單次同多次繁殖

2015 年影到隻八爪魚乸守住自己啲（數以萬計嘅）蛋；隻乸嘅伴侶應該經已死咗，而且佢喺啲仔女出世之後都會同一下場。

喺生物學上，單次繁殖（semelparity，形容詞 semelparous）同多次繁殖（iteroparity，形容詞 iteroparous）係兩套相對嘅繁殖策略：

• 如果話一隻物種係「行單次繁殖」嘅，即係話呢隻物種啲典型個體係頂櫳生一次後代，生完就會死嘅；
• 而如果話隻物種係「行多次繁殖」嘅，就係指隻物種啲典型個體成世有得生好多次後代都得。

事實表明，呢兩套策略喺進化上都係可行嘅。

單次繁殖物種

好似八爪魚就係行單次繁殖嘅物種。喺交配咗一次之後，啲八爪魚公會進入加速嘅衰老而死亡，而啲八爪魚乸喺生咗蛋同守完啲蛋（一路唔食嘢，守到啲仔女出世為止）之後就會監生餓死。雖然噉做係會搞到阿爸阿媽死亡，但原則上又同時會令生態系入面多咗嘅空間同資源畀啲仔女生存。事實係生態學研究指，行單次繁殖嘅物種往往可以一次生大量嘅仔女－例如八爪魚雖然繁殖一次就死，但每次繁殖都閒閒哋生到數以萬計嘅後代。

多次繁殖物種

好似人類、貓同狗就係行多次繁殖嘅。喺呢啲物種當中，一對典型嘅父母一世可以生多次細路，而且每次生嘅後代數量唔多－貓同狗每次頂櫳生嗰幾隻後代，人就係每次通常生一兩個，而且唔會話生完父母就死。事實係，哺乳類差唔多冚唪唥都係行多次繁殖嘅。

睇埋

• R/K 選擇理論
• 一年生植物
• 多年生植物
• 食物鏈
• 物競天擇

文獻

• Fritz, R.S.; Stamp, N.E.; Halverson, T.G. (1982). "Iteroparity and semelparity in insects". The American Naturalist. 120 (2): 264-68.