比卡超
比卡超（粵拼：Bei2 kaa1 ciu1；日文：ピカチュウ；英文：Pikachu），任天堂官方國語譯名用皮卡丘做中文名，係田尻智諗出嚟嘅日本電視遊戲寵物小精靈系列入面嘅標誌精靈。佢個身大部份係黃色、背脊帶啡色紋、有紅色面珠，望落似老鼠，加有一條閃電咁嘅尾。喺咁多套寵物小精靈作品之中，佢多數都做主角之一，所以幾受觀眾尤其係細路同女仔喜愛。
寵物小精靈全國圖鑑編號025嘅電系寵物小精靈。佢嘅進化形係雷超。身高係1尺4吋，體重係13磅。有好多隻走埋一齊嗰陣會積聚形成雷電。電極會喺佢嘅臉頰度儲住，佢哋受到外來刺激嗰陣會喺一剎那間放電，力量有天然閃電咁勁。搵到新事物嗰陣又會向佢放電，將佢燒成黑色。同樣對住佢鍾意嘅嘢食——果實——都會有咁嘅反應。
喺遊戲入面
[編輯]佢哋大多棲息喺森林同埋原野，但係好難搵，寵物小精靈黃版就例外。喺咁多隻遊戲入面，佢最多出現喺常磐森林同發電廠。寵物小精靈黃版嘅主角直情係佢，而黃版唯一肯定唔使捉佢嘅遊戲。佢冇喺第二代遊戲度出現，而寵物小精靈紅寶石／籃寶石／綠寶石版入面就只會喺Safari Zone度搵到佢。喺寵物小精靈鑽石／珍珠／白金版，佢會喺Trophy Garden度出現。
比卡超亦試過喺其他非寵物小精靈嘅遊戲嗰度出現，例如係Wii大亂鬥。
動畫入面嘅比卡超
[編輯]喺動畫入面，佢係大木博士送畀主角小智嘅第一隻精靈。初頭佢好唔聽話，完全唔理小智嘅命令亦都唔鍾意畀人收喺精靈球入面。
譯名爭議
[編輯]2016年5月10號，香港任天堂公佈第一代151隻寵物小精靈嘅官方「統一」中文譯名，其中大部份名稱同香港當地常用譯名（亦係本來嘅香港官方譯名，經日本方面確認過）唔同，仲要違反粵語。例如將啱粵音嘅「比卡超」改做依據官話（普通話或中華民國國語）嘅、本來係喺中國大陸同臺灣等地先至用嘅「皮卡丘」。噉做法引起香港好多人不滿。除咗引發愛好者抗議[1]，亦都畀語文學界、傳媒界、粵語配音動畫觀眾等等批評係「以普代粵」，唔尊重香港語言。[2][3][4][5]
香港人發起過聯署、遊行等等嘅各種抗議，不過日方當做耳邊風。2017年12月起，奇妙電視喺香港播出新一輯電視動畫，用晒「統一」中文譯名，唯獨係字幕顯示「皮卡丘」嗰陣，配音就多數講「Pikachu」（不過都有少數情況用粵音讀出「皮卡丘」三字）。至於2019年5月上映嘅真人電影《POKÉMON 神探Pikachu》就直接套用英文「Pikachu」。
參攷
[編輯]- ↑ 〈皮卡丘？比卡超？卡通人物译名在香港惹争议〉。《BBC 中文网》。
- ↑ 一群《寵物小精靈》粵語配音動畫愛好者 (2016-06-02)。〈一群粵語配音動畫觀眾對《寵物小精靈》近日譯名爭議的聲明〉。《HKDoujin 香港同人》 (中文)。
- ↑ 伍家謙 (2016-05-15)。〈Sunday Fever：來談談繙譯吧！〉。《蘋果日報》 (中文)。原著喺2021-03-17歸檔。喺2021-03-17搵到。
- ↑ 星河千帆 (2016-02-28)。〈《任天堂早已定下「寶可夢」 扮關心香港卻以普代粵》〉 (中文)。
- ↑ 萬宗綸 (2016-06-13)。〈當「皮卡丘」入侵香港：譯名在地化之爭〉。《轉角國際》 (中文)。聯合報。