五胡亂華

五胡亂華（粵拼：ng5 wu4 lyun6 waa4）係中國魏晉南北朝時，眾多北方、西北嘅遊牧民族趁中央王朝衰落之際，喺中國北方建立佢哋自己民族嘅國家、而同南方嘅漢人政權對立嘅時期，係長達136年外族入侵嘅亂世，從惠帝永興元年（西元304年）匈奴人劉淵建號稱王開始，到南朝宋文帝元嘉十六年（西元439年）北涼降魏為止。「五胡」係指匈奴、鮮卑、羯（讀揭，kit3，又叫白匈奴）、羌（讀姜，goeng1）、氐（讀低，dai1），但實際上喺中原立國嘅異族唔止五個，當時包括漢族在內喺中原成立過幾十個大細強弱不等嘅國家，其中時間長而有影響嘅有五胡十六國。

歷史

緣起

自漢武帝以後，中國西、北邊境外嘅外族就因為中原自然條件好過塞外就逐漸內遷，東漢朝廷經常招引或者強制胡人內遷，方便監控各族，同時作為兵源同勞力。到咗晉朝，中國北、東、西三個方向都住咗好多胡人，尤其係關中同并州，胡人佔半數，包圍咗京城洛陽。而且胡人內遷到中原，由遊牧變成農耕，人口就有所增加，經濟軍事勢力大增，自東漢、魏晉以來朝廷招胡人入軍，胡人喺軍隊入邊好有勢力。同時內遷胡人畀漢人管住，要向朝廷納稅，又因為華夷之辨嘅觀念畀漢人歧視，而未內遷嘅胡人同漢人貿易時，邊境嘅漢人土豪時不時欺詐胡人，令好多胡人好不滿。雖然有人如江統寫《徙戎論》，擔心胡人勢力坐大，建議將胡人分割、遣返鄉下或者叫佢哋搬遞度，但無人聽。

晉室無能，政治腐敗，國力衰弱，而地方上亦都積弱，軍備唔夠，胡人造反時地方無力抵抗，八王之亂之後，國家大傷元氣，漢人嘅軍力迅速衰退，當時中原又連年災荒，社會生產破壞嚴重，胡人就趁你病攞你命，紛紛起兵逐鹿中原，喺京城嘅胡人軍隊以及中原嘅內遷胡人同壓住邊境嘅胡人裏應外合，最終西晉亡國。

經過

304年冬天，氐族首領李雄佔咗成都，自稱「成都王」，史稱成漢；匈奴貴族劉淵起兵於離石（今日山西離石），國號漢（後改為趙，史稱前趙）。係五胡建國開始。

晉懷帝永嘉四年（310年），劉淵死，佢個仔劉聰殺太子劉和即位。

311年（永嘉五年）四月，劉聰部下石勒，喺苦縣寧平城（今河南鹿邑）破晉軍十幾萬人，並俘殺太尉王衍等。劉聰又遣大將呼延晏率兵攻洛陽，屢敗晉軍，前後殲滅三萬餘人。六月呼延晏到達洛陽，劉曜等人帶兵會合，攻破洛陽，縱容部下搶掠，俘虜晉懷帝，殺太子、宗室、官員及士兵百姓三萬幾人，並大肆發掘陵墓、焚毀宮殿，史稱「永嘉之禍」或「永嘉之亂」等。

313年，劉聰毒死咗晉懷帝。懷帝嘅姪司馬業（或作司馬鄴），喺長安登基，叫做晉愍帝。

316年前趙劉曜攻長安，俘虜晉愍帝。

317年殺咗晉愍帝，士族王導、王敦等，扶植晉朝遠房宗室司馬睿，喺建康（今日南京）登基，叫做晉元帝，歷時52年嘅西晉滅亡，東晉開始，進入南北對峙時期。

影響

五胡亂華係中國歷史上第一次中原淪陷於外族，對漢人來講係一場民族災難，幾乎令華夏亡國滅種。同時對中國歷史產生極深嘅影響，係華夏文明嘅轉折。

五胡亂華時期南北對立分治，分化南北社會，形成今日南北文化大不同嘅格局。

中原凋敝

喺北方，自漢人王朝滅亡後就陷入戰亂紛爭，各個唔同民族包括漢族喺北方建立唔同嘅國家，相互之間打來打去，漢胡勢同水火，胡人發《殺漢繳》，漢人發《殺胡令》，令中原社會、經濟、文化凋敝，形成流民潮湧向南方、河西、遼東，而世家大族亦有好多跟住皇室南遷，稱之為衣冠南渡，至於無南渡嘅世家，就喺中原建立塢堡來自救，一啲去唔到南方嘅難民就就地投靠呢啲塢堡，求助呢啲家族，令呢啲家族喺中原勢力大增，胡人唔敢逳呢啲家族。

不過雖然中原人口劇降，但當時中原依然係中國人口最密集嘅所在，因此華夏文化並未喺中原剷除，相反重同化到外族，同時中原漢人多多少少胡化，呈現漢胡混合嘅形態。

南方開發

衣冠南渡係中國三大移民潮之一，當東晉喺南方建立嘅時候，中原嘅世家大族就南遷到南方，由於世家大族衣冠楚楚，所以叫做「衣冠南渡」。之後中原持續戰亂，而東晉偏安南方，只守住半壁江山，相對安寧，於是大量中原百姓南渡南方，人數多到朝廷要設置僑州安置百姓。

原本南方係百越人嘅地方，《漢書·地理誌》話：「自交趾至會稽七八千里，百越雜處，各有種姓」，之後又有畀炎黃部落攻破嘅九黎部落遺民流落南方形成嘅三苗人，但衣冠南渡嘅漢人移民潮令南方由百越三苗之地漢化成漢地。因此雖然北方因為破壞嚴重而部份野蠻化，但因為華夏文化取得南方嘅保留地就補返數。

漢人大量南遷令華夏文明取得由北到南嘅巨大縱深，之後歷代外族入侵中原，華夏正朔都可退居南方，喺南方保存咗華夏嘅衣冠禮樂、典章文物制度，保證中華文明延綿落來，而當中國統一時，南方保存嘅文明又北傳中原，方便如隋唐、明朝等王朝喺戰亂破壞嚴重嘅北方恢復中華。

漢人南遷喺漢化南方同時，亦同百越、三苗文化融合，產生咗南方漢語嘅格局，以及有住唔同北方特質嘅南方華夏文化。

衣冠南渡大多數人係南渡到江淮、江南一帶，亦都有去到嶺南，自此江南文化突飛猛進，成為同中原相提並論嘅文化中心，乃至視作「文化中原」，南方文化同北方文化分庭抗禮。

全球史角度

五胡亂華唔係得中國先發生嘅偶然事件，放喺當時，世界主要文明都前後受到蠻族入侵，由3世紀持續到6世紀，令世界各文明由古典文明變成中世紀文明。

喺當時世界上，遊牧民族自東向西陸續入侵各文明民族，先係中國五胡亂華，而後印度笈多王朝受匈奴襲擊而崩潰，之後輪到波斯帝國同拜占庭帝國，但其勢力擊退遊牧民族，最後遊牧民族一波波湧向最西面嘅羅馬帝國，羅馬帝國最後喺遊牧民族嘅衝擊下滅亡。

參攷

• 中華百科全書·五胡亂華
• 南溟網·五胡亂華及落後征服先進
• 五胡亂華及其歷史作用
• L.S.Stavrianos《全球通史》（上冊）第二編 歐亞大陸的古典文明（公元500年之前）第7章中國文明與第8章古典文明的終結 ISBN：0139238972
• 林語堂《吾國與吾民》第1章中國人民 ISBN:978-7-5399-3241-5