薑餅人 (童話)

《薑餅人》（粵拼：goeng1 beng2 jan4；英文：The Gingerbread Man）係一個幾出名嘅童話故事，喺 1875 年嘅美國出版。呢個故仔講到一塊薑餅人跑得好快，但係依然難逃被食落肚嘅命運^[1]。

情節

「跑啦！跑啦！有咁快得咁快！你捉我唔到！我係薑餅人！」^{[英 1]}

－薑餅人句口頭禪^[1]

話說有一日，有個好擅長整糕餅嘅大媽喺度整薑餅人，想畀波比bo1 bi4仔^{[英 2]}食。大媽將薑餅人整到好似一個男仔噉嘅形狀，再放入焗爐嗰度焗。正當佢打開焗爐想攞焗好嘅薑餅人出嚟嗰陣，塊薑餅人竟然一嘢彈起，仲開始跑，跑得好快，大媽追唔到。

大媽嗌埋佢老公過嚟一齊追。兩公婆都追唔到。

兩公婆嗌埋佢哋隻狗嚟一齊追，但薑餅人好快噉爬咗上樹，隻狗淨係可以喺樹下面吠。

薑餅人見到啲人類追佢追到個個都喘嗮氣噉嘅樣，就好得戚。點知喺呢個時候，有隻馬騮出現，馬騮身手好敏捷，一嘢就捉住薑餅人。波比仔本來喺樓上睏晏覺，畀佢哋嘈醒咗。波比仔落到嚟，就由馬騮手上接過薑餅人。波比仔見到薑餅人望落好好味噉，就擘大個口，食開始喊嘅薑餅人。

波比仔完全唔在意薑餅人嘅眼淚。

咬咗一啖。薑餅人兩隻髀冇咗。

薑餅人大嗌：「呀！！我嘅三分一冇咗！」

又咬一啖，薑餅人嘅身體同手冇咗。

薑餅人繼續嗌：「呀！！我嘅三分二冇咗！」

最後嗰啖，要食薑餅人嘅頭。

薑餅人最後慘叫一句：「呀！！我完全消失喇！」

最後，波比仔食得好飽好滿足。完。

亦有啲版本話，薑餅人最後係畀隻狐狸食落肚嘅。