跳去內容

錢

改拎
呢篇文係一篇好文。想知更多，請撳呢個掣。
出自維基百科，自由嘅百科全書

  想搵第二個意思嘅話，請睇錢 (搞清楚)。
  想搵日常買賣用實錢嘅話，請睇通貨。
廿一世紀初喺唔同經濟體裏面流通嘅銀紙

喺經濟學上，錢（粵拼：cin2*4）係指任何响一個經濟體內普遍接受可以攞嚟支付貨品服務以及還債嘅嘢。錢係一樣源於貿易嘅需要而有嘅發明[1]，喺一個經濟體裏面扮演咗多種重要功能[2][3]：

  • 交易媒介：交易唔使吓吓都齋靠唔方便嘅以物易物；
  • 價值量度：幫手為每樣貨品服務俾個數，表示嗰樣嘢嘅價值，所以一樣嘢要攞嚟做錢，佢必需要容易量化；
  • 儲起價值：幫手儲起經濟價值，等人可以做長遠嘅經濟考慮，所以一樣嘢要攞嚟做錢，佢實要有返咁上下襟擺；
  • 延期支付嘅標準：用嚟為債標價值，等人可以客觀噉量度「呢個呢個人爭咗幾多錢」，並且令借錢可行，借錢喺現代經濟體入面不可或缺。

一個經濟體嘅貨幣供應包含佢內部嘅通貨（包括銀紙同銀仔）嘅總量，仲可以加埋活期存款（喺各種銀行戶口入面嘅錢）。一個政府要點管理自己個經濟體嘅貨幣供應，係財政政策上嘅重要課題，例如亂咁印銀紙會搞到貨幣供應多得滯令錢價值下降，造成通脹，而通脹嘅情況會搞到啲人對隻錢失去信心，後果可以好大鑊[4][5][6]。

概論

[編輯]
睇埋：經濟學、貨幣經濟學同理財

喺經濟學史上，英國經濟學家威廉·斯坦利·傑文斯[e 1]係首個正式分析錢嘅四大功能嘅人，佢提出咗交易媒介、價值量度、儲起價值同埋延期支付嘅標準四個概念，而佢嘅諗頭俾人喺 1919 年用噉嘅兩句嘢概括[7]：

「
原版英文：

"Money's a matter of functions four,
A Medium, a Measure, a Standard, a Store."

粵文翻譯：

錢有四個功能；一個媒介、一個量度、一個標準、同一個儲藏。
 」

呢個對句喺英文入面順口又押韻，所以唔少英文嘅經濟學教科書攞佢嚟簡短概括錢嘅基本概念[8][9]。

舉例說明，想像有兩個人，A 君同 B 君；A 君專長係煮飯，B 君專長係起屋，而家陣 B 君想食 A 君煮嘅飯餸，但 A 君要生活，唔可以吓吓免費幫人煮飯，所以如果 B 君想要攞 A 君煮嘅飯餸，佢就要俾返啲有價值嘅嘢 A 君。喺一個原始經濟體當中，B 君可以用以物易物嘅方法[10]，例如係幫 A 君整屋嚟換取飯餸；但如果 A 君唔需要人幫佢整屋嘅話，噉 B 君就會冇價值俾得到 A 君－單交易做唔成。而家想像有一樣嘢 X，X 係普遍有價值嘅，可以攞嚟換做任何嘅貨品或者服務都得，噉單交易就做得成－B 君可以幫人起屋賺取 X，跟住喺佢想食嘢嗰時俾某個量嘅 X 俾 A 君，等 A 君打後有得用佢做廚師賺返嚟嘅 X 去換取佢自己想要嘅嘢，而 X 可以以銀仔或者銀紙等嘅多種方式存在－X 就係錢；而且有咗 X，佢哋仲可以令唔同貨品服務有個共同單位量度價值（呢件貨值幾多幾多 X），而儲起 X 仲可以用嚟儲起自己嘅經濟價值[11][12]。

喺粵語當中，錢呢樣嘢有多個名：星加坡、馬來西亞、越南有人嗌錢做鐳leoi1，而古代漢人就有稱之為泉幣；除此之外，粵語口語亦可以借英文 money 稱錢做（用粵拼寫）man1 ni4。

四大功能

[編輯]

喺現代經濟理論當中，錢一般會抽象化成具有以下功能嘅物件：

  • 交易媒介[e 2]：錢普遍有價值，所以每個人手上攞住若干量嘅錢，就有得各自噉用自己嘅錢嚟同其他人換嘢；相比之下，好多貨品服務都係冇普遍價值嘅，例如一個鎚仔對做建築工程嘅人嚟講有用，但對一個廚師嚟講就未必咁有用，所以喺一個冇錢嘅經濟體當中，一個手上攞住一柞鎚仔嘅人，有得同建築工人同建築工程師做交易，但想要同廚師做交易就難啲[2]。
  • 價值量度[e 3]：錢普遍可以攞嚟換嘢，所以可以攞嚟量度貨品服務嘅市場價值，每樣貨品服務都可以俾個數字佢，明確噉表達佢值幾多錢；相比之下，喺一個以物易物經濟當中，要量度一樣貨品服務嘅價值，就要用「呢件嘢值 3 個鎚仔」或者「呢件嘢值 30 粒釘」等嘅方法量度－好撈絞[13]。
  • 儲起價值[e 4]：錢可以輕易噉儲起，然後隔一段時間之後提取返出嚟－令人可以做投資等長遠經濟考慮；相比之下，有好多物品都唔啱用嚟儲起價值，例如生果同牛奶等嘅食物同飲品噉，雖然有價值，但因為佢哋唔擺得耐，所以做唔到長遠噉用嚟儲起經濟價值[2]。
  • 延期支付嘅標準[e 5]：錢普遍有價值，可以攞嚟做延期支付－兩個經濟個體可以講明「家陣呢個人借咗幾多幾多錢，會喺某段時間內還錢」；錢嘅存在令到借貸嘅活動變得容易，而喺現代社會當中，借貸令到人有得（例如）問銀行借錢搞生意，事業有成之後還錢俾銀行，令到好多唔借錢就唔夠本錢搞生意嘅人有得搞生意－變相幫助咗長遠嘅經濟增長[14]。
有位食客擺低咗大約一百文港紙嚟埋單。如果餐廳老細唔相信「錢賺咗返嚟可以自己使」（交易媒介）嘅話，佢會唔會接受食客嘅行為呢？
有位食客擺低咗大約一百文港紙嚟埋單。如果餐廳老細唔相信「錢賺咗返嚟可以自己使」（交易媒介）嘅話，佢會唔會接受食客嘅行為呢？ 

重要特徵

[編輯]
一個出自 16 世紀法國嘅金幣；金幣好襟擺，擺咗幾個世紀咁耐都仲可以好新淨。
睇埋：貴金屬同稀缺

為咗有效噉做各種錢嘅功能，一樣攞嚟做錢嘅嘢需要有以下特質[15][16]：

  • 不分[e 6]：一個單位嘅錢同另外都係一個單位嘅錢冇分別，即係話所有一文都係一樣嘅，所以兩文都係一樣嘅而且價值等同兩個一文... 如此類推；
  • 耐久[e 7]：要有返咁上下襟擺（唔易腐壞），令一個持有錢嘅人會有信心佢啲錢過咗（例如）十年之後都仲會喺度，所以銀仔同銀紙比牛奶更加啱用嚟做錢；
  • 易攜[e 8]：要容易攞上身隨身攜帶，等啲人有得輕易噉身上帶一筆錢出街買嘢，方便個經濟體內部嘅交易，所以銀仔同銀紙比起金條（金條重好多）更加啱用嚟做日常用嘅錢；
  • 易認[e 9]：價值要容易量化，容易用數字表達某某人「有幾多錢」，做會計嘅工作唔會太撈絞；
  • 保值[e 10]：錢嘅價值源自人對佢嘅信心，所以錢嘅價值唔可以大上大落，即係話用嚟做錢嘅物件嘅供應要易控制，好似銀紙同銀仔噉，要整銀紙同銀仔要相當嘅技術（而且現代嘅銀紙同銀仔有大量防偽特性），所以基本上除非中央銀行印銀紙，否則個經濟體內嘅貨幣供應好難有明顯改變，而供應穩定就表示價值會穩定；相比之下，貝殼並唔適合攞嚟做錢，因為啲人隨手喺沙灘就會執到一大堆，而且政府同央行難以控制貝殼嘅供應。

以一個銀仔為例，銀仔係一種好啱用嚟做錢嘅物件：銀仔近乎個個都係一個板嘅（不分）；好似銀同銅等常用嚟整銀仔嘅物料好襟擺（耐久）；銀仔細細粒噉，普通人可以輕易帶一大柞喺身（易攜）；銀仔易數，每個銀仔都有個數字喺上面表達佢值幾多錢（易認）；而且要控制銀仔嘅供應相對容易－整銀仔需要高技術，普通人想整假銀仔好難，要大量整假銀仔更難，所以差唔多係得中央銀行能夠控制經濟體內嘅銀仔數量（保值）[15]。

歷史

[編輯]
内文：錢嘅歷史
睇埋：以物易物

早期嘅人類社會有用開以物易物，但並唔用以物易物為主導嘅[17]：早期人類社會冇錢呢家嘢，而以物易物似乎可以追溯到公元前超過 100,000 年，不過交易就主要以禮物經濟以及債等嘅方式嚟運作嘅[18]－當時嘅社會多數以細部落為主，啲人彼此之間相熟，所以好多時肯冇條件噉將有價值嘅嘢送俾同族嘅人，彼此之間有無形嘅合作關係；而以物易物嘅做法就主要用於陌生人同可能嘅敵人（即係未必信得過嘅人）[19][20]。

喺錢嘅歷史當中，最早期嘅錢係商品貨幣。公元前 3000 年，米索不達米亞文明就有喺度用「相當於幾多粒大麥嘅重量」做度重量嘅指標，並且用呢啲指標做交易[21]。同期嘅美洲、亞洲、同非洲就興用貝殼做錢（有講法話，現今漢字當中同錢有關嘅字好多都從貝部，就係呢個原因[22]）。根據古希臘史學家希羅多德（公元前 484 至 425 年），利底亞（位於現今土耳其西半橛嘅一個古國）嘅人係世上首次使用金幣同銀幣嘅[23]，而據現代史學家估計，利底亞人係喺公元 650 至 600 年嗰陣開始整呢啲銀仔嘅[24]。

公元前 640 年嘅一個利底亞金幣
公元前 640 年嘅一個利底亞金幣
 

銀紙史

[編輯]
1160 年宋朝嘅一張會子

商品貨幣嘅使用又造就咗法定貨幣，尤其係銀紙：喺遠古社會，商人興用金同銀做交易基準；貴金屬有少少似商品貨幣（本身或多或少有啲價值，例如可以攞去熔咗佢，做有經濟價值嘅嘢），但又有少少似法定貨幣（尤其係金幣同銀幣等嘅銀仔）；商人同銀行好多時會發單俾存戶，俾佢哋用張單換取商品貨幣－例如個商人想借錢搞生意，於是開張有法律效力嘅單俾銀行，應承會喺某段時間內還相當於若干金銀嘅價值。呢種做法慢慢令到人習慣咗用「由某啲有公信力嘅組織發嘅紙」嚟做交易－最後引致咗銀紙喺中世紀嘅誕生[25]：

宋朝（公元 960 至 1279 年）係人類史上最早用銀紙嘅經濟體。喺唐朝（公元 618 至 907 年）尾橛同宋朝時期，漢人發覺有需要搵啲冇銀仔咁重嘅物件做錢，再加埋印刷技術上嘅創新，就引起咗銀紙呢樣發明，令商人做起貿易上嚟輕鬆啲。喺 10 世紀，宋朝政府開始印銀紙（交子），並且將呢啲銀紙發俾鹽商業入面嘅商人，仲俾某幾個組織獨攬發行銀紙嘅大權，俾人民同時用銀紙以及商品貨幣做交易。而喺 12 世紀，宋朝政府索性吸收埋呢啲組織，自己發行銀紙，不過呢個時期嘅銀紙好多時係地區性嘅（一個省用嘅銀紙去到第個省就用唔到），而要去到成 13 世紀，先有一個全國流通嘅銀紙－達致咗同現代銀紙相似嘅使用同組織方法[25][26]。

歐洲要去到 17 世紀先開始有銀紙呢回事：歐洲人由宋朝同元朝嗰度聽過銀紙呢家嘢[27]，但要去到 1661 年，瑞典開始使用銀紙，先令歐洲人開始有咗「用紙造錢」嘅技術；瑞典有豐富嘅銅礦，所以銅喺瑞典好平，要令人對銅銀仔嘅價值有信心，就焗住要整大嚿啲嘅銀仔，但噉做又搞到帶銀仔出街撈絞好多－令瑞典人零舍有意慾發明輕便啲嘅錢[28]。瑞典開始用銀紙之後，歐洲諸國開始發覺銀紙嘅好處，例如係幫手減少運送金銀嘅需要，降低流失金銀嘅風險，又幫手令到借金銀容易啲（因為有咗銀紙，實質金銀唔使離開借錢人嘅金庫，令借錢呢家嘢對借錢人嚟講風險細啲）；於是自從嗰陣開始，歐洲人就開始大幅全面噉採用銀紙。而到咗今日，世界各大經濟體當中都有銀紙流通[29]。

金同銀嘅使用

[編輯]
睇埋：複本位制

喺 15 至 16 世紀，金同銀呢兩種貴金屬一般都俾人當係法償（有法定支付能力嘅貨幣），政府會接受用金銀交稅、並且好多仲規定埋金銀之間嘅兑換比（金銀複本位制[e 11]）。但喺 19 世紀，金同銀之間嘅供應量大升，而且比例變得唔穩定，於是世界各地政府開始以「值幾多金」同「值幾多銀」做基準衡量一種錢嘅價值，並且印銀紙，用銀紙嚟支付各種嘅政府開支（例如係出糧俾軍人等）[30]。

廿世紀係一個劣幣驅逐良幣[e 12]嘅時期。到咗 1900 年，工業化嘅國家多數都採用咗以金衡量價值嘅準則（金本位[e 13]），並且用銀幣以及銀紙嚟做流通交易媒介。世界各地嘅私有銀行同政府跟從劣幣驅逐良幣嘅原則：好似金同銀呢啲有價值嘅錢變成攞嚟儲，而銀紙等冇價值嘅錢攞嚟交易。呢個進程由廿世紀初開始，慢慢散佈到全世界，而喺廿世紀後期，各大經濟體冚唪唥都採取咗以法定貨幣為交易媒介嘅做法－直接用金銀呢啲貴金屬做日常交易經已好少見[31]。

貨幣供應

[編輯]
有人喺度用機印銀紙。
内文：貨幣供應
睇埋：中央銀行同金價

貨幣供應[e 14]大致上係指一個經濟體內部嘅錢嘅總量：喺經濟學上，錢包含所有可以用嚟做上述嗰柞錢功能嘅物件－包括咗銀紙、銀仔、銀行入面嘅活期存款、以至存在於電子空間嘅數碼貨幣（例子可以睇位元幣）呀噉。因為理想嘅錢係一啲易數嘅嘢，所以雖然呢啲物件喺物料上咁唔同，但做經濟分析嘅人可以用同一個單位計呢啲物件嘅價值（例：一張 10 文銀紙價值上等同 10 個一文銀，雖然銀紙同銀仔喺物理上好唔一樣）。一個經濟體嘅貨幣供應包含佢內部可以用嚟買貨品服務嘅錢嘅總數[32]。

現代貨幣理論

[編輯]
内文：現代貨幣理論

根據現代貨幣理論[e 15]，貨幣供應嘅上落係經濟活動嘅主要帶動因素，所以主宰住貨幣相關政策嘅中央銀行能夠做經濟上嘅調控－佢哋能夠合法噉（例如）通過印銀紙同控制利率等嘅手段嚟刺激一個經濟體嘅經濟增長，而且喺經濟衰退嗰時，央行仲可以用同樣嘅方法幫手刺激經濟[33]。現代貨幣理論建基於以下呢條式[34]：

；當中
係貨幣供應，
係速度（[e 16]定義為「每年經濟體內使錢率」），
係貨品服務嘅價格，
係貨品服務總量。

假設 係恆定嘅，央行可以透過調節 嚟左右 同 [34]。

值得一提嘅係，上述條式當中嗰個 可以有多個方法量度，分做 、、、同 等多種：（又有叫 ）係最基礎嗰種貨幣供應， 喺 之上再加啲嘢，而 又係 之上再加啲嘢... 如此類推。對於呢幾種貨幣供應點定義，唔同國家地區有少少差異，不過一般嚟講， 會包括市場流通度[e 17]最高嗰啲錢，例如係流通緊嘅銀仔同銀紙呀噉，而 同 會包括一啲市場流通度比較低嘅錢，例如一啲長期嘅銀行存款（好多時冇得即時變做現金攞去使）[35][36]。

美國喺 1981 年至 2012 年間 、、同 分別嘅變化
美國喺 1981 年至 2012 年間 、、同 分別嘅變化
 

貨幣管理方法

[編輯]
香港金融管理局大樓正門外面，2009 年；金管局功能上可以話係香港嘅中央銀行。
内文：貨幣創造同部份準備金

貨幣創造[e 18]係指創造錢，提升經濟體內貨幣供應嘅過程。是但搵個經濟體，間央行嘅經濟分析師會監察住個經濟體內嘅貨幣供應－佢哋會靠各種方法，例如睇存款紀錄同物價等，估計個經濟體內有幾多錢流動緊，計出 、、、同 分別大致上係幾多；再評估吓有冇需要增加貨幣供應，而如果要，貨幣供應應該升幾多[37][38]。

喺決定咗要提升貨幣供應之後，央行就要郁手做。喺廿一世紀嘅經濟體入面，貨幣創造主要有兩種方法：

  1. 法定貨幣（）：指央行直接了當噉生產若干量嘅高流通度嘅錢（現金）－即係郁手印銀紙同整銀仔，然後（例如）央行會用呢啲錢買政府債券，政府跟手會用呢啲錢出人工俾公務員，於是呢啲錢就流入咗經濟體當中[37]；
  2. 銀行貨幣（ / ）：另一方面，私營銀行可以增加借錢俾經濟體內嘅人，等佢哋（簡單啲講）將借返嚟嘅錢好似個經濟體當中有額外錢噉嚟使。呢啲錢嘅流通度比較低－銀行通常都唔能夠即時將呢啲錢即時變嗮做現金[37][39]。

喺廿一世紀嘅經濟體裏面，銀行一般都會用部份準備金[e 19]嘅做法；即係話，銀行喺得到啲人想儲入佢哋度嘅錢之後，會留起一部份－以現金同市場流動度高嘅資產嘅型式－做儲備，等人用得到活期存款；跟手佢哋會將冇攞嚟做儲備嗰啲借出去，噉做會有一定風險－假如發生擠提（好多人突然走去提款）嘅情況，銀行可能會唔夠錢俾啲客；但另一方面，噉做又會增加錢嘅供應量，對刺激經濟嚟講至關重要－人搞生意往往要使好多錢，唔借錢搞唔起，所以部份準備金嘅做法間接令個經濟體當中多咗好多投資，而投資正正係經濟增長必需嘅一環（睇埋本地生產總值）。亦都因為呢個緣故，喺現代嘅經濟體入面，廣義嘅錢總供應量[e 20]基本上實會大過央行印銀紙同整銀仔所造出嘅錢供應量（貨幣基數）[40]。

貨幣政策

[編輯]
内文：貨幣政策
睇埋：央行

貨幣政策[e 21]係指控制貨幣供應嘅權威－正路係政府同央行－所作嘅政策。政府同央行可以管理好多嘢，例如係印銀紙增加貨幣供應，又或者加減利率等等。佢哋會用呢啲手法，嘗試盡可能噉令個經濟體嘅經濟活動得以順利進行[41]。

喺經濟學上，貨幣政策係一個好緊要嘅課題。好似係通脹等嘅現象可以對民生造成巨大嘅衝擊。一個好經典嘅例子係津巴布韋元[e 22][42]：津巴布韋元曾經係非洲南部國家津巴布韋嘅貨幣，但係因為政府管理不善，搞到津巴布韋國內由 1990 年代尾開始就有極嚴重嘅通脹，啲錢變到愈嚟愈冇價值，而啲貨品同服務嘅價錢係噉升，搞到政府要係噉印大啲面額嘅銀紙，打後仲出咗驚世嘅面額 100 萬億文嘅銀紙。最後喺 2009 年 4 月，津巴布韋政府索性停用津巴布韋元改用美元做貨幣，單嘢先至收到科。自從嗰陣之後，津巴布韋元喺經濟學界間唔中就俾人攞嚟做「失敗貨幣」嘅例子[42]。

各經濟體嘅央行會儲金條，用嚟做價值儲藏。
各經濟體嘅央行會儲金條，用嚟做價值儲藏。
 

喺制定貨幣政策嗰時，政府同央行有好多工具可以用，包括[40][43]：

  • 利率[e 23]：當央行提高利率嗰陣，啲人問央行借錢就要俾多啲利息，於是就會少咗人借錢，少咗人借錢就會造成貨幣供應下降（睇返上面部份準備金），反之亦然。
  • 用自己資產買賣錢；
  • 提升或者降低政府借貸；
  • 提升或者降低政府開支（政府用由央行得到嘅錢出糧俾公務員係錢進入市場嘅一個重要途徑）；
  • 操控滙率；
  • 提升或者降低部份準備金當中嘅最低儲備率[e 24]；
  • 調控或者禁止私營貨幣；
  • 調控對出口或者進口嘅稅。

貨幣政策本嚟係同採礦業息息相關嘅：喺古代，金同銀廣泛噉俾人攞嚟做錢，所以要提升貨幣供應，往往要靠採礦業開採多啲金銀先得；當金銀供應量突然飆升－例如喺哥倫布發現咗新大陸（搵到好多金礦），或者係 19 世紀中嘅加州淘金潮[e 25]事件，都引致通脹嘅情況－金同銀多咗，因而變得冇價值，搞到物價飆升；另一方面，如果採礦業開採金銀嘅速度唔夠快，追唔上經濟發展（經濟發展會令社會多咗貨品服務流通），會造成通縮－金同銀唔夠用，所以物價跌。後者呢類通縮情況就算喺（有銀紙嘅）18 同 19 世紀都仲好常見，因為呢個時期唔指用金做錢，仲興用金嚟支持銀紙[44]。到咗廿世紀，各大經濟體系變成建基於法定貨幣，計呢啲錢嘅價值唔使吓吓都掕埋黃金價值，所以現代嘅貨幣政策開始同採礦業脫離[45]。

類型

[編輯]
睇埋：錢幣學

按本身價值

[編輯]
睇埋：金本位

用嚟做錢嘅嘢可以按「本身有冇價值」分做兩大種：商品貨幣同法定貨幣[2][15]。

商品貨幣

[編輯]
一個冇面額嘅金幣
内文：商品貨幣

商品貨幣[e 26]係指一啲本身有價值、攞嚟做錢嘅物件[46]。例如一個經濟體可以用粟米粒乾（好襟擺）嚟做錢買賣，粟米粒乾本身有價值（食得），可以用嚟滿足人嘅慾望，所以如果用嚟做錢會係一種商品貨幣。喺人類史上，有好多物件都試過俾人用嚟做商品貨幣，例如係貴金屬（金銀等）、貝殼、米粒、鹽、酒精、煙仔、大麻草、糖、同大麥等嘅稀缺資源都有喺某啲時期或者地方俾人攞過嚟做錢，而且亦有案例喺某啲情況有多過一種商品貨幣同時俾人用嚟做錢[47]。要留意嘅係，呢條界有陣時係有啲含糊嘅，例如金幣噉，一個金幣好多時並冇標明個價值（個金幣上冇任何數字表示佢值幾多錢），而個金幣嘅價值由佢嘅金含量話事，喺呢個情況下，呢款金幣偏向有少少似商品貨幣[48]。

商品貨幣嘅使用查實就同以物易物經濟好相似，商品貨幣起碼能夠充份噉擔當交易媒介同價值量度（等所有貨品服務有個共同嘅價值量度單位）嘅功能，不過佢哋喺做儲起價值功能嗰時就未必咁理想，而且好多時亦有供應量難控制嘅問題[47][49]。

法定貨幣

[編輯]
内文：法定貨幣

法定貨幣[e 27]係一啲本身毫無價值嘅嘢，例如銀紙噉，銀紙唔食得、唔飲得、基本上唔可以攞嚟滿足任何慾望，而且亦都冇保證佢可以攞嚟換啲有價值嘅嘢（想像人類社會冧，啲法定貨幣即刻冇嗮用）。一款法定貨幣之所以可以攞嚟做錢－俾人當成有價值－係因為有個有公信力嘅組織（好似係政府）宣佈要用呢樣嘢做錢，令到「唔接受用呢樣嘢俾錢」變成唔合法。「有個有公信力嘅組織」呢一點好緊要：因為個政府有公信力，啲人至有信心如果經濟冧起上嚟，佢哋可以攞住啲錢去搵政府，換返啲有價值嘅嘢，等自己有保障。廿一世紀世界各大經濟體用嘅通貨冚唪唥都屬法定貨幣[50][51]。

以物理型式存在嘅法定貨幣（銀仔同銀紙呀噉）可以受損，但可以換。呢個係法定貨幣相對於商品貨幣嘅一個優勢：世界多地都有法律講明「一件法定貨幣受損嗰時要點更換」，所以一個人手上嘅法定貨幣如果崩咗或者點，佢大可以攞去銀行嗰度換過啲新、面額相同嘅法定貨幣，例如美國政府就肯喺「張銀紙冇咗嘅部份少過一半」或者「有證據表明張銀紙係俾人整爛嘅」嗰時更換一張美元銀紙；而相比之下，一件商品貨幣整爛咗要換就難啲[52]。

再廣義上啲，代表性貨幣[e 28]泛指一啲本身毫無價值嘅錢，例如係古代嘅人買嘢可能會俾一張借據（而賣家因為某啲原因信佢張借據），等賣家事後攞住張借據去換返經濟價值。法定貨幣可以話係代表性貨幣嘅一種，特別指有官方法律效力嘅代表性貨幣[53]。

按物理性質

[編輯]

除此之外，用嚟做錢嘅嘢又可以按物理性質分類，例如法定貨幣可以分做用紙整嘅銀紙同用金屬造嘅銀仔等等。

銀仔

[編輯]
一柞銀仔
内文：銀仔

銀仔[e 29]喺經濟學定義係細小、平、又偏圓形嘅一嚿金屬或者塑膠，用嚟做錢。初時嘅銀仔多數都係用金同銀等嘅貴金屬整嘅，目的在於令到用嚟做錢嘅貴金屬重量有個易數嘅單位。但到咗今日，世界各大經濟體都有用銅等非貴金屬整嘅銀仔，而各經濟體都會用各種方式（自己掘或者進口）取得金屬，並且用呢啲金屬整一啲重量一致嘅銀仔。銀仔可以偽造，但喺人類史初期幫手創造一個錢嘅單位，令價值量度做起上嚟更容易，間接令銀行成為可能。打後阿基米德原理[e 30]嘅發現令測試銀仔嘅重量同金屬純度更加容易，又令整假銀仔更難，促進咗銀仔嘅使用[54]。

喺會用銀仔嘅經濟體當中，個銀仔用乜金屬造往往同佢面額有關：金最值錢，所以有金嘅銀仔最大面額，其次係銀，再落係銅。金幣往往俾人用嚟做大面額嘅交易，例如係政府消費等等；銀幣通常俾人用嚟做中等大細嘅交易，會俾人用嚟數稅、合同、同債嘅價值；而銅幣就係俾人攞嚟做日常生活嘅交易。呢個系統喺遠古印度經已存在，而中世紀嘅歐洲一路都用，連現代嘅經濟體都會用呢套「用物料分銀仔價值」嘅系統[54][55]。

銀紙

[編輯]
内文：銀紙

銀紙[e 31]係由銀行發行、用紙整嘅錢。一張銀紙上面通常會有個數字（面額）表示張紙值幾多錢（易數），可以攞嚟俾錢。喺要提升貨幣供應嗰時，央行會用機械大規模噉印銀紙出嚟。同銀仔相比，銀紙有好有唔好，例如係[56]：

  • 因為造料嘅關係，銀紙比較易爛，但同時又比較輕便易攜。
  • 銀紙本身毫無價值－而銀仔因為用有價值嘅金屬造，所以就算啲人對隻貨幣失去信心，手上有大柞銀仔嘅人都可以（例如）熔咗啲銀仔佢，再用所得嘅金屬得到經濟價值（銀仔一定程度上算商品貨幣）；發行貨幣嘅組織可以任意噉印銀紙，所以政府梗會鍾意儲住柞金銀，等自己「手上有幾多價值」有個保障。
  • 銀紙本身冇價值，比較容易造成經濟泡沫[e 32]，而當人對銀紙失去信心，開始要求「硬」啲嘅錢（例如銀仔）嗰時，就可能會造成「硬錢」供不應求，可以搞冧個經濟；事實係，喺銀紙使用早期，歐洲同美國嘅經濟專家都係因為呢個原因而對銀紙抱懷疑態度[29]。

等等。

嚟自世界各地嘅銀紙；幅相係 2014 年影嘅。
嚟自世界各地嘅銀紙；幅相係 2014 年影嘅。
 

活期存款

[編輯]
一張支票可以攞嚟將活期存款轉做現金。
内文：活期存款

活期存款[e 33]係指無需任何事先通知，存款戶可隨時存取同轉讓嘅一種銀行存款：想像有個消費者，佢想買嘢，但手上唔夠現金；於是佢俾一啲有公信力嘅物件俾個賣家（例如一張寫明咗交易金額嘅支票），等個賣家相信「攞住呢件物件可以換取佢賣咗嗰件嘢值嘅錢」－呢啲錢就係所謂嘅活期存款。一般嚟講，銀行喺法律上有義務，喺一俾人要求佢將活期存款嘅錢交出嚟嗰陣乖乖地照辦。喺廿一世紀嘅經濟體當中，活期存款提款可以透過個人、支票同提款機等嘅途徑嚟做。呢種錢並唔係物理上存在嘅－佢哋只係銀行戶口入面嘅數字[57]。

一個經濟體嘅總錢供應量等如貨幣基數（銀仔同銀紙嘅總量）加埋商業銀行當中嘅活期存款嘅量，所以銀行用嘅部份準備金嘅方法－將存款當中嘅一部份變成現金借出去－可以提升錢嘅總供應量，間接刺激啲人消費同投資。而喺廿一世紀嘅經濟體當中，呢個過程創造咗大量嘅錢，好似係美國噉，2010 年 12 月嘅美國廣義錢供應量（）有成 88,534 億美元，當中得嗰 9,157 億（佔咗 嘅 10% 左右）係物理上存在嘅銀仔同銀紙[58]。

數碼貨幣

[編輯]
内文：數碼貨幣
睇埋：加密電子貨幣

數碼貨幣[e 34]係指淨係存在於電子空間嘅錢，例子有位元幣[e 35]。數碼貨幣係喺廿世紀後半橛，隨住資訊科技嘅發達而新興嘅：到咗 1990 年，美國央行同商業銀行之間傳嘅錢冚唪唥都係以電子型式存在嘅，而到咗 2000 年，多數存在喺銀行數據庫嘅錢都係屬數碼錢[59]，而喺 2012 年，20 至 58% 嘅交易都係用電子錢做嘅（呢個數字可以隨地區而有異）[60]。

數碼貨幣原則上會好方便，但有好多人都唔多接受到呢樣嘢，例如有好多專家都指出，數碼貨幣風險極高－廿一世紀初嘅數據顯示，數碼貨幣波動性高，價值容易大上大落，所以好多經濟專家對「數碼貨幣扮唔扮演到儲起價值嘅功能」抱懷疑態度[61]。

假幣

[編輯]
内文：假幣

假幣[e 36]係指犯罪份子喺冇政府同央行許可下整嘅偽造錢，現今世界各大通貨（包括港幣、人民幣、歐羅同美元等）都有人同佢哋整假幣[62]。整假幣係一種欺詐，而且俾人亂咁增加貨幣供應會擾亂經濟－造成通脹、持有錢嘅人喪失購買力、以及令人對隻錢失去信心呀噉[63]。所以世界各地嘅政府冚唪唥都會將整假幣定性為一種犯罪，例如係澳洲噉，喺 2019 年嘅澳洲，整假幣俾人拉到最高可以判坐 14 年監，係一種相當重嘅罪[64][65]。

喺人類文明史上，人一路有整假幣同對抗假幣：喺銀紙出現打前，啲人成日會用金屬純度唔夠高嘅銀仔做假幣（相比之下，堅嘅銀仔會用純度高嘅金屬造），打後阿基米德原理嘅發現令「判定一件物件嘅金屬純度」變得簡單，幫咗手對抗假銀仔[54]；喺銀紙出現後，整假幣嘅人就開始變成嘗試用打印機，印啲似真銀紙嘅銀紙出嚟－廿一世紀嘅銀紙往往會有一啲內置高技術（央行以外嘅人難模仿）嘅防偽特徵，而且影到銀紙喺入面嘅相多數會濛咗或者少咗忽[66][67]。

2016 年昆明一個牌；句標語呼籲人唔好用假人民幣。
2016 年昆明一個牌；句標語呼籲人唔好用假人民幣。
 

睇埋

[編輯]

文獻

[編輯]

英文文獻：

  • Greco, T. H. (2001). Money: Understanding and Creating Alternatives to Legal Tender, White River Junction, Vt: Chelsea Green Publishing.
  • Hartman, M. (October 30, 2017). "How Much Money Is There in the World?". I've Always Wondered... (story series). Marketplace. American Public Media. Retrieved October 31, 2017.
  • Keen, S. (February 2015). "What Is Money and How Is It Created?" Uses arguments from Graziani, Augusto (1989), The Theory of the Monetary Circuit, Thames Papers in Political Economy, Spring: pp. 1-26.
  • Lanchester, J. (August, 2019). "The Invention of Money: How the heresies of two bankers became the basis of our modern economy", The New Yorker, pp. 28-31.

詞彙

[編輯]

外語詞彙：

  1. ↑ William Stanley Jevons
  2. ↑ medium of exchange
  3. ↑ unit of account
  4. ↑ store of value
  5. ↑ standard of deferred payment
  6. ↑ interchangeability
  7. ↑ durability
  8. ↑ portability
  9. ↑ cognizability
  10. ↑ stability of value
  11. ↑ bimetallism
  12. ↑ bad money drives out good
  13. ↑ gold standard
  14. ↑ money supply
  15. ↑ modern monetary theory
  16. ↑ velocity
  17. ↑ liquidity；指一件物件有幾易可以攞嚟換第啲物件
  18. ↑ money creation
  19. ↑ fractional reserve
  20. ↑ broad money supply
  21. ↑ monetary policy
  22. ↑ Zimbabwean dollar
  23. ↑ interest rate
  24. ↑ reserve requirement；指銀行最少要儲住幾多百分比嘅錢做準備金
  25. ↑ California Gold Rush
  26. ↑ commodity money
  27. ↑ fiat money
  28. ↑ representative money
  29. ↑ coins，近似 kon1 si2
  30. ↑ Archimedes' principle
  31. ↑ banknote
  32. ↑ bubble；指一件物品嘅價錢遠超佢本身價值
  33. ↑ demand deposit
  34. ↑ digital money
  35. ↑ bitcoin，近似 bit1 kon1
  36. ↑ counterfeit money

來源

[編輯]

引述咗嘅文獻或者網頁：

  1. ↑ Milnes, Alfred (1919). The economic foundations of reconstruction. Macdonald and Evans. p. 55.
  2. ↑ 2.0 2.1 2.2 2.3 Mankiw, N. Gregory (2007). "2". Macroeconomics (6th ed.). New York: Worth Publishers. pp. 22–32.
  3. ↑ Mishkin, Frederic S. (2007). The Economics of Money, Banking, and Financial Markets (Alternate Edition). Boston: Addison Wesley. p. 8.
  4. ↑ Boyle, David (2006). The Little Money Book. The Disinformation Company. p. 37.
  5. ↑ Bernstein, Peter, A Primer on Money and Banking, and Gold, Wiley, 2008 edition, pp. 29–39.
  6. ↑ "History of Money". Zzaponline.com.
  7. ↑ Milnes, Alfred (1919). The economic foundations of reconstruction. Macdonald and Evans. p. 55.
  8. ↑ Dwivedi, DN (2005). Macroeconomics: Theory and Policy. Tata McGraw-Hill. p. 182.
  9. ↑ Krugman, Paul & Wells, Robin, Economics, Worth Publishers, New York. (2006).
  10. ↑ David Graeber (2011). Debt: the first 5,000 years. New York: Melville House. pp. 21–41.
  11. ↑ T.H. Greco. Money: Understanding and Creating Alternatives to Legal Tender, White River Junction, Vt: Chelsea Green Publishing (2001).
  12. ↑ "money : The New Palgrave Dictionary of Economics". The New Palgrave Dictionary of Economics.
  13. ↑ Business and Immigration 互聯網檔案館嘅歸檔，歸檔日期2019年9月26號，..
  14. ↑ Jonnard, Claude (1997-12-29). International Business and TradeTheory, Practice, and Policy. CRC Press.
  15. ↑ 15.0 15.1 15.2 What Is Money?. Investopdia.
  16. ↑ Desjardins, Jeff (December 15, 2015). "Infographic: The Properties of Money". The Money Project.
  17. ↑ Mauss, Marcel. The Gift: The Form and Reason for Exchange in Archaic Societies. pp. 36–37.
  18. ↑ "What is Debt? – An Interview with Economic Anthropologist David Graeber 互聯網檔案館嘅歸檔，歸檔日期2019年10月3號，.". Naked Capitalism.
  19. ↑ David Graeber: Debt: The First 5000 Years, Melville 2011. Cf.
  20. ↑ David Graeber (2001). Toward an anthropological theory of value: the false coin of our own dreams. Palgrave Macmillan. pp. 153–154.
  21. ↑ Kramer, History Begins at Sumer, pp. 52–55.
  22. ↑ Fazzioli, Edoardo (1987). Chinese calligraphy : from pictograph to ideogram : the history of 214 essential Chinese/Japanese characters. calligraphy by Rebecca Hon Ko. New York: Abbeville Press.
  23. ↑ Herodotus. Histories, I, 94.
  24. ↑ Goldsborough, Reid (2003-10-02). "World's First Coin". rg.ancients.info.
  25. ↑ 25.0 25.1 Moshenskyi, Sergii (2008). History of the weksel: Bill of exchange and promissory note. p. 55.
  26. ↑ Huang Da (黃達), Liu Hongru (劉鴻儒), Zhang Xiao (張肖), ed. (1990). Zhongguo jinrong baike quanshu (中國金融百科全書) (Beijing: Jingji guanli chubanshe), Vol. 1, 89.
  27. ↑ Marco Polo (1818). The Travels of Marco Polo, a Venetian, in the Thirteenth Century: Being a Description, by that Early Traveller, of Remarkable Places and Things, in the Eastern Parts of the World. pp. 353–355.
  28. ↑ Geisst, Charles R. (2005). Encyclopedia of American business history. New York. p. 39.
  29. ↑ 29.0 29.1 Karl Gunnar Persson (28 January 2010). An Economic History of Europe: Knowledge, Institutions and Growth, 600 to the Present. Cambridge University Press. p. 137.
  30. ↑ Walker, International Bimetallism (New York, 1896)
  31. ↑ Bernholz, Peter and Gersbach, Hans, "Gresham's Law: Theory." The New Palgrave Dictionary of Money and Finance, vol. 2. Macmillan: London and Basingstoke 1992, 286–288.
  32. ↑ Sargent, T. J., & Wallace, N. (1975). " Rational" expectations, the optimal monetary instrument, and the optimal money supply rule. Journal of political economy, 83(2), 241-254.
  33. ↑ Wray, L. R. (2015). Modern money theory: A primer on macroeconomics for sovereign monetary systems. Springer.
  34. ↑ 34.0 34.1 Monetary Theory 互聯網檔案館嘅歸檔，歸檔日期2019年9月21號，.. Investopedia.
  35. ↑ Barnett, W. A., & Tang, B. (2016). Chinese divisia monetary index and GDP nowcasting. Open Economies Review, 27(5), 825-849.
  36. ↑ Knell, M., & Stix, H. (2005). The income elasticity of money demand: a meta‐analysis of empirical results. Journal of Economic Surveys, 19(3), 513-533.
  37. ↑ 37.0 37.1 37.2 McLeay, M., Radia, A., & Thomas, R. (2014). Money creation in the modern economy. Bank of England Quarterly Bulletin, Q1.
  38. ↑ Dow, A. C., & Dow, S. C. (1989). Endogenous money creation and idle balances. New directions in post-Keynesian economics, 147.
  39. ↑ Money creation in the modern economy 互聯網檔案館嘅歸檔，歸檔日期2018年6月12號，..
  40. ↑ 40.0 40.1 Frederic S. Mishkin, Economics of Money, Banking and Financial Markets, 10th Edition. Prentice Hall, 2012.
  41. ↑ Levy Yeyati, Eduardo; Sturzenegger, Federico (2010). "Monetary and Exchange Rate Policies". Handbooks in Economics. Handbook of Development Economics. 5. pp. 4215–4281.
  42. ↑ 42.0 42.1 McGee, Patrick (12 June 2015). "Zimbabwe ditches its all but worthless currency". Financial Times.
  43. ↑ Farhi, E., & Tirole, J. (2009). Leverage and the central banker's put. American Economic Review, 99(2), 589-93.
  44. ↑ Bordo, Michael D., 2008. "monetary policy, history of," The New Palgrave Dictionary of Economics, 2nd Edition.
  45. ↑ The Federal Reserve. "Monetary Policy and the Economy 互聯網檔案館嘅歸檔，歸檔日期2019年8月12號，.". (PDF) Board of Governors of the Federal Reserve System, (2005-07-05).
  46. ↑ Lapavitsas, C. (2000). Money and the analysis of capitalism: the significance of commodity money. Review of Radical Political Economics, 32(4), 631-656.
  47. ↑ 47.0 47.1 Mises, Ludwig von. The Theory of Money and Credit, (Indianapolis, IN: Liberty Fund, Inc., 1981), trans. H. E. Batson. Ch. 3 Part One: The Nature of Money, Chapter 3: The Various Kinds of Money, Section 3: Commodity Money, Credit Money, and Fiat Money, Paragraph 25.
  48. ↑ Redish, A., & Weber, W. E. (2011). Coin sizes and payments in commodity money systems. Macroeconomic Dynamics, 15(S1), 62-82.
  49. ↑ Tom Bethell (1980-02-04). "Crazy as a Gold Bug". New York. 13 (5). New York Media. p. 34. Retrieved July-18-09
  50. ↑ Deardorff, Prof. Alan V. (2008). "Deardorff's Glossary of International Economics". Department of Economics, University of Michigan.
  51. ↑ Black, Henry Campbell (1910). A Law Dictionary Containing Definitions Of The Terms And Phrases Of American And English Jurisprudence, Ancient And Modern, p. 494. West Publishing Co. Black’s Law Dictionary defines the word "fiat" to mean "a short order or warrant of a Judge or magistrate directing some act to be done; an authority issuing from some competent source for the doing of some legal act."
  52. ↑ Shredded & Mutilated: Mutilated Currency, Bureau of Engraving and Printing.
  53. ↑ Jevons, William Stanley (1875). "XVI: Representative Money". Money and the Mechanism of Exchange.
  54. ↑ 54.0 54.1 54.2 Angus, Ian. Coins & Money Tokens. London: Ward Lock, 1973.
  55. ↑ Tony Clayton. "Comprehensive list of metals and their alloys which have been used at various times, in coins for all types of purposes". coinsoftheuk.co.uk.
  56. ↑ Atack, Jeremy; Passell, Peter (1994). A New Economic View of American History. New York: W.W. Norton and Co. p. 469.
  57. ↑ O'Sullivan, Arthur; Sheffrin, Steven M. (2003). Economics: Principles in Action. Upper Saddle River, New Jersey: Pearson Prentice Hall. p. 258.
  58. ↑ "FRB: H.6 Release – Money Stock and Debt Measures 互聯網檔案館嘅歸檔，歸檔日期2019年8月28號，.". www.federalreserve.gov. January 27, 2011.
  59. ↑ "How Currency Works 互聯網檔案館嘅歸檔，歸檔日期2019年7月30號，.". 2 September 2003.
  60. ↑ Eveleth, Rose. "The truth about the death of cash".
  61. ↑ Tucker, Toph. "Bitcoin's Volatility Problem: Why Today's Selloff Won't Be the Last". Bloomberg BusinessWeek.
  62. ↑ "Counterfeiting statistics for several currencies 互聯網檔案館嘅歸檔，歸檔日期2019年11月4號，.". Itsamoneything.com. 2012-06-09.
  63. ↑ "Counterfeit Money, Who Takes the Hit?". William F Hummel.
  64. ↑ LEGISLATION - CRIMES (CURRENCY) ACT 1981 互聯網檔案館嘅歸檔，歸檔日期2019年3月6號，. (PDF).
  65. ↑ Derrida, J. (1992). Given time: I. Counterfeit money (Vol. 1). University of Chicago Press.
  66. ↑ Chia, T. H., & Levene, M. J. (2009). Detection of counterfeit US paper money using intrinsic fluorescence lifetime. Optics Express, 17(24), 22054-22061.
  67. ↑ Choi, W. J., Min, G. H., Lee, B. H., Eom, J. H., & Kim, J. W. (2010). Counterfeit detection using characterization of safety feature on banknote with full-field optical coherence tomography. Journal of the Optical Society of Korea, 14(4), 316-320.

拎

[編輯]
維基同享有多媒體嘅嘢：
Money
由「https://zh-yue.wikipedia.org/w/index.php?title=錢&oldid=2171473」收