2015年3月20號日食

2015年3月20號嘅日食係一次日全食，發生喺世界協調時間2015年3月20號，因為月亮穿過太陽同地球之間，本影掂到地表而令到嗰笪地完全冇陽光，而形成日全食，同時喺本影兩側數千公里嘅半影範圍入面遮住少少陽光，形成日偏食。

介紹

今次日食食分係1.0445，食甚喺法羅群島以北嘅海域維持嘅時間最長，有成2分鐘零46.9秒。今次日食之後，成個歐洲去到2026年8月12號都唔會再有日全食出現。

出現嘅地方

今次日食開始嗰陣，月亮嘅本影喺格陵蘭以南嘅大西洋海面掂到地球，然後一直向東北郁，經過北大西洋同北冰洋。只有法羅群島同埋斯瓦爾巴先有日全食。咁啱得咁橋，今次日食嘅全食帶喺北極點度完，而嗰日咁啱係春分，即係北極點由有成半年咁長嘅極夜入到去跟住嗰半年極晝嘅日子，所以日全食令極晝開始幾粒鐘之後，短暫噉樣冇咗幾分鐘嘅太陽光。

除了窄到爆嘅全食帶入面可以睇到日全食之外，今次日食發生嗰陣，格陵蘭嘅大部分地區、成個歐洲、北非、阿拉伯以北嘅中東、中亞、西伯利亞西、西蒙古同新疆都可以睇到日偏食。