას ინგლისიშა გეგნიხორჷ. 1238 წანას ოსურო ქიმიჸონჷ ინგლისიშ მაფაშ ჰენრი III-შ და ელეონორა. 1248 წანას სიმონ დე მონფორი ქუდარინეს აკვიტანიაშ მამართალო. დუდშე ალურდჷ ომაფე პარტიას, მარა უკულ, 1254 წანაშე ხემანჯღვერენდჷ ბარონეფიშ ოპოზიციას მაფაშ მეხჷ. 1264 წანაშე ინგლისის ქიდიჭყჷ ომენოღალე კონფლიქტიქ, ნამუსჷთ ბარონეფიშ მაჟირა ლჷმას უძახუნა.
1264 წანაშ 14 მესის, ნოღა ლუისიშ გოხოლუას, ბარონეფიშ აკოართაფილი ნძალეფქ, სიმონ დე მონფორიშ ხემანჯღვერობათ ორჯგინეს მაფაშ ჯარეფს დო ტყვეთ ხეშა ქაშეჸოთეს მაფა ჰენრი III, თიში სქუა ედუარდი დო ჯიმა რიჩარდი. მაფაშ მარცხიშ უკულ, სიმონ დე მონფორიქ გინირთჷ ინგლისიშ დე ფაქტო მამართალო დო მიშეღჷ კაბეტი თია ინგლისიშ კონსტიტუციური გოვითარაფაშა.
მართუალაშ ბორჯის დე მონფორიქ ჟირშა მიჭანუ პარლამენტი: ოქსფორდიშ პარლამენტიქ 1258 წანას, მაფას გეგლანწყჷ აბსოლუტური ხეშუულება. დე მონფორიშ მაჟირა მოჭანაფილი პარლამენტის ოკათუდეს შხვადოშხვა ნოღეფიშ მენოღალე წჷმმარინაფალეფი. ჸათე რეფორმეფიშ გეშა, დე მონფორი მერჩქინელი რე თეხანური პარლამენტარული დემოკრატიაშ ართ-ართ დუმარსხუაფალო.
სიმონ დე მონფორი აწარმენდჷ კონწარი პოლიტიკას ურიეფიშ მეხჷ. ლესტერიშ გრაფობაშ ბორჯის თიქ ურიეფი გეგშარაჸუ ნოღა ლესტერიშე. მუჟამსჷთ ინგლისიშ მამართალო გინირთჷ, თიქ ადამიერეფს გუუქვჷ ურიეფიშე ენაჭოფა ვალეფი. თაშნეშე, დე მონფორიშ ალმარენჯეფქ მანწყის ურიეფიშ მასობური ჟღილიტუა ლონდონს, ვუსტერს, დერბის, უინჩესტერს დო ლინკოლნის.
სიმონ დე მონფორიშ ართწანიანი მართუალაშ უკულ, 1265 წანაშ 28 მესის ედუარდიქ ტყვეობაშე ინტჷ. 1265 წანაშ 4 მარაშინათუთას, ივშემიშ ლჷმას, ედუარდიშ ჯარეფქ დამარცხეს სიმონ დე მონფორი დო თიში ალმარენჯი ბარონეფი. ლჷმას დოჸვილეს სიმონ დე მონფორი.