字符（英文：character）喺程式編寫上係資料類型嘅一種，概念上係獨立嘅一種資料類型，表示一個單個嘅文字符號，而所表示嘅符號就算係一個數字都視佢為一個符號而唔當符號所表達嘅數值處理。
由零個或以上字符組成嘅資料，叫做字串。
喺實際應用上，個別嘅程式語言未必有獨立嘅字符資料類型 。例如，喺 Perl 只有字串，冇字符；又例如，喺 C 語系，字符（char，美式讀音：/tʃar/）係整數嘅一類，特指兩種一個位元組可以裝得落（即係可以用來當內碼表示 ASCII 字符）嘅整數。
